حضرت عائشہ رضی اللہ عنہا سے روایت ہے کہ ”حضرت فاطمہ رضی اللہ عنہا نے حضرت ابوبکر رضی اللہ عنہ کی طرف پیغام بھیجا جس کے ذریعے سے وہ نبی کریم صلی اللہ علیہ وسلم کے ان صدقات کا مطالبہ کرتی تھیں جو مدینہ طیبہ میں اور فدک میں تھے، اسی طرح جو خیبر کے خمس سے باقی بچ گیا تھا۔“ [صحيح البخاري/كتاب فضائل الصحابة/حدیث: 3711]

حضرت ابوبکر صدیق رضی اللہ عنہ نے کہا کہ رسول اللہ صلی اللہ علیہ وسلم کا ارشادِ گرامی ہے: ”ہمارے (ترکہ میں) وراثت جاری نہیں ہوتی، ہم جو کچھ چھوڑ جاتے ہیں وہ صدقہ ہوتا ہے، البتہ آلِ محمد کے اخراجات اسی مال سے پورے کیے جائیں، خورد و نوش سے زیادہ ان کا کوئی حق نہیں ہے۔“ اللہ کی قسم! رسول اللہ صلی اللہ علیہ وسلم کے صدقات، جو نبی کریم صلی اللہ علیہ وسلم کے زمانۂ مبارک میں ہوا کرتے تھے، میں ان میں کوئی تبدیلی نہیں کروں گا بلکہ ان میں وہ نظام جاری رکھوں گا جو رسول اللہ صلی اللہ علیہ وسلم نے قائم فرمایا تھا۔ اس کے بعد حضرت علی رضی اللہ عنہ آپ کے ہاں آئے اور کہنے لگے: ”ابوبکر! ہم آپ کے مقام اور مرتبے کا اعتراف کرتے ہیں“، پھر انہوں نے رسول اللہ صلی اللہ علیہ وسلم سے اپنی قرابت اور حق کا ذکر کیا۔ حضرت ابوبکر صدیق رضی اللہ عنہ نے اپنی گفتگو جاری رکھتے ہوئے فرمایا: ”اس ذات کی قسم جس کے ہاتھ میں میری جان ہے! رسول اللہ صلی اللہ علیہ وسلم کے رشتہ داروں سے اچھا سلوک کرنا مجھے اپنے قرابت داروں کے ساتھ بہتر سلوک سے زیادہ محبوب ہے۔“ [صحيح البخاري/كتاب فضائل الصحابة/حدیث: 3712]

حضرت ابن عمر رضی اللہ عنہما سے روایت ہے کہ حضرت ابوبکر رضی اللہ عنہ نے فرمایا: ”محمد صلی اللہ علیہ وسلم کا آپ کے اہل بیت کے بارے میں خاص خیال رکھو، یعنی بہرصورت ان کا احترام بجا لاؤ۔“ [صحيح البخاري/كتاب فضائل الصحابة/حدیث: 3713]

حضرت مسور بن مخرمہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”فاطمہ رضی اللہ عنہا میرا جگر گوشہ ہے، اس لیے جس نے اسے ناراض کیا اس نے مجھے ناراض کیا۔“ [صحيح البخاري/كتاب فضائل الصحابة/حدیث: 3714]

حضرت عائشہ رضی اللہ عنہا سے روایت ہے، انہوں نے کہا کہ ”نبی کریم صلی اللہ علیہ وسلم نے اپنی لختِ جگر حضرت فاطمہ رضی اللہ عنہا کو اس بیماری کے موقع پر اپنے پاس بلایا جس میں آپ صلی اللہ علیہ وسلم نے وفات پائی، آپ صلی اللہ علیہ وسلم نے ان سے کوئی خفیہ بات کی تو وہ رونے لگیں۔ پھر آپ صلی اللہ علیہ وسلم نے انہیں بلایا اور ان سے کوئی آہستہ بات کی تو وہ ہنسنے لگیں۔“ حضرت عائشہ رضی اللہ عنہا فرماتی ہیں کہ ”میں نے حضرت فاطمہ رضی اللہ عنہا سے اس کے متعلق دریافت کیا۔“ [صحيح البخاري/كتاب فضائل الصحابة/حدیث: 3715]

