حضرت عائشہ رضی اللہ عنہا سے مروی ہے کہ حضرت رفاعہ قرظی رضی اللہ عنہ کی بیوی رسول اللہ صلی اللہ علیہ وسلم کی خدمت میں حاضر ہوئیں، جبکہ حضرت ابوبکر رضی اللہ عنہ بھی آپ صلی اللہ علیہ وسلم کے پاس موجود تھے، وہ کہنے لگیں: اے اللہ کے رسول! میں (پہلے) رفاعہ قرظی کے نکاح میں تھی، لیکن انہوں نے مجھے بتہ طلاق دے دی، میں نے (عدت گزارنے کے بعد) حضرت عبدالرحمن بن زبیر رضی اللہ عنہ سے شادی کر لی، اللہ کی قسم! اے اللہ کے رسول! ان کا عضو تو کپڑے کے اس ان بنے کنارے کی طرح ہے، اس کے ساتھ ہی اس نے اپنی چادر کا ایک کنارہ پکڑ کر دکھا دیا، حضرت خالد بن سعید رضی اللہ عنہ باہر دروازے پر تھے، آپ صلی اللہ علیہ وسلم نے انہیں اندر آنے کی اجازت نہیں دی تھی، وہ کہنے لگے: اے ابوبکر! کیا آپ اس عورت کی بات نہیں سن رہے؟ یہ رسول اللہ صلی اللہ علیہ وسلم کے پاس بھی وہی کچھ کہہ رہی ہے جو کچھ (باہر) کہتی پھرتی ہے، آپ صلی اللہ علیہ وسلم نے فرمایا: ”تو رفاعہ کے نکاح میں جانا چاہتی ہے؟ تو نہیں جا سکتی حتیٰ کہ تو عبدالرحمن بن زبیر سے اور وہ تجھ سے لذتِ جماع حاصل کر لے۔“ [سنن نسائي/كتاب الطلاق/حدیث: 3438]

حضرت حماد بن زید رحمہ اللہ سے منقول ہے کہ میں نے ایوب رحمہ اللہ سے کہا: کیا آپ جانتے ہیں کہ کسی نے «أَمْرُكِ بِيَدِكِ» ”تیرا معاملہ تیرے اختیار میں ہے“ کہنے کی صورت میں اسے تین طلاق کہا ہو؟ سوائے حضرت حسن بصری رحمہ اللہ کے؟ انہوں نے کہا: نہیں، پھر کہنے لگے: یا اللہ! معاف فرمانا۔ (ہاں) مگر وہ حدیث جو مجھے قتادہ رحمہ اللہ نے کثیر مولیٰ ابن سمرہ کے واسطے سے حضرت ابوہریرہ رضی اللہ عنہ کی سند سے بیان کی ہے کہ نبی صلی اللہ علیہ وسلم نے فرمایا: ”(یہ الفاظ کہنا) تین طلاقیں ہیں۔“ (حضرت حماد رحمہ اللہ نے کہا:) میں کثیر سے ملا اور ان سے حدیث کے بارے میں پوچھا تو انہوں نے اس حدیث سے لاعلمی ظاہر کی، پھر میں حضرت قتادہ رحمہ اللہ کے پاس گیا اور ان سے پوری بات ذکر کی تو انہوں نے کہا: کثیر بھول گئے۔ ابو عبدالرحمن (امام نسائی رحمہ اللہ) بیان کرتے ہیں کہ یہ حدیث منکر ہے۔ [سنن نسائي/كتاب الطلاق/حدیث: 3439]

حضرت عائشہ رضی اللہ عنہا سے مروی ہے کہ رفاعہ رضی اللہ عنہ کی (سابقہ) بیوی نے رسول اللہ صلی اللہ علیہ وسلم کے پاس آ کر کہا: مجھے میرے خاوند نے طلاق دی اور طلاق بتہ (تیسری طلاق) دی، میں نے اس کے بعد عبدالرحمن بن زبیر رضی اللہ عنہ سے نکاح کر لیا لیکن اس کے پاس تو کپڑے کے پلو (کنارے) کے سوا کچھ نہیں ہے۔ رسول اللہ صلی اللہ علیہ وسلم ہنس پڑے اور فرمایا: ”شاید تو دوبارہ رفاعہ کے نکاح میں جانا چاہتی ہے؟ تو نہیں جا سکتی حتیٰ کہ وہ تجھ سے (جماع کرے) لطف اندوز ہو اور تو اس سے لطف اندوز ہو۔“ [سنن نسائي/كتاب الطلاق/حدیث: 3440]

حضرت عائشہ رضی اللہ عنہا فرماتی ہیں کہ ایک آدمی نے اپنی بیوی کو تین طلاقیں دے دیں، پھر اس عورت نے کسی اور آدمی سے نکاح کر لیا لیکن اس نے اسے جماع کرنے سے پہلے ہی طلاق دے دی۔ رسول اللہ صلی اللہ علیہ وسلم سے پوچھا گیا: کیا وہ عورت پہلے خاوند کے لیے حلال ہے؟ آپ صلی اللہ علیہ وسلم نے فرمایا: ”نہیں، حتیٰ کہ یہ دوسرا خاوند اس سے (جماع کر کے) لطف اندوز ہو جیسا کہ پہلا خاوند لطف اندوز ہوتا رہا۔“ [سنن نسائي/كتاب الطلاق/حدیث: 3441]

