حضرت انس رضی اللہ عنہ سے روایت ہے، ان سے سوال ہوا: ”آپ نے لہسن کے متعلق نبی صلی اللہ علیہ وسلم سے کیا فرمان سنا ہے؟“ تو انہوں نے کہا کہ آپ صلی اللہ علیہ وسلم نے فرمایا: ”جو لہسن کھائے وہ ہماری مسجد کے قریب نہ آئے۔“ [صحيح البخاري/كتاب الأطعمة/حدیث: 5451]

حضرت جابر بن عبداللہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جو شخص لہسن یا پیاز کھائے وہ ہم سے علیحدہ رہے۔“ یا فرمایا: ”وہ ہماری مسجد سے الگ رہے۔“ [صحيح البخاري/كتاب الأطعمة/حدیث: 5452]

حضرت جابر بن عبداللہ رضی اللہ عنہ سے روایت ہے، انہوں نے کہا کہ ہم مرظہران میں رسول اللہ صلی اللہ علیہ وسلم کے ہمراہ پیلو کا پھل چن رہے تھے تو آپ صلی اللہ علیہ وسلم نے فرمایا: ”جو خوب سیاہ ہو اسے توڑو کیونکہ وہ لذیذ ہوتا ہے۔“ آپ صلی اللہ علیہ وسلم سے پوچھا گیا: ”کیا آپ نے بکریاں چرائی ہیں؟“ آپ صلی اللہ علیہ وسلم نے فرمایا: ”ہاں، ہر نبی نے بکریاں چرائی ہیں۔“ [صحيح البخاري/كتاب الأطعمة/حدیث: 5453]

حضرت سوید بن نعمان رضی اللہ عنہ سے روایت ہے، انہوں نے کہا: ”ہم رسول اللہ صلی اللہ علیہ وسلم کے ہمراہ خیبر روانہ ہوئے، جب ہم مقام صہباء پہنچے تو آپ صلی اللہ علیہ وسلم نے کھانا طلب فرمایا۔ کھانے میں ستو کے علاوہ اور کوئی چیز دستیاب نہ ہوسکی۔ ہم نے بھی وہی کھائے۔ پھر آپ صلی اللہ علیہ وسلم نماز کے لیے کھڑے ہوئے۔ آپ نے صرف کلی کی تو ہم نے بھی آپ کے ہمراہ کلی کی۔“ [صحيح البخاري/كتاب الأطعمة/حدیث: 5454]

یحییٰ سے روایت ہے انہوں نے کہا کہ میں نے بشیر سے سنا، ان سے حضرت سوید بن نعمان رضی اللہ عنہ نے بیان کیا: ”ہم رسول اللہ صلی اللہ علیہ وسلم کے ہمراہ خیبر روانہ ہوئے۔ جب ہم صہباء پہنچے۔۔۔“ یحییٰ نے کہا: ”یہ خیبر سے ایک منزل دور واقع ہے۔۔۔“ ”تو آپ صلی اللہ علیہ وسلم نے کھانا طلب کیا۔ آپ صلی اللہ علیہ وسلم کو صرف ستو پیش کیے گئے۔ (آپ صلی اللہ علیہ وسلم نے وہ کھائے) اور ہم نے بھی آپ صلی اللہ علیہ وسلم کے ہمراہ کھائے۔ پھر آپ صلی اللہ علیہ وسلم نے پانی منگوایا اور کلی کی۔ ہم نے بھی آپ صلی اللہ علیہ وسلم کے ہمراہ کلی کی، پھر آپ صلی اللہ علیہ وسلم نے نمازِ مغرب پڑھائی اور نیا وضو نہیں کیا۔“ سفیان نے کہا: ”گویا تم یہ حدیث یحییٰ ہی سے سن رہے ہو۔“ [صحيح البخاري/كتاب الأطعمة/حدیث: 5455]

