حضرت عبداللہ بن مسعود رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم عرفات میں اپنی کان کٹی اونٹنی پر سوار تھے۔ اس وقت آپ صلی اللہ علیہ وسلم نے فرمایا: ”کیا تمہیں معلوم ہے کہ یہ کون سا دن، کون سا مہینہ اور کون سا شہر ہے؟“ صحابہ کرام رضی اللہ عنہم نے عرض کیا: ”یہ حرمت والا شہر، حرمت والا مہینہ اور حرمت والا دن ہے۔“ آپ صلی اللہ علیہ وسلم نے فرمایا: ”سنو! حقیقت یہ ہے کہ تمہارے مال اور تمہارے خون تمہارے لیے (ایک دوسرے کے لیے) اسی طرح قابل احترام ہیں جس طرح تمہارے اس شہر (مکہ مکرمہ) میں، تمہارے اس (حج کے) دن میں تمہارا مہینہ قابل احترام ہے۔ سنو! میں حوض (کوثر) پر تمہارا پیش رو ہوں گا اور تمہاری کثرتِ تعداد کی وجہ سے دوسری قوموں پر فخر کروں گا تو مجھے (قیامت کے دن) رسوا نہ کر دینا۔ سنو! میں کچھ افراد کو (جہنم سے) چھڑاؤں گا اور کچھ لوگ مجھ سے چھین لیے جائیں گے (اور جہنم میں بھیج دیے جائیں گے۔) میں کہوں گا: اے میرے رب! میرے ساتھی؟ تو اللہ تعالیٰ فرمائے گا: آپ کو نہیں معلوم، انہوں نے آپ کے بعد کیا نئے کام کیے۔“ [سنن ابن ماجه/كتاب المناسك/حدیث: 3057]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے حج ادا فرمایا، اس حج کے موقع پر قربانی کے دن جمرات کے درمیان کھڑے ہوئے۔ (اس وقت) نبی صلی اللہ علیہ وسلم نے فرمایا: ”یہ کون سا دن ہے؟“ لوگوں نے کہا: ”قربانی کا دن ہے۔“ آپ صلی اللہ علیہ وسلم نے فرمایا: ”یہ کون سا شہر ہے؟“ انہوں نے کہا: ”یہ اللہ کا حرمت والا شہر ہے۔“ آپ صلی اللہ علیہ وسلم نے فرمایا: ”یہ کون سا مہینہ ہے؟“ لوگوں نے کہا: ”یہ اللہ کا حرمت والا مہینہ ہے۔“ آپ صلی اللہ علیہ وسلم نے فرمایا: ”یہ حج اکبر کا دن ہے اور تمہاری جانیں، تمہارے مال، تمہاری عزتیں ایک دوسرے کے لیے اسی طرح قابل احترام ہیں جس طرح اس مہینے کے اس دن میں اس شہر کا احترام ہے۔“ پھر فرمایا: ”کیا میں نے پہنچا دیا؟“ لوگوں نے کہا: ”جی ہاں۔“ تب نبی صلی اللہ علیہ وسلم نے فرمایا: ” «اللَّهُمَّ اشْهَدْ» ”اے اللہ! گواہ رہ۔“”پھر لوگوں کو الوداع کہا۔ صحابہ رضی اللہ عنہم نے کہا: ”یہ «حَجَّةُ الْوَدَاعِ» یعنی الوداعی حج ہے۔“ [سنن ابن ماجه/كتاب المناسك/حدیث: 3058]

حضرت عائشہ رضی اللہ عنہا اور حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ”طوافِ زیارت رات تک مؤخر فرمایا۔“ [سنن ابن ماجه/كتاب المناسك/حدیث: 3059]

حضرت عبداللہ بن عباس رضی اللہ عنہ سے روایت ہے کہ ”نبی صلی اللہ علیہ وسلم نے طوافِ افاضہ کے سات چکروں میں رمل نہیں کیا۔“ جناب عطاء رحمہ اللہ بیان کرتے ہیں: ”اس (طواف) میں رمل نہیں ہوتا۔“ [سنن ابن ماجه/كتاب المناسك/حدیث: 3060]

