حضرت ابوقلابہ رحمہ اللہ سے روایت ہے کہ وہ حضرت عمر بن عبدالعزیز رحمہ اللہ کے پیچھے بیٹھے ہوئے تھے تو مجلس میں قسامت کا ذکر آ گیا۔ لوگوں نے کہا: ”قسامت میں قصاص ہوتا ہے۔ آپ سے پہلے خلفاء نے بھی اس میں قصاص لیا ہے۔“ تب حضرت عمر بن عبدالعزیز رحمہ اللہ ابوقلابہ کی طرف متوجہ ہوئے جبکہ وہ ان کے پیچھے بیٹھے ہوئے تھے۔ انہوں نے پوچھا: ”عبداللہ بن زید! تمہاری اس کے متعلق کیا رائے ہے؟“ یا یوں کہا: ”اے ابوقلابہ! آپ اس کے متعلق کیا کہتے ہیں؟“ میں نے عرض کی: ”مجھے تو کوئی ایسی صورت معلوم نہیں کہ اسلام میں کسی کا قتل جائز ہو، سوائے اس شخص کے جو شادی شدہ ہونے کے با وجود زنا کرے یا کسی کو ناحق قتل کرے یا اللہ اور اس کے رسول صلی اللہ علیہ وسلم کی مخالفت کرتے ہوئے مرتد ہو جائے۔“ اس پر حضرت عنبسہ رحمہ اللہ نے کہا: ”ہم سے تو حضرت انس رضی اللہ عنہ نے ایسی ایسی حدیث بیان کی تھی۔“ میں نے کہا: ”مجھ سے بھی انہوں نے یہ حدیث بیان کی تھی کہ کچھ لوگ نبی صلی اللہ علیہ وسلم کی خدمت میں حاضر ہوئے اور اسلام پر بیعت کرنے کے بعد انہوں نے آپ صلی اللہ علیہ وسلم سے عرض کی: ہمیں اس شہر (مدینہ طیبہ) کی آب و ہوا موافق نہیں آئی۔ آپ صلی اللہ علیہ وسلم نے فرمایا: ”ہمارے یہ اونٹ چرنے کے لیے باہر جا رہے ہیں تم بھی ان کے ساتھ وہاں چلے جاؤ۔ ان کا دودھ اور پیشاب پیو۔“ چنانچہ وہ لوگ اونٹوں کے ساتھ چلے گئے، وہاں ان کا دودھ اور پیشاب پیا تو وہ تندرست ہو گئے۔ اس کے بعد انہوں نے چرواہے پر حملہ کیا، اسے قتل کر کے اونٹوں کو ہانک کر لے گئے۔ اب ایسے لوگوں سے قصاص لینے میں کیا تامل ہو سکتا تھا؟ انہوں نے ایک شخص کو قتل کیا، اللہ اور اس کے رسول کے خلاف بغاوت کی، پھر رسول اللہ صلی اللہ علیہ وسلم کو خوفزدہ کرنے کی کوشش کی۔“ حضرت عنبسہ رحمہ اللہ نے اس پر «سُبْحَانَ اللّٰهِ» ”اللہ پاک ہے“ کہا۔ میں نے کہا: ”کیا تم مجھے جھٹلانا چاہتے ہو؟“ انہوں نے کہا: ”ایسا نہیں ہے۔ یہی حدیث حضرت انس رضی اللہ عنہ نے مجھ سے بھی بیان کی تھی (لیکن میں نے اس لیے تعجب کا اظہار کیا کہ تمہیں حدیث یاد رہتی ہے)۔“ راوی نے کہا کہ حضرت عنبسہ رحمہ اللہ نے فرمایا: ”اے اہل شام! جب تک تمہارے ہاں ابوقلابہ یا اس جیسے عالم موجود رہیں گے تم ہمیشہ اچھے رہو گے۔“ [صحيح البخاري/كتاب تفسير القرآن/حدیث: 4610]

حضرت انس بن مالک رضی اللہ عنہ سے روایت ہے، انہوں نے کہا: ان کی پھوپھی حضرت ربیع بنت نضر رضی اللہ عنہا نے انصار کی ایک لڑکی کا سامنے والا دانت توڑ دیا۔ لڑکی والوں نے قصاص کا مطالبہ کیا اور اس غرض سے نبی صلی اللہ علیہ وسلم کی خدمت میں حاضر ہوئے۔ نبی صلی اللہ علیہ وسلم نے بھی قصاص کا حکم دیا تو حضرت انس بن مالک کے چچا حضرت انس بن نضر رضی اللہ عنہ نے کہا: ”اے اللہ کے رسول! نہیں۔ اللہ کی قسم! اس کا دانت نہیں توڑا جائے گا۔“ رسول اللہ صلی اللہ علیہ وسلم نے فرمایا: ”اے انس! اللہ کی کتاب میں قصاص ہی ہے۔“ اس دوران میں لڑکی والے معافی پر راضی ہو گئے اور انہوں نے دیت قبول کر لی۔ رسول اللہ صلی اللہ علیہ وسلم نے فرمایا: ”اللہ کے بندوں میں سے کچھ ایسے بھی ہوتے ہیں کہ اگر وہ اللہ کا نام لے کر قسم اٹھا لیں تو اللہ تعالیٰ ان کی قسم کو ضرور سچا کر دیتا ہے۔“ [صحيح البخاري/كتاب تفسير القرآن/حدیث: 4611]

