حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم کی وفات ہو گئی اور ہم کھجور اور پانی ہی سے پیٹ بھرتے تھے۔“ [صحيح البخاري/كتاب الأطعمة/حدیث: 5442]

حضرت جابر بن عبداللہ رضی اللہ عنہ سے روایت ہے، انہوں نے کہا کہ مدینہ طیبہ میں ایک یہودی تھا جو کھجوروں کی تیاری تک قرض دیا کرتا تھا۔ رومہ کے راستے میں حضرت جابر رضی اللہ عنہ کی زمین تھی، ایک سال کھجور کے باغات پھل نہ لائے۔ کھجوریں توڑنے کے موسم میں یہودی میرے پاس آیا جبکہ میں نے کھجوروں سے کچھ نہ توڑا تھا، چنانچہ میں نے اس سے دوسرے سال تک مہلت طلب کی لیکن اس نے انکار کر دیا۔ نبی صلی اللہ علیہ وسلم کو یہ اطلاع ملی تو آپ صلی اللہ علیہ وسلم نے اپنے صحابہ کرام رضی اللہ عنہم سے فرمایا: ”چلو، ہم جابر کے لیے یہودی سے مہلت طلب کریں۔“ پھر آپ صلی اللہ علیہ وسلم کھجوروں کے باغ میں میرے پاس تشریف لائے، نبی صلی اللہ علیہ وسلم نے یہودی سے گفتگو کی تو وہ کہنے لگا: ”اے ابوالقاسم! میں اسے مزید مہلت نہیں دوں گا۔“ جب نبی صلی اللہ علیہ وسلم نے اس صورت حال کو دیکھا تو وہاں سے اٹھ کھڑے ہوئے اور باغ کا چکر لگایا، پھر یہودی کے پاس آ کر اس سے بات چیت کی تو اس نے پھر انکار کر دیا۔ اس دوران میں اٹھا اور تھوڑی سی تازہ کھجوریں لا کر نبی صلی اللہ علیہ وسلم کے آگے رکھ دیں، آپ صلی اللہ علیہ وسلم نے انہیں تناول فرمایا، اس کے بعد مجھے کہنے لگے: ”اے جابر! تمہاری جھونپڑی کہاں ہے؟“ میں نے اس کی نشاندہی کی تو آپ صلی اللہ علیہ وسلم نے فرمایا: ”وہاں میرے لیے ایک بستر بچھا دو۔“ میں نے وہاں ایک بستر لگا دیا۔ آپ صلی اللہ علیہ وسلم وہاں گئے اور محوِ استراحت ہوئے، جب بیدار ہوئے تو میں نے پھر مٹھی بھر کھجوریں آپ صلی اللہ علیہ وسلم کو پیش کیں، آپ صلی اللہ علیہ وسلم نے ان میں سے کچھ کھائیں، پھر کھڑے ہوئے اور یہودی سے گفتگو کی، لیکن اس نے پھر انکار کر دیا، آپ صلی اللہ علیہ وسلم دوسری مرتبہ تازہ کھجوروں کے باغ میں کھڑے ہوئے پھر فرمایا: ”اے جابر! ان کو خوشوں سے الگ کر کے اپنا قرض ادا کرو۔“ چنانچہ آپ صلی اللہ علیہ وسلم وہاں کھڑے ہو گئے اور میں نے باغ میں سے اتنی کھجوریں توڑ لیں جس سے میں نے قرض ادا کر دیا اور اس میں سے کچھ کھجوریں بچ گئیں۔ پھر میں وہاں سے روانہ ہوا اور نبی صلی اللہ علیہ وسلم کی خدمت میں حاضر ہو کر یہ بشارت دی تو آپ صلی اللہ علیہ وسلم نے فرمایا: ”میں گواہی دیتا ہوں کہ میں اللہ کا رسول ہوں۔“ (امام بخاری رحمہ اللہ نے فرمایا:) ” «الْعَرْشُ» اور «الْعَرِيشُ» عمارت کی چھت کو کہتے ہیں،“ حضرت ابن عباس رضی اللہ عنہما نے فرمایا: ” «مَعْرُوشَاتٍ» سے مراد انگور وغیرہ کی چھتیں ہیں، اور «عُرُوشِهَا» سے مراد بھی چھتیں ہیں۔“ محمد بن اسماعیل (امام بخاری رحمہ اللہ) نے کہا: ”اس حدیث میں «فَخْلًا» کا لفظ میرے نزدیک محفوظ نہیں بلکہ میرے نزدیک «أَشْبَهُ» (زیادہ صحیح) یہ لفظ «نَخْلًا» ہے یعنی وہ باغ ایک سال کھجوروں کا پھل لانے سے بیٹھ گیا۔“ [صحيح البخاري/كتاب الأطعمة/حدیث: 5443]

حضرت عبداللہ بن عمر رضی اللہ عنہما سے روایت ہے انہوں نے کہا: ایک مرتبہ ہم نبی صلی اللہ علیہ وسلم کی خدمت میں موجود تھے کہ آپ کے پاس کھجور کا گودا لایا گیا۔ نبی صلی اللہ علیہ وسلم نے فرمایا: ”درختوں میں سے ایک درخت ایسا ہے جس کی برکت، مسلمان کی برکت جیسی ہے۔“ میں نے خیال کیا کہ آپ کا اشارہ کھجور کے درخت کی طرف ہے، میں نے سوچا کہ کہہ دوں: اللہ کے رسول! یہ کھجور کا درخت ہے، لیکن جب میں نے ادھر ادھر دیکھا تو مجلس میں میرے علاوہ نو آدمی اور تھے اور میں ان سب سے چھوٹا تھا، اس لیے میں خاموش رہا۔ پھر نبی صلی اللہ علیہ وسلم نے فرمایا: ”وہ درخت کھجور کا ہے۔“ [صحيح البخاري/كتاب الأطعمة/حدیث: 5444]

