حضرت ام الفضل بنت حارث رضی اللہ عنہا سے روایت ہے کہ ان کے ہاں چند لوگوں نے نبی کریم صلی اللہ علیہ وسلم کے متعلق یوم عرفہ کے روزے کے بارے میں اختلاف کیا۔ بعض نے کہا: آپ روزے سے ہیں جبکہ کچھ لوگوں کا خیال تھا کہ آپ نے روزہ نہیں رکھا۔ حضرت ام الفضل رضی اللہ عنہا نے آپ صلی اللہ علیہ وسلم کے پاس دودھ کا پیالہ بھیجا جبکہ آپ صلی اللہ علیہ وسلم اپنی اونٹنی پر وقوف فرما رہے تھے تو آپ صلی اللہ علیہ وسلم نے اسے نوشِ جاں فرمایا۔ [صحيح البخاري/كتاب الحج/حدیث: 1661]

حضرت سالم بن عبداللہ سے روایت ہے کہ حجاج بن یوسف جس سال حضرت عبداللہ بن زبیر رضی اللہ عنہما سے جنگ کرنے (مکے) آیا تو اس نے حضرت عبداللہ بن عمر رضی اللہ عنہما سے دریافت کیا کہ آپ عرفہ کے دن موقف میں کیا کرتے ہیں؟ حضرت سالم نے کہا: اگر تو سنت کی پیروی کرنا چاہتا ہے تو عرفہ کے دن نمازِ ظہر دوپہر کے وقت جلدی پڑھنا۔ حضرت عبداللہ بن عمر رضی اللہ عنہما نے فرمایا: اس (سالم) نے سچ کہا ہے، یقیناً صحابہ کرام رضی اللہ عنہم اجمعین سنت کے مطابق ظہر اور عصر کی نماز جمع کرتے تھے۔ ابن شہاب کہتے ہیں: میں نے حضرت سالم سے دریافت کیا: آیا رسول اللہ صلی اللہ علیہ وسلم نے بھی ایسا کیا تھا؟ حضرت سالم نے جواب دیا کہ تم اس مسئلے میں رسول اللہ صلی اللہ علیہ وسلم کی سنت ہی پر چلتے ہو۔ [صحيح البخاري/كتاب الحج/حدیث: 1662]

حضرت سالم بن عبداللہ رحمہ اللہ سے روایت ہے کہ خلیفہ عبدالملک بن مروان نے حجاج بن یوسف کو لکھا کہ حج کے معاملات میں حضرت عبداللہ بن عمر رضی اللہ عنہما کی پیروی کرے، چنانچہ جب عرفہ کا دن تھا تو حضرت عبداللہ بن عمر رضی اللہ عنہما زوالِ آفتاب کے بعد آئے۔ میں بھی ان کے ہمراہ تھا۔ انہوں نے حجاج کے خیمے کے پاس آ کر بلند آواز سے کہا: یہ کہاں ہے؟ حجاج باہر نکلا تو حضرت ابن عمر رضی اللہ عنہما نے فرمایا: عرفات کی طرف چلیں۔ حجاج بولا: ابھی چلنا ہے؟ فرمایا: ہاں۔ حجاج نے کہا: مجھے تھوڑی سی مہلت دیں کہ میں اپنے سر پر پانی بہا لوں۔ حضرت عبداللہ بن عمر رضی اللہ عنہما سواری سے اتر کر انتظار کرنے لگے یہاں تک کہ وہ باہر نکلا اور میرے اور میرے والد گرامی کے درمیان چلنے لگا۔ میں نے اسے کہا: اگر سنت کو پانا چاہتے ہو تو آج خطبہ مختصر کرو اور وقوف میں جلدی کرو۔ حضرت ابن عمر رضی اللہ عنہما نے فرمایا: اس نے سچ کہا ہے۔ [صحيح البخاري/كتاب الحج/حدیث: 1663]

حضرت جبیر بن مطعم رضی اللہ عنہ سے روایت ہے، انہوں نے کہا: (قبل از اسلام) ایک دفعہ میرا اونٹ گم ہو گیا۔ میں عرفہ کے دن اسے تلاش کرنے نکلا تو میں نے نبی کریم صلی اللہ علیہ وسلم کو میدانِ عرفات میں وقوف کرتے ہوئے دیکھا۔ میں نے دل میں کہا: اللہ کی قسم! یہ تو قومِ حمس سے ہیں (جو حدودِ حرم سے باہر نہیں نکلتے) یہاں ان کا کیا کام ہے؟ [صحيح البخاري/كتاب الحج/حدیث: 1664]