حضرت عبدالرحمن بن عباس رضی اللہ عنہما سے روایت ہے کہ حضرت غُمَیْصَاء یا رمیصاء رضی اللہ عنہا نبی صلی اللہ علیہ وسلم کے پاس آئیں اور اپنے خاوند کی شکایت کرنے لگیں کہ وہ جماع نہیں کر سکتا، اتنے میں اس کا خاوند بھی آگیا اور اس نے کہا: اے اللہ کے رسول! یہ جھوٹ بولتی ہے، میں اس کے ساتھ جماع کرتا ہوں لیکن یہ اپنے پہلے خاوند کے پاس دوبارہ جانا چاہتی ہے، رسول اللہ صلی اللہ علیہ وسلم نے فرمایا: ”اس کے لیے یہ جائز نہیں حتیٰ کہ تو اس سے جماع کرے۔“ [سنن نسائي/كتاب الطلاق/حدیث: 3442]

حضرت ابن عمر رضی اللہ عنہما سے منقول ہے کہ نبی صلی اللہ علیہ وسلم نے اس آدمی کے بارے میں، جو اپنی بیوی کو تین طلاقیں دے دیتا ہے، پھر کوئی دوسرا شخص اس سے نکاح کر لیتا ہے لیکن وہ بھی اسے ہم بستری سے پہلے ہی طلاق دے دیتا ہے اور وہ عورت پہلے خاوند کے ہاں واپس جانا چاہتی ہے، فرمایا: ”وہ نہیں جا سکتی حتیٰ کہ دوسرا خاوند اس سے جماع کرے۔“ [سنن نسائي/كتاب الطلاق/حدیث: 3443]

حضرت ابن عمر رضی اللہ عنہما سے مروی ہے کہ نبی صلی اللہ علیہ وسلم سے اس آدمی کے بارے میں پوچھا گیا جو اپنی بیوی کو تین طلاقیں دے دیتا ہے، پھر کوئی اور آدمی اس سے نکاح کر لیتا ہے، پھر وہ دروازہ بند کر کے پردہ لٹکا لیتا ہے لیکن جماع سے پہلے اسے طلاق دے دیتا ہے۔ آپ نے فرمایا: ”اتنے سے وہ پہلے خاوند کے لیے حلال نہ ہو گی حتیٰ کہ دوسرا خاوند اس سے جماع کرے۔“ ابو عبد الرحمن (امام نسائی) فرماتے ہیں: یہ (سفیان والی سند شعبہ کی مذکورہ سند سے) درستی کے زیادہ لائق ہے (لیکن دونوں کا متن شواہد کی رو سے صحیح ہے)۔ [سنن نسائي/كتاب الطلاق/حدیث: 3444]

حضرت عبداللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے ”جسم میں رنگ بھرنے والی، بھروانے والی، زائد بال ملانے والی اور جسے زائد بال لگائے جائیں، سود کھانے والے اور کھلانے والے، حلالہ کرنے والے اور جس کے لیے حلالہ کیا جائے، ان سب پر لعنت فرمائی ہے“۔ [سنن نسائي/كتاب الطلاق/حدیث: 3445]

اوزاعی رحمہ اللہ کہتے ہیں کہ میں نے امام زہری رحمہ اللہ سے اس عورت کے متعلق پوچھا جس نے رسول اللہ صلی اللہ علیہ وسلم سے پناہ مانگی تھی، تو انہوں نے کہا کہ مجھے حضرت عروہ رحمہ اللہ نے حضرت عائشہ رضی اللہ عنہا سے بیان کیا ہے کہ آپ صلی اللہ علیہ وسلم کی کلابی بیوی جب آپ کے پاس آئی تو کہنے لگی: میں آپ سے اللہ کی پناہ میں آتی ہوں۔ رسول اللہ صلی اللہ علیہ وسلم نے فرمایا: ”تو بہت بڑی ذات کی پناہ میں آئی ہے، لہٰذا اپنے گھر چلی جا۔“ [سنن نسائي/كتاب الطلاق/حدیث: 3446]

حضرت فاطمہ بنت قیس رضی اللہ عنہا بیان کرتی ہیں کہ میرے خاوند نے مجھے طلاق لکھ بھیجی تو میں نے اپنے کپڑے پہنے اور نبی صلی اللہ علیہ وسلم کے پاس حاضر ہوئی۔ آپ صلی اللہ علیہ وسلم نے دریافت فرمایا: ”وہ تجھے کتنی طلاقیں دے چکا ہے؟“ میں نے کہا: تین۔ آپ صلی اللہ علیہ وسلم نے فرمایا: ”پھر تجھے خرچ وغیرہ نہیں ملے گا۔ تو اپنے چچا زاد بھائی ابن ام مکتوم کے گھر عدت گزار، وہ نابینا شخص ہے، تو اس کے ہاں کپڑے بھی اتار سکتی ہے۔ جب تیری عدت پوری ہو جائے تو مجھے اطلاع کرنا۔“ یہ روایت مختصر ہے۔ [سنن نسائي/كتاب الطلاق/حدیث: 3447]