ام المومنین حضرت حفصہ رضی اللہ عنہا سے روایت ہے، انہوں نے کہا: میں نے عرض کیا: اللہ کے رسول صلی اللہ علیہ وسلم ! لوگوں نے احرام کھول دیا ہے لیکن آپ نے نہیں کھولا، اس کی کیا وجہ ہے؟ آپ نے فرمایا: ”میں نے اپنے سر کے بالوں کو جما لیا ہے اور قربانی کے گلے میں ہار ڈال رکھا ہے۔ لہٰذا میں حج سے فراغت تک احرام نہیں کھولوں گا۔“ [صحيح البخاري/كتاب الحج/حدیث: 1697]

حضرت عائشہ رضی اللہ عنہا سے روایت ہے، انہوں نے فرمایا کہ رسول اللہ صلی اللہ علیہ وسلم مدینہ طیبہ سے قربانی بھیجتے اور میں ان کے لیے ہار خود تیار کرتی، پھر آپ صلی اللہ علیہ وسلم کسی چیز سے پرہیز نہ کرتے جس سے محرم اجتناب کرتا ہے۔ [صحيح البخاري/كتاب الحج/حدیث: 1698]

حضرت عائشہ رضی اللہ عنہا سے روایت ہے، انہوں نے فرمایا کہ میں نے نبی صلی اللہ علیہ وسلم کی ہدی کے لیے ہار تیار کیے۔ پھر آپ صلی اللہ علیہ وسلم نے ان کا اشعار کیا اور انہیں قلادہ پہنایا۔ پھر آپ صلی اللہ علیہ وسلم نے انہیں بیت اللہ روانہ کیا اور خود مدینہ طیبہ میں ٹھہرے۔ اس عمل سے آپ صلی اللہ علیہ وسلم پر کوئی ایسی چیز حرام نہ ہوئی جو آپ صلی اللہ علیہ وسلم کے لیے حلال تھی، یعنی آپ صلی اللہ علیہ وسلم محرم نہ ہوئے۔ [صحيح البخاري/كتاب الحج/حدیث: 1699]

حضرت عمرہ بنت عبدالرحمن رحمہا اللہ بیان کرتی ہیں کہ حضرت زیاد بن ابوسفیان رحمہ اللہ نے حضرت عائشہ رضی اللہ عنہا کو لکھا کہ ابن عباس رضی اللہ عنہما کہتے ہیں جو شخص مکہ مکرمہ کی طرف قربانی کا جانور بھیج دے اس پر ہر وہ چیز حرام ہو جاتی ہے جو حج کرنے والے پر حرام ہوتی ہے تاآنکہ اس جانور کو ذبح کر دیا جائے۔ عمرہ رحمہا اللہ کہتی ہیں، اس پر حضرت عائشہ رضی اللہ عنہا نے فرمایا: جو ابن عباس رضی اللہ عنہما نے کہا وہ درست نہیں ہے کیونکہ میں نے رسول اللہ صلی اللہ علیہ وسلم کی ہدی (قربانی) کے ہار خود اپنے ہاتھ سے تیار کیے، پھر رسول اللہ صلی اللہ علیہ وسلم نے اپنے ہاتھوں سے ان قلادوں کو پہنایا اور میرے والد محترم کے ساتھ انہیں روانہ کیا مگر کوئی چیز جو اللہ تعالیٰ نے رسول اللہ صلی اللہ علیہ وسلم کے لیے حلال کی تھی وہ حرام نہیں ہوئی تاآنکہ اس ہدی کو ذبح کر دیا گیا۔ [صحيح البخاري/كتاب الحج/حدیث: 1700]

حضرت عائشہ رضی اللہ عنہا سے روایت ہے، انہوں نے فرمایا کہ نبی صلی اللہ علیہ وسلم نے ایک دفعہ بکریاں قربانی کے لیے (مکہ مکرمہ) بھیجی تھیں۔ [صحيح البخاري/كتاب الحج/حدیث: 1701]

حضرت عائشہ رضی اللہ عنہا سے ہی روایت ہے انہوں نے فرمایا کہ میں نبی صلی اللہ علیہ وسلم کی قربانیوں کے لیے ہار بنایا کرتی تھی، آپ انہیں بکریوں کے گلے میں ڈالتے اور خود اپنے گھر میں احرام (اور اس کی پابندیوں) کے بغیر رہتے تھے۔ [صحيح البخاري/كتاب الحج/حدیث: 1702]

حضرت عائشہ رضی اللہ عنہا ہی سے ایک دوسری روایت ہے، انہوں نے فرمایا کہ میں نبی صلی اللہ علیہ وسلم کی بکریوں کے لیے ہار تیار کرتی، آپ انہیں مکہ روانہ کر دیتے اور خود احرام کے بغیر رہتے تھے۔ [صحيح البخاري/كتاب الحج/حدیث: 1703]

حضرت عائشہ رضی اللہ عنہا سے ایک اور روایت ہے، انہوں نے فرمایا کہ میں نے نبی صلی اللہ علیہ وسلم کی ہدی (قربانی) کے لیے آپ کے احرام باندھنے سے پہلے ہار تیار کیے۔ [صحيح البخاري/كتاب الحج/حدیث: 1704]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا کہ میں نے قربانیوں کے قلادے اس اون سے بنائے تھے جو میرے پاس موجود تھا۔ [صحيح البخاري/كتاب الحج/حدیث: 1705]