سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے چاندی کی انگوٹھی بنوائی اور اس میں «محمد رسول اللہ» کے الفاظ کندہ کروائے اور فرمایا: ”میں نے چاندی کی انگوٹھی بنوائی ہے، اس میں «محمد رسول اللہ» کا نقش بنوایا ہے۔ تم میں سے کوئی آدمی اپنی انگوٹھی پر یہ الفاظ کندہ نہیں کروا سکتا۔“ [سلسله احاديث صحيحه/المناقب والمثالب/حدیث: 3189]

معاویہ بن سفیان رضی اللہ عنہ سے مروی ہے، رسول اللہ صلی اللہ علیہ وسلم نے فرمایا: ”میں مبلغ ہوں، ہدایت دینے والا اللہ ہے اور میں تقسیم کرنے والا ہوں، عطا کرنے والا اللہ ہے۔ اگر کسی آدمی کو میری جانب سے کوئی چیز حسن رغبت اور اچھے طریقے کے ساتھ مل جاتی ہے تو اس کے لیے اس میں برکت ہو گی اور اگر کسی کو سوئے رغبت اور برے طریقے کے ساتھ کوئی چیز ملتی ہے تو وہ ایسا آدمی ہے جو کھاتا ہے، لیکن سیر نہیں ہوتا۔“ [سلسله احاديث صحيحه/المناقب والمثالب/حدیث: 3190]

سیدنا جفشیش کندی رضی اللہ عنہ کہتے ہیں: میں نے کہا: اے اللہ کے رسول! آپ کن لوگوں سے ہیں؟ آپ صلی اللہ علیہ وسلم نے فرمایا: ”ہم بنونضر بن کنانہ سے ہیں، ہم اپنی ماں پر تہمت لگاتے ہیں نہ اپنے باپ کی نفی کرتے ہیں۔“ [سلسله احاديث صحيحه/المناقب والمثالب/حدیث: 3191]

سیدنا انس بن مالک رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”انبیاء میں سے جس قدر (‏‏‏‏بھاری تعداد میں) لوگوں نے میری تصدیق کی، اتنی کسی کی نہیں کی گئی اور بعض انبیاء تو ایسے بھی گزرے ہیں کہ ان کی امتوں میں سے صرف ایک ایک فرد نے ان کی تصدیق کی تھی۔“ [سلسله احاديث صحيحه/المناقب والمثالب/حدیث: 3192]

سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”ہم سب سے آخری امت ہیں، لیکن سب سے پہلے حساب کتاب ہمارا ہو گا۔ وہاں کہا جائے گا: امت امیہ اور اس کا نبی کہاں ہیں؟ ہم (‏‏‏‏دنیا میں) آخر میں آنے والے ہیں (‏‏‏‏لیکن آخرت میں) سب سے پہلے حساب دینے والے ہوں گے۔“ [سلسله احاديث صحيحه/المناقب والمثالب/حدیث: 3193]

عطا بن یسار، ایک انصاری سے روایت کرتے ہیں کہ سیدنا انس انصاری رضی اللہ عنہ نے رسول اللہ صلی اللہ علیہ وسلم کے زمانے میں روزے کی حالت میں اپنی بیوی کا بوسہ لے لیا، پھر اس نے اپنی بیوی سے کہا کے وہ رسول اللہ صلی الله علیہ و سلم سے یہ مسئلہ دریافت کرے۔ اس نے آپ صلی اللہ علیہ وسلم سے پوچھا: نبی صلی الله علیہ وسلم نے فرمایا: ”(کوئی مضائقہ نہیں) رسول اللہ صلی الله علیہ وسلم خود ایسا کرتے ہیں۔“ اس نے اپنے خاوند پر صورتحال کو واضح کیا، لیکن اس نے کہا: نبی صلی اللہ علیہ وسلم کو بعض مخصوص چیزوں کی رخصت دی جاتی ہے (‏‏‏‏جو عام مومن کے لیے نہیں ہوتی) لہٰذا تو دوبارہ جا اور آپ کے سامنے میرا یہ اشکال پیش کر۔ وہ دوبارہ نبی کریم صلی اللہ علیہ وسلم کے پاس گئی اور کہا: میرا خاوند کہتا ہے کہ نبی کریم صلی اللہ علیہ وسلم کو تو بطور اختصاص بعض چیزوں کی اجازت دے دی جاتی ہے (‏‏‏‏لیکن ہم . . .)؟ آپ صلی اللہ علیہ وسلم نے فرمایا: ”میں تم میں اللہ تعالیٰ سے سب سے زیادہ ڈرنے والا اور اس کی حدود کو سب سے زیادہ جاننے والا ہوں۔“ [سلسله احاديث صحيحه/المناقب والمثالب/حدیث: 3194]

نبی کریم صلی اللہ علیہ وسلم نے فرمایا: ”میں اولاد آدم کا سردار ہوں۔“ یہ حدیث سیدنا ابوہریرہ، سیدنا جابر بن عبداللہ، سیدنا ابوسعید اور سیدنا عبداللہ بن سلام رضی اللہ عنہم سے روایت کی گئی ہے۔ [سلسله احاديث صحيحه/المناقب والمثالب/حدیث: 3195]

سیدنا علی بن ابوطالب رضی اللہ عنہ بیان کرتے ہیں کہ میں مکہ میں رسول اللہ صلی اللہ علیہ وسلم کے ساتھ تھا، ہم مکہ کی ایک جانب نکلے، جو درخت اور پتھر بھی آپ صلی اللہ علیہ وسلم کے سامنے آتا، وہ کہتا: اے اللہ کے رسول! آپ پر سلامتی ہو۔ [سلسله احاديث صحيحه/المناقب والمثالب/حدیث: 3196]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میں عبداللہ کا بیٹا محمد ہوں، میں اللہ کا بندہ اور اس کا رسول ہوں، میں نہیں چاہتا کہ تم لوگ مجھے اس مقام و مرتبہ سے بڑھا چڑھا کر پیش کرو جو اللہ تعالیٰ نے مجھے عطا کیا ہے۔ [سلسله احاديث صحيحه/المناقب والمثالب/حدیث: 3197]

سیدنا انس بن مالک رضی اللہ عنہ سے روایت ہے کہ ایک آدمی نے کہا: اے محمد! اے ہمارے سید! ہمارے سید کے بیٹے! ہم میں سے بہترین! اور ہم میں سے بہترین کے بیٹے! رسول اللہ صلی اللہ علیہ وسلم نے فرمایا: ”لوگو! تقویٰ اختیار کرو، کہیں ایسا نہ ہو کہ شیطان دل موہ لے (‏‏‏‏ایک روایت میں ہے: اپنی درست بات پر پکے رہو، کہیں شیطان کے تابع نہ ہو جاؤ)۔ میں محمد بن عبداللہ ہوں، اللہ کا بندہ اور رسول ہوں، اللہ کی قسم! میں نہیں چاہتا کہ تم لوگ مجھے میرے اس مقام سے بلند کر دو، جو اللہ تعالیٰ نے مجھے عطا کیا ہے۔“ [سلسله احاديث صحيحه/المناقب والمثالب/حدیث: 3198]