حضرت عبدالرحمن بن سمرہ رضی اللہ عنہ کہتے ہیں کہ رسول اللہ صلی اللہ علیہ وسلم نے مجھ سے فرمایا: ”جب تو کوئی کام کرنے کی قسم کھا لے، پھر تو کوئی اور کام اس سے بہتر سمجھے تو جو بہتر ہے اسے عمل میں لے آ اور اپنی قسم کا کفارہ دے دے۔“ [سنن نسائي/كتاب الأيمان والنذور/حدیث: 3822]

حضرت عمرو بن شعیب کے پردادا محترم (حضرت عبداللہ بن عمرو رضی اللہ عنہما) سے روایت ہے کہ رسول اللہ صلی اللہ علیہ وسلم نے فرمایا: ”جو چیز ملکیت میں نہیں، اس میں نہ نذر مانی جا سکتی ہے، نہ قسم کھائی جا سکتی ہے اور (اسی طرح اللہ تعالیٰ کی) نافرمانی اور قطع رحمی کی نذر اور قسم بھی معتبر نہیں۔“ [سنن نسائي/كتاب الأيمان والنذور/حدیث: 3823]

حضرت ابن عمر رضی اللہ عنہما سے روایت ہے کہ نبی اکرم صلی اللہ علیہ وسلم نے فرمایا: ”جو شخص قسم کھاتے وقت «إِنْ شَاءَ اللّٰهُ» ”اگر اللہ نے چاہا“ کہہ دے، وہ چاہے تو قسم کو پورا کرے اور چاہے تو چھوڑ دے، اسے کوئی گناہ نہیں ہوگا۔“ [سنن نسائي/كتاب الأيمان والنذور/حدیث: 3824]

حضرت عمر بن خطاب رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”بلاشبہ اعمال کا مدار نیتوں پر ہے اور ہر شخص کو وہی ملے گا جس کی اس نے نیت کی، چنانچہ جس شخص کی (نیت) ہجرت (کرتے وقت) اللہ اور اس کے رسول (کی رضا مندی اور حکم کی تعمیل) کے لیے ہوگی تو اس کی ہجرت اللہ اور اس کے رسول کے لیے ہی سمجھی جائے گی اور جس کی ہجرت (کا مقصود) دنیا کا حصول یا کسی عورت سے نکاح وغیرہ تھا تو اس کی ہجرت انہی چیزوں کے لیے سمجھی جائے گی جو اس کا مقصود تھیں۔“ [سنن نسائي/كتاب الأيمان والنذور/حدیث: 3825]

حضرت عائشہ رضی اللہ عنہا سے مروی ہے کہ نبی اکرم صلی اللہ علیہ وسلم (اپنی ایک بیوی) حضرت زینب بنت جحش رضی اللہ عنہا کے ہاں زیادہ دیر ٹھہرے تھے کیونکہ آپ وہاں سے شہد پیتے تھے۔ میں نے اور حضرت حفصہ رضی اللہ عنہا نے آپس میں اتفاق کیا کہ ہم میں سے جس کے پاس نبی اکرم صلی اللہ علیہ وسلم تشریف لائیں تو وہ کہے کہ بلاشبہ میں آپ سے «مَغَافِير» ”مغافیر“ کی بو محسوس کر رہی ہوں، کیا آپ نے مغافیر (گوند) کھائی ہے؟ جب آپ صلی اللہ علیہ وسلم ہم میں سے کسی ایک کے ہاں تشریف لائے تو اس نے یہ لفظ کہہ دیے۔ آپ صلی اللہ علیہ وسلم نے فرمایا: ”نہیں، بلکہ میں نے تو زینب بنت جحش کے ہاں سے شہد پیا ہے، اب دوبارہ ہرگز نہیں پیوں گا۔“ تو پھر یہ آیات نازل ہوئیں: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ [سورة التحريم: 1] ”اے نبی! آپ اس چیز کو کیوں حرام قرار دے رہے ہیں جسے اللہ تعالیٰ نے آپ کے لیے حلال قرار دیا ہے؟“ آگے حضرت عائشہ اور حفصہ رضی اللہ عنہما سے خطاب کرتے ہوئے فرمایا: ﴿إِنْ تَتُوبَا إِلَى اللَّهِ﴾ [سورة التحريم: 4] ”اگر تم اللہ تعالیٰ کے حضور (اپنی غلطی سے) توبہ کرو (تو تمہیں لائق ہے)۔“ جب نبی اکرم صلی اللہ علیہ وسلم نے اپنی ایک بیوی سے راز کی بات کہی، اس میں اشارہ ہے آپ صلی اللہ علیہ وسلم کے فرمان کی طرف کہ ”میں نے تو شہد پیا ہے، (آئندہ نہیں پیوں گا)۔“ [سنن نسائي/كتاب الأيمان والنذور/حدیث: 3826]

