حضرت ابوہریرہ رضی اللہ عنہ سے مروی ہے کہ انصار میں سے ایک شخص رسول اللہ صلی اللہ علیہ وسلم کے پاس حاضر ہوا اور کہنے لگا: میں نے انصار کی ایک عورت کو شادی کا پیغام بھیجا ہے۔ آپ صلی اللہ علیہ وسلم نے فرمایا: ”تو نے اسے دیکھا نہیں؟ انصار کی آنکھوں میں کچھ خرابی ہوتی ہے۔“ ابو عبدالرحمن (امام نسائی رحمہ اللہ) بیان کرتے ہیں کہ میں نے ایک اور جگہ یہ حدیث اس طرح پائی ہے کہ یزید بن کیسان نے حضرت جابر بن عبداللہ رضی اللہ عنہما سے بیان کیا، جبکہ صحیح یہ ہے کہ روایت حضرت ابوہریرہ رضی اللہ عنہ سے ہے۔ [سنن نسائي/كتاب النكاح/حدیث: 3248]

حضرت ابوہریرہ رضی اللہ عنہ سے روایت ہے کہ ایک آدمی نے ایک (انصاری) عورت سے شادی کرنے کا ارادہ کیا، تو اس نے نبی صلی اللہ علیہ وسلم سے اس کے متعلق بیان کرنے کا ارادہ کیا، تو نبی صلی اللہ علیہ وسلم نے فرمایا: ”اسے دیکھ لینا، کیونکہ انصار کی آنکھوں میں خرابی ہوتی ہے۔“ [سنن نسائي/كتاب النكاح/حدیث: 3249]

حضرت عمر رضی اللہ عنہ سے مروی ہے کہ (میری بیٹی) حفصہ بنت عمر رضی اللہ عنہما خنیس بن حذافہ رضی اللہ عنہ سے بیوہ ہوگئیں، یہ خنیس رضی اللہ عنہ رسول اللہ صلی اللہ علیہ وسلم کے صحابہ میں سے تھے اور غزوۂ بدر میں بھی حاضر ہوئے تھے، وہ مدینہ منورہ میں فوت ہو گئے۔ میں حضرت عثمان بن عفان رضی اللہ عنہ سے ملا اور انہیں حفصہ رضی اللہ عنہما سے نکاح کی پیش کش کی، میں نے کہا: اگر آپ مناسب سمجھیں تو میں حفصہ رضی اللہ عنہما کا نکاح آپ سے کر دوں؟ وہ کہنے لگے: میں اس بارے میں غور و فکر کروں گا۔ چند دن گزرے تو میں پھر انہیں ملا تو وہ کہنے لگے: آج کل میرا نکاح کرنے کا ارادہ نہیں ہے۔ حضرت عمر رضی اللہ عنہ نے کہا: پھر میں حضرت ابوبکر صدیق رضی اللہ عنہ سے ملا اور ان سے کہا: اگر آپ پسند فرمائیں تو میں حفصہ رضی اللہ عنہما کا نکاح آپ سے کر دوں؟ انہوں نے مجھے کوئی جواب نہ دیا، مجھے ان پر حضرت عثمان رضی اللہ عنہ سے بھی زیادہ غصہ آیا۔ چند دن بعد رسول اللہ صلی اللہ علیہ وسلم نے مجھے ان کے نکاح کا پیغام بھیج دیا، میں نے (بصد خوشی و خوبی) آپ صلی اللہ علیہ وسلم سے حفصہ رضی اللہ عنہما کا نکاح کر دیا۔ بعد میں مجھے حضرت ابوبکر صدیق رضی اللہ عنہ ملے اور کہنے لگے: شاید آپ اس وقت مجھ سے ناراض ہو گئے ہوں گے جب آپ نے مجھے حفصہ رضی اللہ عنہما کے نکاح کی پیش کش کی تھی اور میں نے آپ کو کوئی جواب نہیں دیا تھا؟ میں نے کہا: ہاں۔ وہ کہنے لگے: جب آپ نے مجھے پیش کش کی تھی تو آپ کو جواب دینے سے مجھے کوئی چیز مانع نہیں تھی مگر یہ کہ میں نے رسول اللہ صلی اللہ علیہ وسلم کو ان (حفصہ رضی اللہ عنہما) کا تذکرہ فرماتے سنا تھا اور میں رسول اللہ صلی اللہ علیہ وسلم کا راز فاش نہیں کر سکتا تھا، ہاں، اگر آپ صلی اللہ علیہ وسلم انہیں پیغام نہ بھیجتے تو میں ان سے نکاح کر لیتا۔ [سنن نسائي/كتاب النكاح/حدیث: 3250]

