حضرت عبداللہ بن عمر رضی اللہ عنہ سے روایت ہے کہ انہوں نے کہا: رسول اللہ صلی اللہ علیہ وسلم کے عہدِ مبارک میں اپنی بیوی کو بحالتِ حیض طلاق دے دی۔ حضرت عمر بن خطاب رضی اللہ عنہ نے رسول اللہ صلی اللہ علیہ وسلم سے اس کے متعلق پوچھا تو آپ نے فرمایا: ”عبداللہ سے کہو کہ وہ اپنی بیوی سے رجوع کر لے۔ پھر اسے اپنے نکاح میں باقی رکھے حتیٰ کہ وہ حیض سے پاک ہو جائے۔ پھر اس کے بعد اگر چاہے تو اسے روک رکھے اور اگر چاہے تو ملاپ کیے بغیر اسے طلاق دے دے۔ یہ وہ عدت ہے جس کا اللہ تعالیٰ نے حکم دیا ہے کہ اس کا لحاظ رکھتے ہوئے عورتوں کو طلاق دی جائے۔“ [صحيح البخاري/كتاب الطلاق/حدیث: 5251]

حضرت ابن عمر رضی اللہ عنہ سے روایت ہے کہ انہوں نے اپنی بیوی کو حیض کی حالت میں طلاق دے دی۔ حضرت عمر رضی اللہ عنہ نے اس کا ذکر نبی صلی اللہ علیہ وسلم سے کیا تو آپ صلی اللہ علیہ وسلم نے فرمایا: ”اسے چاہیے کہ رجوع کرے۔“ (راوی کہتا ہے) میں نے ابن عمر رضی اللہ عنہ سے پوچھا: ”کیا اس طلاق کو شمار کیا جائے گا؟“ انہوں نے جواب دیا: ”اور کیا ہوگا؟“ قتادہ نے یونس بن جبیر کے ذریعے سے حضرت ابن عمر رضی اللہ عنہ سے روایت کیا کہ آپ صلی اللہ علیہ وسلم نے فرمایا: ”اسے حکم دو کہ رجوع کرے۔“ میں نے پوچھا: ”کیا طلاق شمار کی جائے گی؟“ حضرت ابن عمر رضی اللہ عنہ نے جواب دیا: ”تو کیا سمجھتا ہے اگر عبداللہ عاجز ہو جائے اور حماقت کا مرتکب ہو تو کیا طلاق واقع نہ ہوگی؟“ [صحيح البخاري/كتاب الطلاق/حدیث: 5252]

حضرت سعید بن جبیر رحمہ اللہ سے روایت ہے، انہوں نے حضرت ابن عمر رضی اللہ عنہما سے بیان کیا کہ انہوں نے فرمایا: ”یہ طلاق مجھ پر شمار کی گئی۔“ [صحيح البخاري/كتاب الطلاق/حدیث: 5253]

حضرت اوزاعی رحمہ اللہ بیان کرتے ہیں کہ میں نے امام زہری رحمہ اللہ سے دریافت کیا: ”نبی صلی اللہ علیہ وسلم کی وہ کون سی بیوی تھی جس نے آپ صلی اللہ علیہ وسلم سے پناہ مانگی تھی؟“ تو انہوں نے کہا کہ مجھے حضرت عروہ رحمہ اللہ نے بتایا، انہوں نے حضرت عائشہ رضی اللہ عنہا سے روایت کیا کہ دخترِ جون کو جب رسول اللہ صلی اللہ علیہ وسلم کے پاس بلایا گیا اور آپ صلی اللہ علیہ وسلم اس کے قریب گئے تو اس نے کہا: ”میں آپ سے اللہ کی پناہ مانگتی ہوں“، آپ صلی اللہ علیہ وسلم نے فرمایا: ”تو نے بڑی عظیم ذات کے ذریعے سے پناہ مانگی ہے، لہٰذا تو اپنے اہل خانہ کے ہاں چلی جا۔“ ابو عبد اللہ (امام بخاری رحمہ اللہ) نے فرمایا: ”اس حدیث کو حجاج بن ابومنیع نے اپنے دادا سے، انہوں نے امام زہری رحمہ اللہ سے، انہوں نے عروہ رحمہ اللہ سے بیان کیا کہ حضرت عائشہ رضی اللہ عنہا نے فرمایا۔“ [صحيح البخاري/كتاب الطلاق/حدیث: 5254]