انہوں نے (حضرت فاطمہ رضی اللہ عنہا نے) بتایا: ”مجھ سے نبی کریم صلی اللہ علیہ وسلم نے آہستہ بات کی تھی کہ آپ اس بیماری میں وفات پا جائیں گے“ تو میں اس پر رونے لگی۔ پھر آپ صلی اللہ علیہ وسلم نے مجھ سے دوبارہ آہستہ گفتگو فرمائی کہ ”آپ کے اہل بیت میں سے میں سب سے پہلے آپ سے ملاقات کروں گی“ تو میں اس پر ہنس پڑی۔ [صحيح البخاري/كتاب فضائل الصحابة/حدیث: 3716]

حضرت مروان بن حکم رضی اللہ عنہ سے روایت ہے، انہوں نے کہا کہ جس سال نکسیر پھوٹنے کی وبا پھیلی تو حضرت عثمان رضی اللہ عنہ کی اس قدر نکسیر پھوٹی کہ انہیں حج سے اس مرض نے روک دیا، انہوں نے وصیت کر دی۔ ان کی خدمت میں ایک قریشی صاحب آئے اور عرض کیا: ”آپ کسی کو اپنا خلیفہ بنا دیں۔“ حضرت عثمان رضی اللہ عنہ نے پوچھا: ”کیا لوگوں کی یہ خواہش ہے؟“ اس نے کہا: ”ہاں۔“ آپ نے پوچھا: ”میں کس کو خلیفہ نامزد کروں؟“ اس پر وہ خاموش ہو گئے۔ اس کے بعد کوئی دوسرے صاحب آئے۔ میرا خیال ہے کہ وہ حارث تھے۔ انہوں نے بھی یہی کہا کہ ”آپ کسی کو خلیفہ نامزد کریں۔“ آپ نے پوچھا: ”کیا یہ سب لوگوں کی رائے ہے؟“ اس نے کہا: ”جی ہاں۔“ آپ نے پوچھا: ”وہ کون ہو سکتا ہے؟“ اس پر وہ خاموش ہو گیا تو آپ نے فرمایا: ”غالباً لوگوں کا حضرت زبیر رضی اللہ عنہ کی طرف رجحان ہو گا؟“ اس نے کہا: ”جی ہاں۔“ پھر آپ نے فرمایا: ”مجھے اس ذات کی قسم جس کے ہاتھ میں میری جان ہے! میرے علم کے مطابق بھی وہ ان سب سے بہتر ہیں، بلاشبہ وہ رسول اللہ صلی اللہ علیہ وسلم کو بھی ان سب سے زیادہ محبوب تھے۔“ [صحيح البخاري/كتاب فضائل الصحابة/حدیث: 3717]

حضرت مروان بن حکم رضی اللہ عنہ سے روایت ہے، انہوں نے کہا: ”میں حضرت عثمان رضی اللہ عنہ کی خدمت میں موجود تھا۔ ایک شخص نے ان کی خدمت میں حاضر ہو کر عرض کی: ”آپ کسی کو اپنا خلیفہ نامزد کریں۔“ آپ نے فرمایا: ”کیا اس کی خواہش کی جا رہی ہے؟“ اس نے کہا: ”جی ہاں، حضرت زبیر رضی اللہ عنہ کی طرف لوگوں کا رجحان ہے۔“ حضرت عثمان رضی اللہ عنہ نے فرمایا: ”اللہ کی قسم! تم سب جانتے ہو کہ وہ تم میں اس منصب کے لیے بہتر اور لائق ہیں۔“ آپ نے یہ بات تین مرتبہ دہرائی۔“ [صحيح البخاري/كتاب فضائل الصحابة/حدیث: 3718]

حضرت جابر رضی اللہ عنہ سے روایت ہے، انہوں نے کہا کہ نبی کریم صلی اللہ علیہ وسلم نے فرمایا: ”بلاشبہ ہر نبی کے حواری ہوتے ہیں اور میرے حواری حضرت زبیر بن عوام رضی اللہ عنہ ہیں۔“ [صحيح البخاري/كتاب فضائل الصحابة/حدیث: 3719]