حضرت جابر رضی اللہ عنہ سے روایت ہے انہوں نے فرمایا: میں نبی اکرم صلی اللہ علیہ وسلم کے ساتھ آپ کے گھر میں داخل ہوا تو آپ کو روٹی کے ٹکڑے اور سرکہ پیش کیے گئے، آپ نے مجھے فرمایا: ”کھاؤ، سرکہ بہترین سالن ہے۔“ [سنن نسائي/كتاب الأيمان والنذور/حدیث: 3827]

حضرت قیس بن ابی غرزہ رضی اللہ عنہ سے روایت ہے کہ ہمیں (تاجروں کو) دلال کہا جاتا تھا۔ رسول اللہ صلی اللہ علیہ وسلم ہمارے پاس (بازار میں) تشریف لائے۔ ہم خرید و فروخت کر رہے تھے۔ آپ نے ہمارے نام سے بہتر نام ہمارے لیے مقرر فرمایا۔ آپ نے فرمایا: ”اے تاجروں کی جماعت! بیچتے وقت (بسا اوقات بلا قصد) قسم اور جھوٹ صادر ہو جاتے ہیں، لہٰذا تم فروخت کے ساتھ ساتھ صدقہ بھی کیا کرو۔“ [سنن نسائي/كتاب الأيمان والنذور/حدیث: 3828]

حضرت قیس بن ابی غرزہ رضی اللہ عنہ سے روایت ہے، انہوں نے فرمایا: ہم بقیع کے بازار میں خرید و فروخت کیا کرتے تھے۔ رسول اللہ صلی اللہ علیہ وسلم ہمارے پاس تشریف لائے۔ ہمیں اس وقت «سَمَاسِرَةَ» (دلال) کہا جاتا تھا۔ آپ صلی اللہ علیہ وسلم نے فرمایا: «يَا مَعْشَرَ التُّجَّارِ» ”اے تاجروں کی جماعت!“ تو آپ صلی اللہ علیہ وسلم نے ہمارے سابقہ نام سے بہتر نام رکھا۔ پھر فرمایا: «إِنَّ الْبَيْعَ يَحْضُرُهُ اللَّغْوُ وَالْحَلِفُ فَشُوبُوهُ بِالصَّدَقَةِ» ”خرید و فروخت کرتے وقت (بلاقصد) قسم اور جھوٹ صادر ہو جاتے ہیں، لہٰذا ساتھ ساتھ صدقہ بھی کیا کرو۔“ [سنن نسائي/كتاب الأيمان والنذور/حدیث: 3829]

حضرت قیس بن ابی غرزہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے پاس تشریف لائے جبکہ ہم بازار میں (تجارت کررہے) تھے، آپ صلی اللہ علیہ وسلم نے فرمایا: ”اس بازار میں فضول باتوں اور جھوٹ کی آمیزش ہوتی رہتی ہے، لہٰذا صدقہ کرتے رہو۔“ [سنن نسائي/كتاب الأيمان والنذور/حدیث: 3830]

حضرت قیس بن ابی غرزہ رضی اللہ عنہ سے روایت ہے، انہوں نے فرمایا: ہم مدینہ منورہ میں غلے کی خرید و فروخت کیا کرتے تھے اور اپنے آپ کو «سِمْسَار» کہا کرتے تھے، لوگ بھی ہمیں یہی کہتے تھے، رسول اللہ صلی اللہ علیہ وسلم ایک دن ہمارے پاس تشریف لائے، آپ نے ہمیں ہمارے اور لوگوں کے رکھے ہوئے نام سے بہترین نام دیا، آپ نے فرمایا: ”اے تاجروں کی جماعت! تمہارے سودوں میں (بلا قصد و ارادہ) جھوٹ اور قسموں کی ملاوٹ ہوتی ہے، لہٰذا تم اپنے سودوں کے ساتھ ساتھ صدقے کی بھی ملاوٹ کیا کرو۔“ [سنن نسائي/كتاب الأيمان والنذور/حدیث: 3831]