حضرت ابن عباس رضی اللہ عنہما سے روایت ہے کہ نبی صلی اللہ علیہ وسلم نے فرمایا: ”جب تم میں سے کوئی کھانا کھائے تو ہاتھ صاف کرنے سے پہلے اسے خود چاٹے یا کسی اور کو چٹا دے۔“ [صحيح البخاري/كتاب الأطعمة/حدیث: 5456]

حضرت جابر بن عبداللہ رضی اللہ عنہ سے روایت ہے کہ ان سے سعید بن حارث نے ایسی چیز کے کھانے سے وضو کرنے کے متعلق پوچھا جسے آگ نے چھوا ہو تو حضرت جابر رضی اللہ عنہ نے جواب دیا: ”وضو نہیں کرنا چاہیے، ہمیں نبی صلی اللہ علیہ وسلم کے عہد مبارک میں ایسا کھانا بہت کم میسر آتا تھا، ہم جب کبھی ایسا کھانا پاتے تو ہماری ہتھیلیوں، کلائیوں اور قدموں کے علاوہ اور کوئی رومال نہیں ہوتا تھا، ہم ان سے ہاتھ صاف کر کے نماز پڑھ لیتے اور وضو نہ کرتے تھے۔“ [صحيح البخاري/كتاب الأطعمة/حدیث: 5457]

حضرت ابو امامہ رضی اللہ عنہ سے روایت ہے کہ نبی صلی اللہ علیہ وسلم کے سامنے سے جب دسترخوان اٹھایا جاتا تو آپ صلی اللہ علیہ وسلم یہ دعا پڑھتے: «الْحَمْدُ لِلَّهِ حَمْدًا كَثِيرًا طَيِّبًا مُبَارَكًا فِيهِ، غَيْرَ مَكْفِيٍّ وَلَا مُوَدَّعٍ، وَلَا مُسْتَغْنًى عَنْهُ رَبَّنَا» ”تمام تعریفیں اللہ ہی کے لیے ہیں، بہت زیادہ، پاکیزہ اور اس میں برکت ڈالی گئی ہے، نہ (یہ کھانا) کفایت کیا گیا (کہ مزید کی ضرورت نہ رہے) اور نہ اسے وداع کیا گیا اور نہ اس سے بے نیاز ہوا جا سکتا ہے، اے ہمارے رب۔“ [صحيح البخاري/كتاب الأطعمة/حدیث: 5458]

حضرت ابو امامہ رضی اللہ عنہ ہی سے روایت ہے کہ نبی صلی اللہ علیہ وسلم جب کھانے سے فارغ ہوتے یا جب اپنا دسترخوان اٹھاتے تو یہ دعا پڑھتے: «الْحَمْدُ لِلَّهِ الَّذِي كَفَانَا وَأَرْوَانَا، غَيْرَ مَكْفِيٍّ وَلَا مَكْفُورٍ» ”تمام تعریفیں اس اللہ کے لیے ہیں جس نے ہمیں کافی کھلایا اور سیراب کیا۔ نہ (یہ کھانا) کفایت کیا گیا (کہ مزید کی ضرورت نہ رہے) اور نہ ہم اس نعمت کے منکر ہیں۔“ ایک مرتبہ آپ صلی اللہ علیہ وسلم نے یوں دعا کی: «الْحَمْدُ لِلَّهِ رَبِّنَا، غَيْرَ مَكْفِيٍّ وَلَا مُوَدَّعٍ وَلَا مُسْتَغْنًى عَنْهُ رَبَّنَا» ”اے ہمارے رب! تیرے لیے ہی تمام تعریفیں ہیں۔ نہ (یہ کھانا) کفایت کیا گیا (کہ مزید کی ضرورت نہ رہے) اور نہ اسے وداع کیا گیا ہے اور اے ہمارے رب! نہ ہمیں اس سے بے نیازی ہو۔“ [صحيح البخاري/كتاب الأطعمة/حدیث: 5459]