حضرت سعد بن ابی وقاص رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”جس نے ہر دن صبح کے وقت سات عجوہ کھجوریں کھا لیں، اسے اس روز زہر یا جادو نقصان نہیں پہنچا سکے گا۔“ [صحيح البخاري/كتاب الأطعمة/حدیث: 5445]

حضرت جبلہ بن سحیم رحمہ اللہ سے روایت ہے انہوں نے کہا: ”ہمیں ایک سال حضرت عبداللہ بن زبیر رضی اللہ عنہ کے ساتھ قحط کا سامنا کرنا پڑا۔ انہوں نے راشن کے طور پر ہمیں کھجوریں دیں۔ جب کھجوریں کھا رہے ہوتے اور حضرت عبداللہ بن عمر رضی اللہ عنہ ہمارے پاس سے گزرتے تو کہتے: ”دو کھجوریں ایک ساتھ ملا کر نہ کھاؤ کیونکہ نبی صلی اللہ علیہ وسلم نے دو کھجوریں ایک ساتھ ملا کر کھانے سے منع کیا ہے“، پھر حضرت ابن عمر رضی اللہ عنہ فرماتے: ”مگر اس صورت میں کہ کھانے والا اپنے ساتھی سے اجازت لے لے۔“ شعبہ رحمہ اللہ نے کہا کہ حدیث میں اجازت والا ٹکڑا حضرت ابن عمر رضی اللہ عنہ کا قول ہے۔“ [صحيح البخاري/كتاب الأطعمة/حدیث: 5446]

حضرت عبداللہ بن جعفر رضی اللہ عنہ سے روایت ہے، انہوں نے کہا: ”میں نے نبی صلی اللہ علیہ وسلم کو دیکھا کہ آپ تازہ کھجوریں ککڑی ساتھ ملا کر کھا رہے تھے۔“ [صحيح البخاري/كتاب الأطعمة/حدیث: 5447]

حضرت ابن عمر رضی اللہ عنہما سے روایت ہے، وہ نبی صلی اللہ علیہ وسلم سے بیان کرتے ہیں، آپ صلی اللہ علیہ وسلم نے فرمایا: ”درختوں میں سے ایک درخت مسلمان جیسا ہے اور وہ کھجور کا درخت ہے۔“ [صحيح البخاري/كتاب الأطعمة/حدیث: 5448]

حضرت عبداللہ بن جعفر رضی اللہ عنہ سے روایت ہے، انہوں نے کہا: ”میں نے رسول اللہ صلی اللہ علیہ وسلم کو ککڑی کے ساتھ تازہ کھجوریں ملا کر کھاتے ہوئے دیکھا ہے۔“ [صحيح البخاري/كتاب الأطعمة/حدیث: 5449]

حضرت انس رضی اللہ عنہ سے روایت ہے کہ ان کی والدہ ام سلیم رضی اللہ عنہا نے ایک مُدّ جو لیے اور ان کو دَل کر دلیا بنایا، پھر اسے دودھ میں پکایا، اس کے بعد اس پکوان پر کپی سے گھی نچوڑا۔ پھر مجھے انہوں نے نبی صلی اللہ علیہ وسلم کے پاس بھیجا۔ جب میں آپ صلی اللہ علیہ وسلم کے پاس آیا تو آپ صلی اللہ علیہ وسلم صحابہ کرام رضی اللہ عنہم میں تشریف فرما تھے۔ میں نے آپ صلی اللہ علیہ وسلم کو دعوت دی تو آپ صلی اللہ علیہ وسلم نے فرمایا: ”میرے ساتھی بھی ہیں۔“ یہ سن کر حضرت ابو طلحہ رضی اللہ عنہ آپ صلی اللہ علیہ وسلم کی خدمت میں حاضر ہوئے اور عرض کی: ”اللہ کے رسول! کھانا تھوڑا سا ہے جو ام سلیم رضی اللہ عنہا نے تیار کیا ہے۔“ چنانچہ آپ صلی اللہ علیہ وسلم گھر تشریف لائے تو وہ کھانا آپ صلی اللہ علیہ وسلم کو پیش کر دیا گیا۔ آپ صلی اللہ علیہ وسلم نے فرمایا: ”دس صحابہ کو بلاؤ۔“ چنانچہ وہ آئے اور انہوں نے پیٹ بھر کر کھانا کھایا حتیٰ کہ وہ سیر ہو گئے۔ آپ صلی اللہ علیہ وسلم نے فرمایا: ”دس مزید بلاؤ۔“ یہاں تک کہ چالیس آدمی شمار کیے۔ آخر میں نبی صلی اللہ علیہ وسلم نے کھانا تناول فرمایا پھر اٹھ کر تشریف لے گئے۔ (حضرت انس رضی اللہ عنہ نے کہا کہ) میں کھانے کو دیکھتا رہا آیا اس سے کوئی چیز کم ہوئی ہے؟ [صحيح البخاري/كتاب الأطعمة/حدیث: 5450]