حضرت ابو ہریرہ رضی اللہ عنہ سے روایت ہے وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”تم میں سے جب کسی کے پاس اس کا خادم کھانا پکا کر لائے، اگر اسے اپنے ساتھ بٹھا کر نہیں کھلا سکتا تو ایک یا دو لقمے اسے دے دے کیونکہ اس نے پکاتے وقت گرمی اور مشقت برداشت کی ہے۔“ [صحيح البخاري/كتاب الأطعمة/حدیث: 5460]

حضرت ابو مسعود انصاری رضی اللہ عنہ سے روایت ہے انہوں نے کہا کہ انصار میں ایک ابو شعیب نامی آدمی تھے اور ان کا غلام گوشت فروش تھا۔ (ابو شعیب رضی اللہ عنہ) نبی صلی اللہ علیہ وسلم کی خدمت میں حاضر ہوئے جبکہ آپ صحابہ کرام رضی اللہ عنہم میں تشریف فرما تھے۔ انہوں نے آپ کے چہرہ مبارک سے فاقہ کشی کا اندازہ لگایا، چنانچہ وہ اپنے گوشت فروش غلام کے پاس آئے اور کہا کہ: ”میرے لیے پانچ آدمیوں کا کھانا تیار کر دو، میں نبی صلی اللہ علیہ وسلم کو چار دوسرے آدمیوں کے ہمراہ دعوت دینے والا ہوں۔“ اس (غلام) نے کھانا تیار کر دیا۔ اس کے بعد ابو شعیب رضی اللہ عنہ آپ صلی اللہ علیہ وسلم کی خدمت میں حاضر ہوئے اور آپ کو کھانے کی دعوت دی۔ ان کے ہمراہ ایک اور آدمی بھی چلنے لگا۔ نبی صلی اللہ علیہ وسلم نے فرمایا: ”اے ابو شعیب! یہ صاحب بھی ہمارے ساتھ آ گئے ہیں۔ اگر تم چاہو تو اسے اجازت دے دو اور اگر چاہو تو اسے چھوڑو۔“ انہوں نے کہا: ”نہیں بلکہ میں اسے بھی اجازت دیتا ہوں۔“ [صحيح البخاري/كتاب الأطعمة/حدیث: 5461]

حضرت عمرو بن امیہ رضی اللہ عنہ سے روایت ہے، انہوں نے رسول اللہ صلی اللہ علیہ وسلم کو دیکھا کہ ”وہ اپنے ہاتھ میں لیے ہوئے بکری کے شانے کا چھری کے ساتھ گوشت کاٹ رہے تھے۔ اس دوران میں آپ صلی اللہ علیہ وسلم کو نماز کے لیے بلایا گیا تو آپ صلی اللہ علیہ وسلم نے شانہ اور اس چھری کو پھینک دیا جس کے ساتھ گوشت کاٹ رہے تھے۔ پھر آپ صلی اللہ علیہ وسلم کھڑے ہوئے، نماز پڑھی اور وضو نہ کیا۔“ [صحيح البخاري/كتاب الأطعمة/حدیث: 5462]

حضرت انس بن مالک رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ نے فرمایا: ”جب رات کا کھانا سامنے رکھ دیا جائے اور نماز بھی کھڑی ہو گئی ہو تو پہلے کھانا کھاؤ۔“ [صحيح البخاري/كتاب الأطعمة/حدیث: 5463]

حضرت ابن عمر رضی اللہ عنہما سے روایت ہے، انہوں نے ”ایک مرتبہ کا کھانا کھایا جبکہ آپ امام کی قراءت سن رہے تھے۔“ [صحيح البخاري/كتاب الأطعمة/حدیث: 5464]

حضرت عائشہ رضی اللہ عنہا سے روایت ہے، وہ نبی صلی اللہ علیہ وسلم سے بیان کرتی ہیں کہ آپ نے فرمایا: ”جب نماز کھڑی کر دی جائے اور رات کا کھانا سامنے ہو تو پہلے عشائیہ تناول کرو۔“ وہیب اور یحییٰ بن سعید نے حضرت ہشام سے یہ الفاظ بیان کیے ہیں: ”جب رات کا کھانا چن دیا جائے۔“ [صحيح البخاري/كتاب الأطعمة/حدیث: 5465]

حضرت انس رضی اللہ عنہ سے روایت ہے، انہوں نے کہا: ”میں نزولِ حجاب کے متعلق لوگوں سے زیادہ معلومات رکھتا ہوں۔ حضرت ابی بن کعب رضی اللہ عنہ بھی مجھ سے اس کے بارے میں پوچھا کرتے تھے۔ ہوا یوں کہ حضرت زینب بنت جحش رضی اللہ عنہا سے رسول اللہ صلی اللہ علیہ وسلم کی شادی کا موقع تھا، آپ صلی اللہ علیہ وسلم نے ان سے مدینہ طیبہ میں نکاح کیا تھا۔ دن چڑھنے کے بعد آپ صلی اللہ علیہ وسلم نے لوگوں کو کھانے کی دعوت دی۔ رسول اللہ صلی اللہ علیہ وسلم وہیں تشریف فرما تھے اور آپ صلی اللہ علیہ وسلم کے ساتھ دیگر صحابہ بھی بیٹھے تھے، اس وقت دوسرے لوگ کھانے سے فارغ ہو کر جا چکے تھے، حتیٰ کہ رسول اللہ صلی اللہ علیہ وسلم اٹھنے اور چلنے لگے تو میں بھی آپ صلی اللہ علیہ وسلم کے ساتھ چل رہا تھا۔ جب آپ صلی اللہ علیہ وسلم حضرت عائشہ رضی اللہ عنہا کے حجرے پر پہنچے تو خیال آیا کہ شاید لوگ چلے گئے ہوں گے، آپ صلی اللہ علیہ وسلم وہیں سے واپس آئے۔ میں بھی آپ صلی اللہ علیہ وسلم کے ساتھ واپس آیا تو دیکھا کہ لوگ اب بھی وہاں بیٹھے ہوئے ہیں، چنانچہ آپ صلی اللہ علیہ وسلم پھر واپس ہوئے اور میں بھی آپ صلی اللہ علیہ وسلم کے ہمراہ دوبارہ واپس آ گیا۔ جب دوسری مرتبہ حضرت عائشہ رضی اللہ عنہا کے حجرے تک پہنچے تو واپس آ گئے اور میں آپ صلی اللہ علیہ وسلم کے ساتھ لوٹ آیا۔ اب وہ لوگ جا چکے تھے، اس کے بعد آپ صلی اللہ علیہ وسلم نے میرے اور اپنے درمیان پردہ لٹکایا اور آیتِ حجاب نازل ہوئی۔“ [صحيح البخاري/كتاب الأطعمة/حدیث: 5466]