حضرت ابو اسید رضی اللہ عنہ سے روایت ہے، انہوں نے کہا کہ ہم نبی صلی اللہ علیہ وسلم کے ہمراہ باہر نکلے، چلتے چلتے ہم ایسے باغ میں پہنچ گئے جسے شوط کہا جاتا تھا۔ ہم اس کے در و دیوار کے درمیان جا کر بیٹھ گئے۔ نبی صلی اللہ علیہ وسلم نے فرمایا: ”تم لوگ یہاں بیٹھ جاؤ۔“ اور آپ صلی اللہ علیہ وسلم اندر تشریف لے گئے، وہاں جونیہ لائی گئی تھی۔ اسے ایک گھر میں بٹھایا گیا جو کھجوروں کے جھنڈ میں تھا اور وہ امیمہ بنت نعمان بن شرجیل کا تھا۔ اس کے ساتھ دیکھ بھال کے لیے ایک دایہ بھی تھی۔ جب نبی صلی اللہ علیہ وسلم اس کے پاس تشریف لے گئے تو آپ صلی اللہ علیہ وسلم نے فرمایا: ”تو اپنے آپ کو میرے حوالے کر دے۔“ اس نے جواب دیا: ”کیا کوئی شہزادی اپنے آپ کو ایک عام آدمی کے حوالے کر سکتی ہے؟“ آپ صلی اللہ علیہ وسلم نے اپنا ہاتھ بڑھایا اور اس کے سر پر رکھا تاکہ اسے سکون حاصل ہو۔ اس نے کہا: «أَعُوذُ بِاللَّهِ مِنْكَ» ”میں تجھ سے اللہ کی پناہ مانگتی ہوں۔“ آپ صلی اللہ علیہ وسلم نے فرمایا: «لَقَدْ عُذْتِ بِمَعَاذٍ» ”تو نے ایسی ذات سے پناہ مانگی ہے جس کے ذریعے سے پناہ مانگی جاتی ہے۔“ اس کے بعد آپ صلی اللہ علیہ وسلم باہر ہمارے پاس تشریف لے آئے اور فرمایا: ”اے ابو اسید! اسے دو رازقیہ کپڑے پہنا کر اس کے گھر والوں کے پاس پہنچا دو۔“ [صحيح البخاري/كتاب الطلاق/حدیث: 5255]

حضرت سہل بن سعد اور حضرت ابو اسید رضی اللہ عنہما سے روایت ہے، انہوں نے کہا: ”نبی صلی اللہ علیہ وسلم نے امیمہ بنت شراحیل سے نکاح کیا تھا، پھر جب وہ آپ کے پاس لائی گئی تو آپ نے اس کی طرف اپنا ہاتھ بڑھایا جسے اس نے ناپسند کیا، چنانچہ آپ صلی اللہ علیہ وسلم نے حضرت ابو اسید رضی اللہ عنہ کو حکم دیا کہ وہ اس کو سامان دے کر تیار کریں اور اسے دو رازقی کپڑے پہننے کے لیے دے دیں۔“ [صحيح البخاري/كتاب الطلاق/حدیث: 5256]

حضرت سہل بن سعد اور ابو اسید رضی اللہ عنہما سے روایت ہے، انہوں نے کہا: ”نبی صلی اللہ علیہ وسلم نے امیمہ بنت شراجیل سے نکاح کیا تھا، پھر جب وہ آپ کے پاس لائی گئی تو آپ نے اس کی طرف اپنا ہاتھ بڑھایا جسے اس نے ناپسند کیا، چنانچہ آپ صلی اللہ علیہ وسلم نے حضرت ابو اسید رضی اللہ عنہ کو حکم دیا کہ اس کو سامان دے کر تیار کرے اور اسے دو رازقی کپڑے پہننے کے لیے دے دے۔“ [صحيح البخاري/كتاب الطلاق/حدیث: 5257]

ابو غلاب یونس بن جبیر سے روایت ہے، انہوں نے کہا کہ میں نے حضرت ابن عمر رضی اللہ عنہ سے عرض کی: ”ایک شخص نے اپنی بیوی کو اس وقت طلاق دی جب وہ بحالت حیض تھی؟“ انہوں نے کہا: ”تم ابن عمر کو جانتے ہو؟ ابن عمر نے اپنی بیوی کو حیض کی حالت میں طلاق دی تھی۔ پھر حضرت عمر رضی اللہ عنہ نبی صلی اللہ علیہ وسلم کی خدمت میں حاضر ہوئے اور اس کے متعلق آپ صلی اللہ علیہ وسلم سے دریافت کیا تو آپ صلی اللہ علیہ وسلم نے انہیں حکم دیا کہ وہ بیوی سے رجوع کرے۔ پھر جب وہ حیض سے پاک ہو جائے تو اس وقت اگر وہ چاہے تو طلاق دے دے۔“ سائل نے پوچھا: ”کیا آپ صلی اللہ علیہ وسلم نے اسے طلاق شمار کیا تھا؟“ حضرت ابن عمر رضی اللہ عنہ نے کہا: ”اگر کوئی عاجز رہے اور حماقت کا ثبوت دے تو اس کا کیا علاج ہے؟“ [صحيح البخاري/كتاب الطلاق/حدیث: 5258]