حضرت ابو حازم سے روایت ہے انہوں نے کہا کہ لوگوں نے اس امر میں اختلاف کیا کہ غزوہ احد میں رسول اللہ صلی اللہ علیہ وسلم کے زخم کی مرہم پٹی کس چیز سے کی گئی تھی؟ انہوں نے اس سلسلے میں حضرت سہل بن سعد ساعدی رضی اللہ عنہ سے رابطہ کیا، وہ مدینہ طیبہ میں نبی صلی اللہ علیہ وسلم کے صحابہ کرام رضی اللہ عنہم میں سے آخری صحابی تھے جو باقی رہے، انہوں نے فرمایا: ”واقعی لوگوں میں کوئی بھی باقی نہیں رہا جو اس معاملے میں مجھ سے زیادہ جاننے والا ہو۔ حضرت فاطمہ رضی اللہ عنہا آپ صلی اللہ علیہ وسلم کے چہرہ انور سے خون صاف کرتی تھیں اور حضرت علی رضی اللہ عنہ اپنی ڈھال میں پانی لاتے تھے۔ (جب خون بند نہ ہوا تو) پھر ایک بوریا جلا کر اس کی راکھ سے زخم بھر دیا گیا۔“ [صحيح البخاري/كتاب النكاح/حدیث: 5248]

حضرت ابن عباس رضی اللہ عنہ سے روایت ہے، ان سے کسی آدمی نے پوچھا: ”کیا تم عید الاضحیٰ یا عید الفطر کے موقع پر رسول اللہ صلی اللہ علیہ وسلم کے ہمراہ تھے؟“ انہوں نے کہا: ”ہاں اور اگر میرا مقام و مرتبہ آپ صلی اللہ علیہ وسلم کے ہاں نہ ہوتا تو میں اپنی صغر سنی کی وجہ سے ایسے موقع پر حاضر نہیں ہو سکتا تھا۔“ انہوں نے بیان کیا کہ رسول اللہ صلی اللہ علیہ وسلم باہر تشریف لے گئے، لوگوں کو نماز عید پڑھائی اور خطبہ دیا۔ انہوں نے اس نماز کے لیے اذان و اقامت کا ذکر نہیں کیا۔ پھر آپ صلی اللہ علیہ وسلم عورتوں کے پاس آئے انہیں وعظ و نصیحت فرمائی، نیز انہیں صدقہ و خیرات کرنے کا حکم دیا۔ میں نے ان کو دیکھا کہ وہ اپنے کانوں اور گلے کی طرف ہاتھ بڑھا رہی تھیں، اپنے زیورات حضرت بلال رضی اللہ عنہ کے حوالے کر رہی تھیں۔ اس کے بعد آپ صلی اللہ علیہ وسلم اور حضرت بلال رضی اللہ عنہ دونوں اپنے گھر واپس تشریف لے آئے۔ [صحيح البخاري/كتاب النكاح/حدیث: 5249]

حضرت عائشہ رضی اللہ عنہا سے روایت ہے، انہوں نے فرمایا: ”ایک دفعہ حضرت ابوبکر صدیق رضی اللہ عنہ نے مجھے ڈانٹا اور غصے کی وجہ سے میری کمر میں ایک ہاتھ سے کونچا مارنے لگے۔ میں اس لیے حرکت نہ کر سکی کہ رسول اللہ صلی اللہ علیہ وسلم نے اپنا سر مبارک میری ران پر رکھا ہوا تھا۔“ [صحيح البخاري/كتاب النكاح/حدیث: 5250]