ابوسعید خدری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جمعہ کے دن غسل کرنا ہر بالغ شخص پر واجب ہے۔“ متفق علیہ۔ [مشكوة المصابيح/كتاب الطهارة/حدیث: 538]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہفتہ میں ایک روز غسل کرنا ہر مسلمان پر لازم ہے، جس میں وہ اپنا سر اور جسم (اچھی طرح) دھوئے۔“ متفق علیہ۔ [مشكوة المصابيح/كتاب الطهارة/حدیث: 539]

سمرہ بن جندب رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جس شخص نے جمعہ کے روز وضو کیا تو اس نے اچھا کیا، اور جس نے غسل کیا تو غسل کرنا افضل ہے۔“ اسنادہ حسن، رواہ احمد و ابوداؤد والترمذی والنسائی والدارمی۔ [مشكوة المصابيح/كتاب الطهارة/حدیث: 540]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص میت کو غسل دے تو وہ خود بھی غسل کرے۔“ ابن ماجہ، احمد، ترمذی اور ابوداؤد نے یہ اضافہ نقل کیا ہے: ”جو شخص اسے کندھا دے تو وہ وضو کرے۔“ صحیح۔ [مشكوة المصابيح/كتاب الطهارة/حدیث: 541]

عائشہ رضی اللہ عنہا سے روایت ہے کہ نبی صلی ‌اللہ ‌علیہ ‌وآلہ ‌وسلم چار چیزوں: جنابت، جمعہ کے دن، سینگی لگوانے اور میت کو غسل دینے سے غسل کیا کرتے تھے۔ «إِسْنَادُهُ حَسَنٌ»، رواہ ابوداؤد۔ [مشكوة المصابيح/كتاب الطهارة/حدیث: 542]

قیس بن عاصم رضی اللہ عنہ سے روایت ہے کہ انہوں نے اسلام قبول کیا تو نبی صلی ‌اللہ ‌علیہ ‌وآلہ ‌وسلم نے انہیں حکم دیا کہ ”وہ پانی میں بیری کے پتے ڈال کر غسل کریں۔“ (صحیح، رواہ الترمذی وابوداؤد والنسائی)۔ [مشكوة المصابيح/كتاب الطهارة/حدیث: 543]

عکرمہ رضی اللہ عنہ بیان کرتے ہیں کہ اہل عراق سے کچھ لوگ آئے اور انہوں نے عرض کیا: ابن عباس (رضی اللہ عنہما)! کیا آپ جمعہ کے روز غسل کرنا واجب سمجھتے ہیں؟ انہوں نے فرمایا: نہیں، لیکن پاکیزگی کا باعث اور بہتر ہے، اور جو شخص غسل نہ کرے تو اس پر واجب نہیں، میں تمہیں بتاتا ہوں کہ غسل کا آغاز کیسے ہوا، لوگ محنت کش تھے، اونی لباس پہنتے تھے، وہ اپنی کمر پر بوجھ اٹھاتے تھے، ان کی مسجد تنگ تھی اور چھت اونچی نہیں تھی، بس وہ ایک چھپر سا تھا، رسول اللہ صلی ‌اللہ ‌علیہ ‌وآلہ ‌وسلم گرمیوں کے دن تشریف لائے تو لوگ اس اونی لباس میں پسینے سے شرابور تھے، حتیٰ کہ ان سے بو پھیل گئی اور وہ ایک دوسرے کے لیے باعث اذیت بن گئی، چنانچہ رسول اللہ صلی ‌اللہ ‌علیہ ‌وآلہ ‌وسلم نے یہ بو محسوس کی تو فرمایا: ”لوگو! جب یہ (جمعہ کا) دن ہو تو غسل کرو اور جو بہترین تیل اور خوشبو میسر ہو وہ استعمال کرو۔“ ابن عباس رضی اللہ عنہما نے فرمایا: پھر اللہ نے مال عطا کر دیا تو انہوں نے غیر اونی کپڑے پہن لیے، کام کرنے کی ضرورت نہ رہی، ان کی مسجد کی توسیع کر دی گئی اور ایک دوسرے کو اذیت پہنچانے والی وہ پسینے کی بو جاتی رہی۔ (حسن، رواہ ابوداؤد) [مشكوة المصابيح/كتاب الطهارة/حدیث: 544]