حضرت عروہ بن زبیر رحمہ اللہ سے روایت ہے کہ دورِ جاہلیت میں «الْحُمْسُ» کے علاوہ دوسرے لوگ بیت اللہ کا ننگے طواف کرتے تھے۔ «الْحُمْسُ» سے مراد قریش اور اس کی اولاد ہے۔ قریش نیکی سمجھ کر لوگوں کو کپڑے دیتے، مرد مرد کو کپڑے دیتا وہ ان میں طواف کرتا اور عورت عورت کو کپڑے دیتی وہ ان میں طواف کرتی۔ جسے قریش کپڑے نہ دیتے وہ ننگا ہوکر بیت اللہ کا طواف کرتا۔ دوسرے لوگ تو میدانِ عرفات سے واپس آتے لیکن «الْحُمْسُ» مزدلفہ ہی سے واپس آجاتے تھے۔ حضرت عائشہ رضی اللہ عنہا نے بتایا کہ درج ذیل آیتِ کریمہ ﴿ثُمَّ أَفِيضُوا مِنْ حَيْثُ أَفَاضَ النَّاسُ﴾ [سورة البقرة: 199] ”پھر تم لوگ وہاں سے واپس لوٹو جہاں سے دوسرے لوگ لوٹتے ہیں“ قریش کے متعلق نازل ہوئی؛ راوی کہتے ہیں کہ قریش مزدلفہ سے پلٹ آتے تھے، اس لیے انھیں عرفات کی طرف بھیجا گیا۔ [صحيح البخاري/كتاب الحج/حدیث: 1665]

عروہ بن زبیر رحمہ اللہ سے روایت ہے، انہوں نے کہا کہ میری موجودگی میں اسامہ بن زید رضی اللہ عنہ سے دریافت کیا گیا کہ حجۃ الوداع میں عرفات سے واپسی کے وقت رسول اللہ صلی اللہ علیہ وسلم کی رفتار کیسی تھی؟ انہوں نے فرمایا کہ آپ صلی اللہ علیہ وسلم عام رفتار سے چلتے تھے اور جب میدان آجاتا تو تیز ہو جاتے۔ (راوی حدیث) ہشام رحمہ اللہ نے کہا: «النَّصُّ» اس تیز رفتاری کو کہتے ہیں جو عام رفتار سے زیادہ ہو۔ «فَجْوَةٍ» وسیع میدان کو کہتے ہیں۔ اس کی جمع «فَجَوَاتٌ» اور «فِجَاءٌ» ہے جیسا کہ «رَكْوَةٍ» کی جمع ( «رَكَوَاتٌ» اور) «رِكَاءٌ» ہے۔ «مَنَاصٍ» کے معنی ہیں: بھاگنے کا وقت نہیں رہا۔ [صحيح البخاري/كتاب الحج/حدیث: 1666]

حضرت اسامہ بن زید رضی اللہ عنہ سے روایت ہے کہ نبی کریم صلی اللہ علیہ وسلم جب عرفات سے واپس ہوئے تو راستے میں ایک گھاٹی کی طرف متوجہ ہوئے۔ آپ نے قضائے حاجت سے فراغت کے بعد وضو فرمایا تو میں نے عرض کیا: اللہ کے رسول صلی اللہ علیہ وسلم ! کیا آپ نماز پڑھیں گے؟ آپ صلی اللہ علیہ وسلم نے فرمایا: ”(نہیں) نماز تو آگے ہوگی۔“ [صحيح البخاري/كتاب الحج/حدیث: 1667]

حضرت نافع رحمہ اللہ سے روایت ہے کہ حضرت عبداللہ بن عمر رضی اللہ عنہما مزدلفہ میں مغرب اور عشاء کی نماز ایک ساتھ پڑھتے تھے، البتہ آتے وقت راستے میں اس گھاٹی کی طرف مڑ جاتے جس طرف رسول اللہ صلی اللہ علیہ وسلم متوجہ ہوئے تھے۔ وہاں قضائے حاجت کرتے اور وضو فرماتے لیکن وہاں نماز نہ پڑھتے حتیٰ کہ مزدلفہ پہنچ کر اسے ادا کرتے۔ [صحيح البخاري/كتاب الحج/حدیث: 1668]