حضرت عبداللہ بن زبیر رضی اللہ عنہ سے روایت ہے، انہوں نے فرمایا کہ غزوہ احزاب کے وقت مجھے اور حضرت عمر بن ابوسلمہ رضی اللہ عنہ کو (کمسن ہونے کی وجہ سے) عورتوں میں چھوڑ دیا گیا۔ پھر میں نے جو نظر دوڑائی تو دیکھا کہ حضرت زبیر بن عوام رضی اللہ عنہ اپنے گھوڑے پر سوار ہیں اور دو یا تین بار بنو قریظہ کی طرف گئے ہیں، پھر واپس آئے ہیں۔ جب اختتامِ جنگ پر میں واپس آیا تو میں نے کہا: ”ابوجان! میں نے آپ کو دیکھا کہ بار بار ادھر آتے جاتے تھے؟“ انہوں نے فرمایا: ”بیٹا! کیا تو نے مجھے دیکھا تھا؟“ میں نے عرض کیا: ”جی ہاں۔“ انہوں نے وضاحت فرمائی کہ رسول اللہ صلی اللہ علیہ وسلم نے فرمایا: ”کوئی ایسا ہے جو بنو قریظہ کے پاس جائے اور میرے پاس ان کی خبر لائے؟“ چنانچہ میں اس مہم کے لیے گیا؛ پھر جب میں واپس آیا تو رسول اللہ صلی اللہ علیہ وسلم نے اپنے ماں باپ یکجا جمع کر کے فرمایا: «فِدَاكَ أَبِي وَأُمِّي» ”میرے ماں باپ تم پر فدا ہوں۔“ [صحيح البخاري/كتاب فضائل الصحابة/حدیث: 3720]

حضرت عروہ بن زبیر رضی اللہ عنہ سے روایت ہے کہ یرموک کے دن نبی کریم صلی اللہ علیہ وسلم کے صحابہ کرام رضی اللہ عنہم نے حضرت زبیر رضی اللہ عنہ سے کہا: ”آپ حملہ کیوں نہیں کرتے تاکہ آپ کے ساتھ مل کر ہم بھی حملہ کریں؟“ چنانچہ حضرت زبیر رضی اللہ عنہ نے ان رومیوں پر حملہ کیا تو اس موقع پر کفار نے دو کاری زخم آپ کے شانے پر لگائے، ان دونوں کے درمیان وہ زخم تھا جو بدر کے موقع پر آپ کو لگا تھا۔ حضرت عروہ رضی اللہ عنہ کہتے ہیں کہ: ”میں بچپن میں ان زخموں کے اندر اپنی انگلیاں داخل کرکے کھیلا کرتا تھا۔“ [صحيح البخاري/كتاب فضائل الصحابة/حدیث: 3721]

حضرت ابوعثمان رضی اللہ عنہ سے روایت ہے، انہوں نے کہا کہ ”بعض ان غزوات کے وقت جن میں خود رسول اللہ صلی اللہ علیہ وسلم نے شمولیت کی، نبی کریم صلی اللہ علیہ وسلم کے ہمراہ حضرت طلحہ رضی اللہ عنہ اور حضرت سعد رضی اللہ عنہ کے علاوہ اور کوئی باقی نہیں رہا تھا۔“ یہ بات خود ان کی بیان کردہ حدیث میں ہے۔ [صحيح البخاري/كتاب فضائل الصحابة/حدیث: 3722]

حضرت ابوعثمان رحمہ اللہ سے روایت ہے، انہوں نے کہا: ”بعض ان غزوات کے وقت جن میں خود رسول اللہ صلی اللہ علیہ وسلم نے شمولیت کی، نبی کریم صلی اللہ علیہ وسلم کے ہمراہ حضرت طلحہ رضی اللہ عنہ اور حضرت سعد رضی اللہ عنہ کے علاوہ اور کوئی باقی نہیں رہا تھا۔“ یہ بات خود ان کی بیان کردہ حدیث میں ہے۔ [صحيح البخاري/كتاب فضائل الصحابة/حدیث: 3723]

حضرت قیس بن ابوحازم رحمہ اللہ سے روایت ہے، انہوں نے کہا: ”میں نے حضرت طلحہ رضی اللہ عنہ کا وہ ہاتھ دیکھا جو شل ہو چکا تھا، جس کے ذریعے سے وہ نبی کریم صلی اللہ علیہ وسلم کی حفاظت کرتے رہے تھے۔“ [صحيح البخاري/كتاب فضائل الصحابة/حدیث: 3724]

حضرت سعد بن ابی وقاص رضی اللہ عنہ سے روایت ہے، انہوں نے فرمایا: ”احد کے دن نبی کریم صلی اللہ علیہ وسلم نے میرے لیے اپنے ماں باپ دونوں جمع کر دیے تھے۔“ [صحيح البخاري/كتاب فضائل الصحابة/حدیث: 3725]

حضرت سعد بن ابی وقاص رضی اللہ عنہ سے روایت ہے، انہوں نے فرمایا: ”میں نے اپنے آپ کو دیکھا کہ میں اسلام کی ایک تہائی تھا۔“ [صحيح البخاري/كتاب فضائل الصحابة/حدیث: 3726]

حضرت سعد بن ابی وقاص رضی اللہ عنہ سے روایت ہے، انہوں نے فرمایا: ”کوئی بھی مسلمان نہیں ہوا مگر اسی روز جس میں میں نے اسلام قبول کیا، اور میں سات روز تک اسی حالت میں رہا کہ میں اسلام کا تیسرا فرد تھا۔“ ابواسامہ نے اس روایت کو بیان کرنے میں ابن ابی زائدہ کی متابعت کی ہے۔ [صحيح البخاري/كتاب فضائل الصحابة/حدیث: 3727]