انس بن مالک رضی اللہ عنہ بیان کرتے ہیں کہ یہودیوں کا یہ طرز عمل تھا کہ جب ان میں کسی عورت کو حیض آ جاتا تو وہ اس کے ساتھ کھانا نہ کھاتے اور نہ انہیں گھر میں ساتھ رکھتے تھے، پس نبی صلی ‌اللہ ‌علیہ ‌وآلہ ‌وسلم کے صحابہ نے آپ صلی ‌اللہ ‌علیہ ‌وآلہ ‌وسلم سے مسئلہ دریافت کیا تو اللہ تعالیٰ نے یہ آیت نازل فرمائی: ﴿وَيَسْأَلُونَكَ عَنِ الْمَحِيضِ﴾ [سورة البقرة: 222] ”وہ آپ سے حیض کے بارے میں مسئلہ دریافت کرتے ہیں۔“ تو رسول اللہ صلی ‌اللہ ‌علیہ ‌وآلہ ‌وسلم نے فرمایا: «اصْنَعُوا كُلَّ شَيْءٍ إِلَّا النِّكَاحَ» ”جماع کے علاوہ سب کچھ کرو۔“ چنانچہ یہودیوں کو جب اس کا علم ہوا تو انہوں نے کہا: یہ آدمی (نبی صلی ‌اللہ ‌علیہ ‌وآلہ ‌وسلم) کیا چاہتا ہے؟ یہ تمام معاملات میں ہماری مخالفت ہی کرتا ہے۔ چنانچہ اسید بن حضیر اور عباد بن بشر رضی اللہ عنہما حاضر خدمت ہوئے تو انہوں نے عرض کیا: اے اللہ کے رسول! یہودی یہ یہ کہتے ہیں، کیا ہم ان سے (حالت حیض میں) جماع نہ کریں؟ اس پر رسول اللہ صلی ‌اللہ ‌علیہ ‌وآلہ ‌وسلم کے چہرے کا رنگ بدل گیا، حتیٰ کہ ان دونوں نے خیال کیا کہ آپ صلی ‌اللہ ‌علیہ ‌وآلہ ‌وسلم ان دونوں پر ناراض ہو گئے ہیں، پس وہ وہاں سے چل دیے، (اسی اثنا میں) انہیں دودھ کا ہدیہ ملا جو نبی صلی ‌اللہ ‌علیہ ‌وآلہ ‌وسلم کی خدمت میں بھیجا گیا تھا، چنانچہ آپ صلی ‌اللہ ‌علیہ ‌وآلہ ‌وسلم نے کسی شخص کو ان کے پیچھے بھیجا اور انہیں (بلا کر) دودھ پلایا جس سے انہوں نے پہچان لیا کہ آپ صلی ‌اللہ ‌علیہ ‌وآلہ ‌وسلم ان پر ناراض نہیں ہیں۔ (رواہ مسلم) [مشكوة المصابيح/كتاب الطهارة/حدیث: 545]

عائشہ رضی اللہ عنہا بیان کرتی ہیں: میں اور نبی صلی ‌اللہ ‌علیہ ‌وآلہ ‌وسلم ایک ہی برتن سے غسل کیا کرتے تھے، جبکہ ہم دونوں جنبی ہوتے تھے، آپ صلی ‌اللہ ‌علیہ ‌وآلہ ‌وسلم مجھے حکم دیتے تو میں ازار پہن لیتی، پھر آپ صلی ‌اللہ ‌علیہ ‌وآلہ ‌وسلم میرے ساتھ لیٹ جاتے جبکہ میں حیض سے ہوتی، آپ صلی ‌اللہ ‌علیہ ‌وآلہ ‌وسلم اعتکاف کی حالت میں اپنا سر مبارک میری طرف کر دیتے، تو میں اسے دھو دیتی حالانکہ میں حیض سے ہوتی تھی۔ متفق علیہ۔ [مشكوة المصابيح/كتاب الطهارة/حدیث: 546]

عائشہ رضی اللہ عنہا بیان کرتی ہیں، میں حالتِ حیض میں کوئی چیز پیتی پھر میں اسے نبی صلی ‌اللہ ‌علیہ ‌وآلہ ‌وسلم کو دے دیتی تو آپ اسی جگہ اپنا منہ لگاتے، جہاں میں نے منہ لگایا تھا۔ اور میں ہڈی والی بوٹی کھاتی جبکہ میں حیض سے ہوتی تھی، پھر میں اسے نبی صلی ‌اللہ ‌علیہ ‌وآلہ ‌وسلم کو دے دیتی تو آپ اسی جگہ منہ لگاتے جہاں میرا منہ لگا تھا۔ رواہ مسلم۔ [مشكوة المصابيح/كتاب الطهارة/حدیث: 547]