حضرت عائشہ رضی اللہ عنہا سے روایت ہے، انہوں نے فرمایا: ”جو شخص بھی تم سے یہ کہے کہ اللہ تعالیٰ نے حضرت محمد صلی اللہ علیہ وسلم پر جو کچھ نازل کیا تھا، آپ نے اس میں سے کچھ چھپا لیا تھا تو اس نے یقیناً جھوٹ بولا ہے۔“ اللہ تعالیٰ نے خود فرمایا ہے: ﴿يَا أَيُّهَا الرَّسُولُ بَلِّغْ مَا أُنْزِلَ إِلَيْكَ مِنْ رَبِّكَ﴾ [سورة المائدة: 67] ”اے پیغمبر! جو کچھ تمہارے رب کی طرف سے تمہاری طرف نازل کیا گیا ہے، اسے لوگوں تک پہنچا دو۔“ [صحيح البخاري/كتاب تفسير القرآن/حدیث: 4612]

حضرت عائشہ رضی اللہ عنہا سے روایت ہے کہ درج ذیل آیت کریمہ ﴿لَا يُؤَاخِذُكُمُ اللَّهُ بِاللَّغْوِ فِي أَيْمَانِكُمْ﴾ [سورة البقرة: 225] ”اللہ تعالیٰ تم سے تمہاری فضول قسموں پر مؤاخذہ نہیں کرے گا۔“ کسی کے اس طرح قسم کھانے کے بارے میں نازل ہوئی تھی: «لَا وَاللَّهِ، وَبَلَى وَاللَّهِ» ”نہیں! اللہ کی قسم، ہاں! اللہ کی قسم۔“ [صحيح البخاري/كتاب تفسير القرآن/حدیث: 4613]

حضرت عائشہ رضی اللہ عنہا ہی سے روایت ہے کہ ان کے والد گرامی اپنی قسم کی خلاف ورزی نہیں کرتے تھے، لیکن جب اللہ تعالیٰ نے کفارہ قسم کا حکم نازل فرمایا تو حضرت ابوبکر رضی اللہ عنہ نے کہا: ”اب اگر قسم کے علاوہ کوئی دوسری چیز مجھے اس سے بہتر معلوم ہوتی ہے تو میں اللہ کی دی ہوئی رخصت پر عمل کرتا ہوں اور وہی کام کرتا ہوں جو بہتر ہوتا ہے۔“ [صحيح البخاري/كتاب تفسير القرآن/حدیث: 4614]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”ہم نبی صلی اللہ علیہ وسلم کے ہمراہ جہاد پر جاتے تھے اور ہمارے ساتھ عورتیں نہیں ہوا کرتی تھیں۔ ہم نے کہا کہ ”ایسے حالات میں ہم خود کو خصی نہ کر لیں؟“ لیکن نبی صلی اللہ علیہ وسلم نے ہمیں اس سے منع کر دیا، اس کے بعد آپ نے ہمیں اس امر کی اجازت دی کہ ہم کسی عورت سے کپڑے کے عوض شادی کر لیں۔ پھر آپ نے تائید کے طور پر یہ آیت پڑھی: ﴿يَا أَيُّهَا الَّذِينَ آمَنُوا لَا تُحَرِّمُوا طَيِّبَاتِ مَا أَحَلَّ اللَّهُ لَكُمْ﴾ [سورة المائدة: 87] ”اے ایمان والو! تم خود پر ان پاکیزہ چیزوں کو حرام نہ کرو جنہیں اللہ تعالیٰ نے تمہارے لیے حلال کیا ہے۔““ [صحيح البخاري/كتاب تفسير القرآن/حدیث: 4615]

حضرت ابن عمر رضی اللہ عنہما سے روایت ہے، انہوں نے فرمایا: ”شراب کی حرمت نازل ہوئی تو مدینہ طیبہ میں اس وقت پانچ قسم کی شراب استعمال ہوتی تھی لیکن انگوری شراب کا استعمال نہیں ہوتا تھا۔“ [صحيح البخاري/كتاب تفسير القرآن/حدیث: 4616]

حضرت انس رضی اللہ عنہ سے روایت ہے، انہوں نے کہا: ”ہم لوگ تمہاری تیار کردہ فضیخ نامی شراب کے علاوہ کوئی دوسری شراب استعمال نہیں کرتے تھے۔ یہ نام ”فضیخ“ تم نے خود ہی تجویز کیا ہے۔ میں کھڑا حضرت ابوطلحہ رضی اللہ عنہ کو شراب پلا رہا تھا اور فلاں، فلاں کو بھی، اس دوران میں ایک صاحب آئے اور انہوں نے کہا: ”کیا تمہیں کچھ خبر بھی ہے؟“ لوگوں نے پوچھا: ”کیا بات ہے؟“ اس نے کہا: ”شراب کو حرام کر دیا گیا ہے۔“ شراب پینے والوں نے فوراً کہا: ”اے انس! اب ان شراب کے مٹکوں کو بہا دو۔“ انہوں نے اس آدمی کی اطلاع کے بعد ایک قطرہ بھی نہ طلب کیا اور نہ اسے استعمال ہی کیا۔“ [صحيح البخاري/كتاب تفسير القرآن/حدیث: 4617]