حضرت صعب بن جثامہ رضی اللہ عنہ سے روایت ہے، انہوں نے رسول اللہ صلی اللہ علیہ وسلم کی خدمت میں ایک گورخر بطور ہدیہ بھیجا جبکہ آپ صلی اللہ علیہ وسلم ابواء یا ودان مقام میں تشریف فرما تھے۔ آپ صلی اللہ علیہ وسلم نے اسے واپس کر دیا۔ پھر جب آپ صلی اللہ علیہ وسلم نے ان کے چہرے کا رنگ دیکھا تو فرمایا: ”ہم نے یہ تجھے صرف اس لیے واپس کیا ہے کہ ہم حالتِ احرام میں ہیں۔“ [صحيح البخاري/كتاب الهبة/حدیث: 2573]

حضرت عائشہ رضی اللہ عنہا سے روایت ہے کہ لوگ اس بات کا اہتمام کرتے تھے کہ حضرت عائشہ رضی اللہ عنہا کی باری کے دن اپنے تحائف بھیجیں اور اس طریقے سے وہ رسول اللہ صلی اللہ علیہ وسلم کی خوشنودی چاہتے تھے۔ [صحيح البخاري/كتاب الهبة/حدیث: 2574]

حضرت عبداللہ بن عباس رضی اللہ عنہما سے روایت ہے کہ ان کی خالہ ام حفید رضی اللہ عنہا نے نبی کریم صلی اللہ علیہ وسلم کی خدمت میں پنیر، گھی اور سانڈے کا ہدیہ بھیجا۔ آپ صلی اللہ علیہ وسلم نے پنیر اور گھی میں سے تو کچھ کھا لیا لیکن سانڈا ناگواری کی وجہ سے چھوڑ دیا۔ حضرت عبداللہ بن عباس رضی اللہ عنہما فرماتے ہیں کہ سانڈا آپ صلی اللہ علیہ وسلم کے دسترخوان پر کھایا گیا۔ اگر حرام ہوتا تو کم از کم رسول اللہ صلی اللہ علیہ وسلم کے دسترخوان پر اسے نہ کھایا جاتا۔ [صحيح البخاري/كتاب الهبة/حدیث: 2575]

حضرت ابوہریرہ رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کی خدمت میں جب کوئی کھانا لایا جاتا تو اس کے متعلق دریافت فرماتے: ”یہ ہدیہ ہے یا صدقہ؟“ اگر کہا جاتا کہ صدقہ ہے تو آپ اپنے اصحاب سے فرماتے: ”تم کھاؤ“ لیکن خود نہ کھاتے۔ اور اگر کہا جاتا کہ ہدیہ ہے تو آپ صلی اللہ علیہ وسلم ہاتھ بڑھا کر اپنے اصحاب کے ہمراہ اسے تناول فرماتے۔ [صحيح البخاري/كتاب الهبة/حدیث: 2576]

حضرت انس بن مالک رضی اللہ عنہ سے روایت ہے، انہوں نے فرمایا کہ نبی کریم صلی اللہ علیہ وسلم کی خدمت میں گوشت پیش کیا گیا اور بتایا گیا کہ یہ حضرت بریرہ رضی اللہ عنہا پر صدقہ کیا گیا ہے تو آپ صلی اللہ علیہ وسلم نے فرمایا: ”یہ اس کے لیے صدقہ ہے لیکن ہمارے لیے ہدیہ ہے۔“ [صحيح البخاري/كتاب الهبة/حدیث: 2577]

حضرت عائشہ رضی اللہ عنہا سے روایت ہے، انہوں نے حضرت بریرہ رضی اللہ عنہا کو خریدنے کا ارادہ کیا تو ان کے آقاؤں نے یہ شرط لگائی کہ اس کی ولا ان کو حاصل ہوگی۔ نبی کریم صلی اللہ علیہ وسلم سے اس کا ذکر کیا گیا تو نبی کریم صلی اللہ علیہ وسلم نے فرمایا: ”تم خرید کر اسے آزاد کر دو، ولا تو اسی کے لیے ہوتی ہے جو آزاد کرے۔“ ایک دفعہ یوں ہوا کہ حضرت بریرہ رضی اللہ عنہا کو صدقے کا گوشت ملا تو نبی کریم صلی اللہ علیہ وسلم نے فرمایا: ”یہ کیا ہے؟“ میں نے عرض کیا: یہ بریرہ کو بطور صدقہ ملا ہے۔ تب آپ صلی اللہ علیہ وسلم نے فرمایا: ”یہ اس کے لیے صدقہ ہے اور ہمارے لیے ہدیہ ہے۔“ نیز جب وہ آزاد ہوئی تو خاوند کے معاملے میں اسے اختیار دیا گیا۔ (راوی حدیث) عبدالرحمن نے کہا: اس کا خاوند آزاد تھا یا غلام۔ شعبہ کہتے ہیں: میں نے عبدالرحمن سے اس کے خاوند کے متعلق دریافت کیا تو انہوں نے کہا: مجھے معلوم نہیں کہ وہ آزاد تھا یا غلام۔ [صحيح البخاري/كتاب الهبة/حدیث: 2578]