حضرت ثابت بنانی رحمہ اللہ سے روایت ہے کہ میں حضرت انس بن مالک رضی اللہ عنہ کے پاس تھا جبکہ ان کی ایک بیٹی ان کے پاس موجود تھی۔ حضرت انس رضی اللہ عنہ نے فرمایا: ایک عورت رسول اللہ صلی اللہ علیہ وسلم کے پاس حاضر ہوئی اور اس نے آپ کو نکاح کی پیش کش کی اور کہا: اے اللہ کے رسول! کیا آپ کو مجھ سے نکاح کی ضرورت ہے؟ [سنن نسائي/كتاب النكاح/حدیث: 3251]

حضرت انس رضی اللہ عنہ سے منقول ہے کہ ایک عورت نے نبی صلی اللہ علیہ وسلم کو نکاح کی پیش کش کی۔ (یہ سن کر) حضرت انس رضی اللہ عنہ کی ایک بیٹی ہنسنے لگی اور کہا: وہ عورت کس قدر کم حیا والی تھی۔ حضرت انس رضی اللہ عنہ فرمانے لگے: وہ تجھ سے زیادہ بہتر تھی کہ اس نے نبی صلی اللہ علیہ وسلم کو نکاح کی پیش کش کی تھی۔ [سنن نسائي/كتاب النكاح/حدیث: 3252]

حضرت انس رضی اللہ عنہ سے مروی ہے کہ جب حضرت زینب (بنت جحش رضی اللہ عنہا) کی عدت ختم ہوئی تو رسول اللہ صلی اللہ علیہ وسلم نے (ان کے سابق خاوند) حضرت زید بن حارثہ رضی اللہ عنہ سے فرمایا: ”اسے میری طرف سے نکاح کا پیغام دو۔“ حضرت زید رضی اللہ عنہ نے فرمایا: میں نے جا کر کہا: زینب! خوش ہو جاؤ، مجھے رسول اللہ صلی اللہ علیہ وسلم نے تیرے پاس نکاح کا پیغام دے کر بھیجا ہے۔ وہ کہنے لگیں: میں کوئی فیصلہ نہیں کروں گی حتیٰ کہ اپنے اللہ تعالیٰ سے مشورہ کر لوں۔ وہ اپنی نماز گاہ کی طرف اٹھیں اور (نماز استخارہ شروع کر لی۔) ادھر قرآن مجید (کا حکم) اتر آیا تو رسول اللہ صلی اللہ علیہ وسلم تشریف لائے اور ان کی اجازت کے بغیر (ان کے حجرے میں) داخل ہو گئے۔ [سنن نسائي/كتاب النكاح/حدیث: 3253]

حضرت انس بن مالک رضی اللہ عنہ سے مروی ہے کہ حضرت زینب بنت جحش رضی اللہ عنہا نبی صلی اللہ علیہ وسلم کی دوسری ازواج مطہرات پر فخر کیا کرتی تھیں کہ اللہ تعالیٰ نے میرا نکاح آسمانوں پر فرمایا، نیز ان کے بارے میں پردے والی آیت اتری۔ [سنن نسائي/كتاب النكاح/حدیث: 3254]