حضرت محمد بن عبدالرحمن بن ابی بکر رضی اللہ عنہ سے روایت ہے، انہوں نے فرمایا: ”میں حضرت عبداللہ بن عباس رضی اللہ عنہما کے پاس بیٹھا ہوا تھا کہ ایک آدمی ان کے پاس آیا۔ انہوں نے پوچھا: ”کہاں سے آئے ہو؟“ اس نے کہا: ”زمزم سے۔“ فرمایا: ”کیا تم نے اس میں سے اس طرح پیا ہے جس طرح پینا چاہیے؟“ اس نے کہا: ”وہ کس طرح ہے؟“ فرمایا: ”جب تو اس چاہ (زمزم) سے پانی پیے تو قبلے کی طرف منہ کر، اللہ کا نام لے، تین سانس لے اور سیر ہو کر پی۔ جب تو پی چکے تو اللہ عزوجل کا شکر ادا کر کیونکہ رسول اللہ صلی اللہ علیہ وسلم نے فرمایا ہے: ”ہمارے اور منافقوں کے درمیان (پہچان کے لیے) یہ علامت ہے کہ وہ زمزم سیر ہو کر نہیں پیتے۔“““ [سنن ابن ماجه/كتاب المناسك/حدیث: 3061]

حضرت جابر بن عبداللہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: «مَاءُ زَمْزَمَ لِمَا شُرِبَ لَهُ» ”زمزم کا پانی اس (مقصد) کے لیے ہے جس کے لیے وہ پیا جائے۔“ [سنن ابن ماجه/كتاب المناسك/حدیث: 3062]

حضرت عبداللہ بن عمر رضی اللہ عنہ سے روایت ہے، انہوں نے فرمایا: ”فتحِ مکہ کے دن رسول اللہ صلی اللہ علیہ وسلم کعبہ شریف میں داخل ہوئے اور حضرت بلال رضی اللہ عنہ اور حضرت عثمان بن شیبہ رضی اللہ عنہ تھے۔ انہوں نے اندر سے کعبہ کا دروازہ بند کر لیا۔ جب وہ باہر نکلے تو میں نے حضرت بلال رضی اللہ عنہ سے پوچھا: ”رسول اللہ صلی اللہ علیہ وسلم نے کہاں نماز پڑھی تھی؟“ انہوں نے مجھے بتایا کہ رسول اللہ صلی اللہ علیہ وسلم نے داخل ہونے کے بعد سامنے کے رخ دائیں طرف کے دو ستونوں کے درمیان نماز پڑھی تھی۔ بعد میں میں نے خود کو ملامت کی کہ میں نے یہ کیوں نہ پوچھ لیا کہ رسول اللہ صلی اللہ علیہ وسلم نے کتنی نماز پڑھی تھی۔“ [سنن ابن ماجه/كتاب المناسك/حدیث: 3063]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم میرے پاس سے باہر تشریف لے گئے تو آپ صلی اللہ علیہ وسلم مطمئن اور خوش تھے، پھر میرے پاس واپس آئے تو غمگین تھے، میں نے عرض کیا: ”اے اللہ کے رسول صلی اللہ علیہ وسلم ! آپ صلی اللہ علیہ وسلم میرے پاس سے تشریف لے گئے تو آپ مطمئن اور خوش تھے اور واپس آئے تو آپ غمگین (اور پریشان) ہیں (اس کی وجہ کیا ہے؟)“ آپ صلی اللہ علیہ وسلم نے فرمایا: ”میں کعبہ کے اندر داخل ہوا تھا، اب میرا جی چاہتا ہے کہ (کاش) میں نے ایسا نہ کیا ہوتا، مجھے خدشہ ہے کہ (اپنے اس عمل کی وجہ سے) میں اپنے بعد اپنی امت کو مشقت میں مبتلا نہ کر دوں۔““ [سنن ابن ماجه/كتاب المناسك/حدیث: 3064]

حضرت عبد اللہ بن عمر رضی اللہ عنہ سے روایت ہے کہ ”حضرت عباس بن عبدالمطلب رضی اللہ عنہ نے پانی پلانے کے فریضہ کی ادائیگی کے لیے رسول اللہ صلی اللہ علیہ وسلم سے اجازت چاہی کہ منیٰ کے ایام میں رات کو مکہ میں رہیں، چنانچہ آپ صلی اللہ علیہ وسلم نے انہیں اجازت دے دی۔“ [سنن ابن ماجه/كتاب المناسك/حدیث: 3065]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”نبی صلی اللہ علیہ وسلم نے کسی (حاجی) کو مکہ میں رات گزارنے کی اجازت نہیں دی، سوائے حضرت عباس رضی اللہ عنہ کے، (جنہیں) ان کے منصب سقایت کی وجہ سے (رات کو مکہ میں رہنے کی اجازت دی۔)“ [سنن ابن ماجه/كتاب المناسك/حدیث: 3066]