حضرت ام عطیہ رضی اللہ عنہا سے روایت ہے، انہوں نے کہا: نبی کریم صلی اللہ علیہ وسلم حضرت عائشہ رضی اللہ عنہا کے پاس تشریف لائے تو پوچھا: ”تمہارے پاس کچھ (کھانے کو) ہے؟“ انہوں نے کہا: کچھ نہیں، صرف بکری کا گوشت ہے جو ام عطیہ رضی اللہ عنہا نے بھیجا ہے اور یہ اس بکری کا ہے جو انہیں صدقے میں سے دی گئی تھی۔ آپ صلی اللہ علیہ وسلم نے فرمایا: ”صدقہ اپنے مقام پر پہنچ چکا ہے۔“ [صحيح البخاري/كتاب الهبة/حدیث: 2579]

حضرت عائشہ رضی اللہ عنہا سے روایت ہے، انہوں نے فرمایا: لوگ اپنے ہدایا بھیجتے وقت میری باری کے دن کا خیال رکھتے تھے۔ حضرت ام سلمہ رضی اللہ عنہا کا بیان ہے کہ میری سوکنوں نے اکٹھے ہو کر آپ صلی اللہ علیہ وسلم سے (بطور شکایت) ذکر کیا تو آپ صلی اللہ علیہ وسلم نے ان کو جواب ہی نہ دیا۔ [صحيح البخاري/كتاب الهبة/حدیث: 2580]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کی بیویوں کے دو گروپ تھے: ایک گروپ میں حضرت عائشہ رضی اللہ عنہا، حضرت حفصہ رضی اللہ عنہا، حضرت صفیہ رضی اللہ عنہا، حضرت سودہ رضی اللہ عنہا تھیں، جبکہ دوسرے گروپ میں حضرت ام سلمہ رضی اللہ عنہا کے ساتھ باقی تمام ازواج مطہرات رضوان اللہ علیہن اجمعین تھیں۔ صحابہ کرام رضی اللہ عنہم اجمعین حضرت عائشہ رضی اللہ عنہا کے ساتھ رسول اللہ صلی اللہ علیہ وسلم کی (والہانہ) محبت کو جانتے تھے، اس لیے جب کسی کے پاس تحفہ ہوتا اور وہ اسے رسول اللہ صلی اللہ علیہ وسلم کی خدمت میں پیش کرنا چاہتا (تو) اس میں تاخیر کرتا حتیٰ کہ جب رسول اللہ صلی اللہ علیہ وسلم حضرت عائشہ رضی اللہ عنہا کے گھر میں تشریف فرما ہوتے تو ہدیہ بھیجنے والا رسول اللہ صلی اللہ علیہ وسلم کے لیے حضرت عائشہ رضی اللہ عنہا کے گھر میں ہدیہ بھیجتا۔ یہ صورت حال دیکھ کر حضرت ام سلمہ رضی اللہ عنہا کے گروپ نے مشورہ کر کے ان سے کہا کہ آپ رسول اللہ صلی اللہ علیہ وسلم سے بات کریں کہ وہ لوگوں سے کہیں کہ جس کسی نے رسول اللہ صلی اللہ علیہ وسلم کی خدمت میں تحفہ بھیجنا ہو تو آپ اپنی جس بیوی کے ہاں مقیم ہوں وہیں تحفہ بھیجا کرے۔ ان کے کہنے کے مطابق حضرت ام سلمہ رضی اللہ عنہا نے آپ سے گفتگو کی لیکن آپ نے کوئی جواب نہ دیا۔ جب اس گروپ نے حضرت ام سلمہ رضی اللہ عنہا سے پوچھا تو انہوں نے کہا: رسول اللہ صلی اللہ علیہ وسلم نے مجھے کوئی جواب ہی نہیں دیا۔ انہوں نے ان سے کہا: آپ پھر بات کریں۔ وہ بیان کرتی ہیں کہ جب باری کے دن آپ تشریف لائے تو انہوں نے پھر بات چھیڑی لیکن آپ نے کوئی جواب نہ دیا۔ جب امہات المومنین رضوان اللہ علیہن اجمعین نے حضرت ام سلمہ رضی اللہ عنہا سے پوچھا تو انہوں نے بتایا: آپ نے مجھے کوئی جواب نہیں دیا۔ ازواج مطہرات نے ان سے کہا: تم یہ بات کرتی رہو جب تک آپ جواب نہیں دیتے۔ پھر جب ام سلمہ رضی اللہ عنہا کی باری آئی تو انہوں نے آپ سے عرض کیا، تب آپ نے فرمایا: ”تم عائشہ کے بارے میں مجھے اذیت نہ دو کیونکہ میں جب عائشہ کے علاوہ کسی اور بیوی کے کپڑوں میں ہوتا ہوں تو مجھ پر وحی نازل نہیں ہوتی۔“ حضرت ام سلمہ رضی اللہ عنہا کہتی ہیں کہ میں نے عرض کیا: اللہ کے رسول صلی اللہ علیہ وسلم ! میں آپ کو اذیت پہنچانے سے توبہ کرتی ہوں۔ پھر امہات المومنین رضوان اللہ علیہن اجمعین نے رسول اللہ صلی اللہ علیہ وسلم کی صاحبزادی حضرت فاطمہ رضی اللہ عنہا کو بلایا اور انہیں رسول اللہ صلی اللہ علیہ وسلم کی خدمت میں یہ پیغام دے کر بھیجا کہ آپ کی ازواج آپ کو اللہ کی قسم دیتی ہیں کہ آپ حضرت ابوبکر رضی اللہ عنہ کی بیٹی کے متعلق انصاف کریں، چنانچہ حضرت فاطمہ رضی اللہ عنہا نے بھی جا کر آپ سے بات چیت کی تو آپ نے فرمایا: ”دختر من! کیا تو اس سے محبت نہیں کرتی جس سے میں محبت کرتا ہوں؟“ حضرت فاطمہ رضی اللہ عنہا نے عرض کیا: کیوں نہیں۔ اس کے بعد وہ واپس آ گئیں اور ازواج مطہرات کو جواب سے آگاہ کیا۔ انہوں نے کہا: دوبارہ جاؤ لیکن حضرت فاطمہ رضی اللہ عنہا نے دوبارہ جانے سے انکار کر دیا۔ آخر انہوں نے حضرت زینب بنت جحش رضی اللہ عنہا کو بھیجا۔ وہ آئیں تو سخت گفتگو کرنے لگیں اور کہا کہ آپ کی ازواج ابن ابوقحافہ کی بیٹی کے بارے میں اللہ کی قسم دے کر انصاف مانگتی ہیں، ان کی آواز بلند ہوئی یہاں تک کہ حضرت عائشہ رضی اللہ عنہا سے لے دے شروع کر دی جو وہاں بیٹھی ہوئی تھیں بلکہ انہیں برا بھلا کہنا شروع کر دیا۔ رسول اللہ صلی اللہ علیہ وسلم حضرت عائشہ رضی اللہ عنہا کی طرف دیکھنے لگے کہ وہ کچھ جواب دیتی ہیں یا نہیں؟ چنانچہ حضرت عائشہ رضی اللہ عنہا بولیں اور حضرت زینب رضی اللہ عنہا کو جواب دیتی رہیں یہاں تک کہ انہیں چپ کرا دیا۔ نبی کریم صلی اللہ علیہ وسلم نے حضرت عائشہ رضی اللہ عنہا کی طرف دیکھ کر فرمایا: ”آخر یہ ابوبکر کی بیٹی ہیں۔“ امام بخاری رحمہ اللہ کہتے ہیں: آخر کلام، یعنی حضرت فاطمہ رضی اللہ عنہا کا قصہ ہشام بن عروہ نے ایک اور شخص سے بھی بیان کیا ہے، اس نے امام زہری رحمہ اللہ سے، انہوں نے محمد بن عبدالرحمان سے اسے روایت کیا ہے۔ ابو مروان نے ہشام سے، انہوں نے عروہ سے روایت کیا کہ لوگ اپنے تحائف بھیجنے میں حضرت عائشہ رضی اللہ عنہا کی باری کے منتظر رہتے تھے۔ ایک دوسری سند سے مروی ہے کہ حضرت عائشہ رضی اللہ عنہا نے فرمایا: میں نبی کریم صلی اللہ علیہ وسلم کے پاس تھی جب حضرت فاطمہ رضی اللہ عنہا نے اجازت طلب کی۔ [صحيح البخاري/كتاب الهبة/حدیث: 2581]

عزرہ بن ثابت انصاری سے روایت ہے، انہوں نے کہا: میں ثمامہ بن عبداللہ کے پاس گیا تو انہوں نے مجھے خوشبو کا تحفہ دیا اور کہا کہ حضرت انس رضی اللہ عنہ خوشبو رد نہیں کرتے تھے۔ انہوں نے حضرت انس رضی اللہ عنہ کے حوالے سے بیان کیا کہ نبی کریم صلی اللہ علیہ وسلم ”خوشبو واپس نہیں کرتے تھے۔“ [صحيح البخاري/كتاب الهبة/حدیث: 2582]