حضرت جابر بن عبداللہ رضی اللہ عنہما سے مروی ہے کہ رسول اللہ صلی اللہ علیہ وسلم ہمیں تمام معاملات میں استخارہ (کی دعا) سکھاتے تھے جس طرح ہمیں قرآن کی سورت سکھاتے تھے۔ آپ صلی اللہ علیہ وسلم فرماتے تھے: ”جب تم میں سے کوئی شخص کسی کام کا ارادہ کرے تو وہ فرض نماز کے علاوہ دو رکعت نفل ادا کرے، پھر یوں کہے: «اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ، وَأَسْأَلُكَ مِنْ فَضْلِكَ الْعَظِيمِ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوبِ، اللَّهُمَّ إِنْ كُنْتَ تَعْلَمُ أَنَّ هَذَا الْأَمْرَ خَيْرٌ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ: عَاجِلِ أَمْرِي وَآجِلِهِ - فَاقْدُرْهُ لِي وَيَسِّرْهُ لِي، ثُمَّ بَارِكْ لِي فِيهِ، وَإِنْ كُنْتَ تَعْلَمُ أَنَّ هَذَا الْأَمْرَ شَرٌّ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ: فِي عَاجِلِ أَمْرِي وَآجِلِهِ - فَاصْرِفْهُ عَنِّي وَاصْرِفْنِي عَنْهُ، وَاقْدُرْ لِيَ الْخَيْرَ حَيْثُ كَانَ، ثُمَّ أَرْضِنِي بِهِ» ”اے اللہ! میں تیرے علم کے ذریعے سے تجھ سے خیر کا طالب ہوں اور تیری قدرت کے ذریعے سے تجھ سے قدرت کا طالب ہوں اور تجھ سے تیرے عظیم فضل کا سوالی ہوں (تیرے عظیم فضل کی وجہ سے تجھ سے سوال کرتا ہوں) کیونکہ تو ہر چیز پر قدرت رکھتا ہے، میں نہیں جانتا۔ تو تمام غیبوں کو بخوبی جاننے والا ہے۔ اے اللہ! اگر تو جانتا ہے کہ یہ کام میرے دین و دنیا اور انجامِ کار کے لحاظ سے... یا آپ صلی اللہ علیہ وسلم نے فرمایا: دنیا و آخرت کے لحاظ سے... بہتر ہے تو اسے میرے لیے مقدر کر دے اور اسے میرے لیے آسان فرما دے، پھر میرے لیے اس میں برکت فرما۔ اور اگر تو جانتا ہے کہ یہ کام میرے دین و دنیا اور انجامِ کار کے لحاظ سے، یا دنیا و آخرت کے لحاظ سے، برا (نقصان دہ) ہے تو اس کام کو مجھ سے دور فرما اور میرا رخ بھی اس سے پھیر دے اور جہاں بھی خیر ہو میرے لیے مقدر فرما۔ اور پھر مجھے اس پر راضی کر دے۔“ آپ صلی اللہ علیہ وسلم نے فرمایا: وہ (دعا میں) اپنے کام کا بھی ذکر کرے۔“ [سنن نسائي/كتاب النكاح/حدیث: 3255]

حضرت ام سلمہ رضی اللہ عنہا سے روایت ہے کہ جب میری عدت ختم ہوگئی تو حضرت ابوبکر رضی اللہ عنہ نے میرے پاس اپنے نکاح کا پیغام بھیجا۔ میں نے قبول نہ کیا، پھر رسول اللہ صلی اللہ علیہ وسلم نے حضرت عمر بن خطاب رضی اللہ عنہ کو اپنے نکاح کا پیغام دے کر بھیجا۔ میں نے کہا: رسول اللہ صلی اللہ علیہ وسلم سے عرض کریں کہ میں بہت غیرت والی عورت ہوں۔ (آپ کی دوسری بیویوں سے نباہ نہ ہوسکے گا۔) پھر میرے (سابقہ خاوند سے میرے) بچے بھی ہیں، نیز اس وقت میرے اولیاء میں سے کوئی یہاں موجود نہیں۔ حضرت عمر بن خطاب رضی اللہ عنہ رسول اللہ صلی اللہ علیہ وسلم کے پاس آئے اور آپ سے یہ باتیں ذکر کیں، آپ صلی اللہ علیہ وسلم نے فرمایا: ”دوبارہ جاؤ اور اسے کہو: تمہارا یہ کہنا کہ ”میں غیرت والی عورت ہوں“ تو میں اللہ تعالیٰ سے دعا کروں گا کہ اللہ تعالیٰ تیری (بے جا) غیرت کو ختم کر دے۔ اور تمہارا یہ کہنا کہ ”میرے بچے ہیں“ تو تجھے ان کی فکر نہیں کرنی چاہیے؛ انہیں خرچہ وغیرہ دیا جائے گا۔ باقی رہی تمہاری یہ بات کہ ”میرے اولیاء میں سے کوئی خاص نہیں“ تو سن لے کہ تیرے اولیاء میں سے کوئی شخص بھی خواہ وہ حاضر ہو یا غائب، اس کام کو ناپسند نہیں کرے گا۔“ میں نے اپنے بیٹے سے کہا: اے عمر! اٹھو اور میرا رسول اللہ صلی اللہ علیہ وسلم سے نکاح کر دو۔ چنانچہ اس نے آپ صلی اللہ علیہ وسلم سے میرا نکاح کر دیا۔ یہ حدیث مختصر بیان کی گئی ہے۔ [سنن نسائي/كتاب النكاح/حدیث: 3256]

حضرت عائشہ رضی اللہ عنہا سے منقول ہے کہ رسول اللہ صلی اللہ علیہ وسلم نے ان سے نکاح فرمایا تو وہ چھ سال کی تھیں اور انہیں اپنے گھر بسایا تو نو سال کی تھیں۔ [سنن نسائي/كتاب النكاح/حدیث: 3257]