حضرت عبداللہ بن حارث بن جزء زبیدی رضی اللہ عنہ سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کے زمانۂ مبارک میں مسجد میں گوشت روٹی کھا لیا کرتے تھے۔“ [سنن ابن ماجه/كتاب الأطعمة/حدیث: 3300]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ”ہم رسول اللہ صلی اللہ علیہ وسلم کے زمانے میں چلتے چلتے کھا لیا کرتے تھے اور کھڑے ہو کر پانی پی لیا کرتے تھے۔“ [سنن ابن ماجه/كتاب الأطعمة/حدیث: 3301]

حضرت انس رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم کدو پسند فرماتے تھے۔“ [سنن ابن ماجه/كتاب الأطعمة/حدیث: 3302]

حضرت انس رضی اللہ عنہ سے روایت ہے، انہوں نے فرمایا: ”میری والدہ ام سلیم رضی اللہ عنہا نے میرے ہاتھ کھجوروں کا ایک ٹوکرا رسول اللہ صلی اللہ علیہ وسلم کی خدمت میں بھیجا۔ آپ صلی اللہ علیہ وسلم مجھے (گھر میں) نہ ملے۔ آپ صلی اللہ علیہ وسلم قریب ہی اپنے ایک آزاد کردہ غلام کے ہاں تشریف لے گئے تھے۔ اس نے آپ صلی اللہ علیہ وسلم کو دعوت دی تھی اور نبی صلی اللہ علیہ وسلم کے لیے کھانا تیار کیا تھا۔ میں حاضر خدمت ہوا تو آپ صلی اللہ علیہ وسلم کھانا تناول فرما رہے تھے۔ آپ صلی اللہ علیہ وسلم نے مجھے اپنے ساتھ کھانا کھانے کی دعوت دی۔ ان صاحب نے کدو اور گوشت ڈال کر ثرید بنا رکھا تھا۔ میں نے دیکھا کہ نبی صلی اللہ علیہ وسلم کو کدو اچھا لگتا ہے تو میں اس (کدو) کے ٹکڑے (برتن کے اطراف میں سے) جمع کر کے آپ صلی اللہ علیہ وسلم کے قریب کرنے لگا۔ جب ہم لوگوں نے کھانا کھا لیا تو آپ صلی اللہ علیہ وسلم واپس گھر تشریف لے گئے۔ میں نے (کھجوروں کا) ٹوکرا آپ صلی اللہ علیہ وسلم کے سامنے رکھ دیا۔ آپ صلی اللہ علیہ وسلم نے کھجوریں کھانا اور تقسیم کرنا شروع کر دیں حتیٰ کہ ختم کر کے فارغ ہو گئے۔“ [سنن ابن ماجه/كتاب الأطعمة/حدیث: 3303]

حضرت حکیم بن جابر رحمہ اللہ اپنے والد حضرت جابر بن طارق احمسی رضی اللہ عنہ سے روایت کرتے ہیں، انہوں نے فرمایا: ”میں نبی صلی اللہ علیہ وسلم کے گھر میں داخل ہوا، آپ صلی اللہ علیہ وسلم کے پاس کدو تھا، میں نے عرض کیا: یہ کیا ہے؟ آپ صلی اللہ علیہ وسلم نے فرمایا: یہ «الْقُرْعُ» ”کدو“ ہے، ہم اس کے ساتھ اپنے کھانے (سالن) میں اضافہ کرتے ہیں۔“ [سنن ابن ماجه/كتاب الأطعمة/حدیث: 3304]

حضرت ابودرداء رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”گوشت دنیا والوں کے اور جنت والوں کے کھانوں کا سردار ہے۔“ [سنن ابن ماجه/كتاب الأطعمة/حدیث: 3305]

حضرت ابودرداء رضی اللہ عنہ سے روایت ہے کہ ”رسول اللہ صلی اللہ علیہ وسلم کو جب بھی گوشت کی دعوت دی گئی، آپ صلی اللہ علیہ وسلم نے قبول فرمائی اور جب بھی آپ صلی اللہ علیہ وسلم کی خدمت میں گوشت بطور ہدیہ پیش کیا گیا، آپ صلی اللہ علیہ وسلم نے قبول فرمایا۔“ [سنن ابن ماجه/كتاب الأطعمة/حدیث: 3306]

حضرت ابوہریرہ رضی اللہ عنہ سے روایت ہے، انہوں نے فرمایا: ”ایک دن رسول اللہ صلی اللہ علیہ وسلم کی خدمت میں گوشت لایا گیا۔ آپ صلی اللہ علیہ وسلم کو (اس میں سے) ذراع (دستی) کا گوشت پیش کیا گیا جو آپ صلی اللہ علیہ وسلم کو بہت پسند تھا۔ آپ صلی اللہ علیہ وسلم نے اس میں سے دانتوں سے نوچ کر کھایا۔“ [سنن ابن ماجه/كتاب الأطعمة/حدیث: 3307]

حضرت عبداللہ بن جعفر طیار (بن ابی طالب) رضی اللہ عنہ نے حضرت عبداللہ بن زبیر رضی اللہ عنہ کو یہ حدیث سنائی، جبکہ انہوں نے لوگوں کے لیے ایک اونٹ ذبح کیا تھا، کہ انہوں نے رسول اللہ صلی اللہ علیہ وسلم سے اس وقت یہ ارشاد مبارک سنا جب صحابہ کرام رضی اللہ عنہم رسول اللہ صلی اللہ علیہ وسلم کو گوشت پیش کر رہے تھے۔ (کھانا کھاتے وقت ہر صحابی عمدہ عمدہ گوشت نبی صلی اللہ علیہ وسلم کو پیش کر رہا تھا کہ ”یہ تناول فرمائیں، یہ ٹکڑا لیں، یہ زیادہ اچھا ہے“، (تب) آپ صلی اللہ علیہ وسلم فرما رہے تھے: ”سب سے عمدہ گوشت پشت کا ہوتا ہے۔“) [سنن ابن ماجه/كتاب الأطعمة/حدیث: 3308]

حضرت انس بن مالک رضی اللہ عنہ سے روایت ہے، انہوں نے فرمایا: ”میں نہیں جانتا کہ رسول اللہ صلی اللہ علیہ وسلم نے کبھی سالم بھنی ہوئی بکری دیکھی ہو یہاں تک کہ آپ اللہ عزوجل کے پاس چلے گئے۔“ [سنن ابن ماجه/كتاب الأطعمة/حدیث: 3309]