حضرت جابر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کوئی شخص اپنا ہاتھ نہ پونچھے جب تک اسے چاٹ نہ لے کیونکہ اسے معلوم نہیں کہ کھانے کے کس حصے میں برکت ہے۔“ [سنن ابن ماجه/كتاب الأطعمة/حدیث: 3270]

حضرت ام عاصم رضی اللہ عنہا سے روایت ہے، انہوں نے کہا: رسول اللہ صلی اللہ علیہ وسلم کے آزاد کردہ حضرت نبیثہ بن عبداللہ رضی اللہ عنہ ہمارے ہاں تشریف لائے جبکہ ہم ایک پیالے میں کھانا کھا رہے تھے۔ انہوں نے کہا: نبی صلی اللہ علیہ وسلم نے فرمایا: ”جو شخص پیالے میں کھانا کھائے، پھر اس (پیالے) کو چاٹ لے تو پیالہ اس کے لیے مغفرت کی دعا کرتا ہے۔“ [سنن ابن ماجه/كتاب الأطعمة/حدیث: 3271]

حضرت ابو الیمان معلیٰ بن راشد رضی اللہ عنہ اپنی دادی (ام عاصم) رضی اللہ عنہا سے روایت کرتے ہیں کہ انہوں نے قبیلہ ہذیل کے ایک صاحب حضرت نبیثہ الخیر رضی اللہ عنہ کے بارے میں بیان کرتے ہوئے فرمایا: ”ہم ایک پیالے میں کھانا کھا رہے تھے کہ نبیثہ رضی اللہ عنہ تشریف لے آئے۔“ انہوں نے کہا: ”ہم سے رسول اللہ صلی اللہ علیہ وسلم نے بیان فرمایا: ”جو شخص پیالے میں کھانا کھا کر اسے چاٹتا ہے، پیالہ اس کے لیے مغفرت کی دعا کرتا ہے۔““ [سنن ابن ماجه/كتاب الأطعمة/حدیث: 3272]

حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جب دستر خوان پر کھانا لگا دیا جائے تو آدمی کو اپنے سامنے سے کھانا چاہیے، اپنے ساتھی کے آگے سے نہ کھائے۔“ [سنن ابن ماجه/كتاب الأطعمة/حدیث: 3273]

حضرت عکراش بن ذویب رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کی خدمت میں ایک بڑا پیالا پیش کیا گیا، جس میں بہت سا ثرید اور چکنائی تھی۔ ہم لوگ اس میں سے کھانے لگے تو میرا ہاتھ اس میں ہر طرف گھوم رہا تھا۔ آپ صلی اللہ علیہ وسلم نے فرمایا: ”عکراش! ایک جگہ سے کھاؤ، یہ ایک ہی کھانا ہے۔“ پھر ہمارے سامنے ایک تھال رکھا گیا جس میں مختلف قسم کی تازہ کھجوریں تھیں۔ رسول اللہ صلی اللہ علیہ وسلم کا ہاتھ تھال میں گھومنے لگا اور آپ صلی اللہ علیہ وسلم نے (مجھ سے) فرمایا: ”اے عکراش! جہاں سے چاہو کھاؤ، یہ ایک ہی قسم نہیں۔““ [سنن ابن ماجه/كتاب الأطعمة/حدیث: 3274]

حضرت عبداللہ بن بسر رضی اللہ عنہ سے روایت ہے کہ رسول اللہ صلی اللہ علیہ وسلم کی خدمت میں ایک پیالہ پیش کیا گیا تو رسول اللہ صلی اللہ علیہ وسلم نے فرمایا: ”اس کے کناروں سے کھاؤ، اس کی چوٹی چھوڑ دو، اس میں برکت ڈالی جائے گی۔“ [سنن ابن ماجه/كتاب الأطعمة/حدیث: 3275]

حضرت واثلہ بن اسقع لیثی رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے ثرید کی چوٹی پر ہاتھ رکھ کر فرمایا: ” «بِسْمِ اللّٰهِ» ”اللہ کا نام لے کر“ اس کے کناروں سے کھاؤ اور اس کا اونچا (درمیان) حصہ رہنے دو (بعد میں کھانا) کیونکہ اس میں برکت اوپر سے آتی ہے۔“ [سنن ابن ماجه/كتاب الأطعمة/حدیث: 3276]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جب کھانا رکھا جائے تو اس کے کنارے سے لو اور اس کا درمیان چھوڑ دو کیونکہ برکت اس کے وسط میں نازل ہوتی ہے۔“ [سنن ابن ماجه/كتاب الأطعمة/حدیث: 3277]

حضرت معقل بن یسار رضی اللہ عنہ سے روایت ہے، وہ کھانا کھا رہے تھے کہ اتنے میں ان (کے ہاتھ) سے ایک لقمہ گر گیا۔ انہوں نے اسے اٹھایا اور اسے جو گرد و غبار وغیرہ لگ گیا تھا، اسے دور کیا، پھر وہ لقمہ کھا لیا۔ زمینداروں نے ایک دوسرے کو اشارے کیے (کہ دیکھیں یہ کیا کر رہے ہیں)۔ انہیں کہا گیا: ”اللہ تعالیٰ گورنر صاحب (آپ) کو درست رکھے، آپ کے لقمہ اٹھانے کی وجہ سے زمیندار ایک دوسرے کو اشارے کرتے ہیں جب کہ آپ کے سامنے یہ کھانا موجود ہے (پھر گرا ہوا لقمہ نہ اٹھاتے تو کیا حرج تھا، خواہ مخواہ ان لوگوں کے مذاق کا نشانہ بنے)۔“ انہوں نے فرمایا: ”میں عجمیوں کی وجہ سے رسول اللہ صلی اللہ علیہ وسلم سے سنی ہوئی حدیث پر عمل کرنا ترک نہیں کر سکتا۔ ہم تو، جب کسی کا لقمہ گر پڑتا تھا، اسے حکم دیا کرتے تھے کہ اسے اٹھا کر اس پر لگی ہوئی چیز (تنکا، غبار وغیرہ) دور کرے اور اسے کھا لے، اور اسے شیطان کے لیے نہ رہنے دے۔“ [سنن ابن ماجه/كتاب الأطعمة/حدیث: 3278]

حضرت جابر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب تم میں سے کسی کے ہاتھ سے لقمہ گر پڑے تو وہ اس پر لگے گرد و غبار کو صاف کرے اور اسے کھالے۔“ [سنن ابن ماجه/كتاب الأطعمة/حدیث: 3279]