ابوہریرہ رضی اللہ عنہ سے مروی حدیث «مَا مِنْ أَيَّامٍ أَحَبُّ إِلَى اللّٰهِ» ”اللہ تعالیٰ کے نزدیک کوئی دن زیادہ محبوب نہیں“ باب الاضحیہ میں ذکر کی گئی ہے۔ ضعیف۔ [مشكوة المصابيح/كتاب الصوم/حدیث: 2066]

ابن عباس رضی اللہ عنہما سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم مدینہ تشریف لائے تو آپ نے یہودیوں کو یومِ عاشورا کا روزہ رکھتے ہوئے پایا تو رسول اللہ صلی ‌اللہ ‌علیہ ‌وآلہ ‌وسلم نے ان سے دریافت فرمایا: ”یہ کون سا دن ہے جس کا تم روزہ رکھتے ہو؟“ انہوں نے عرض کیا: یہ ایک عظیم دن ہے، اللہ تعالیٰ نے اس روز موسیٰ علیہ السلام اور ان کی قوم کو نجات دی جبکہ فرعون اور اس کی قوم کو غرق کیا تو موسیٰ علیہ السلام نے شکر کے طور پر اس دن کا روزہ رکھا تو ہم بھی اس روز کا روزہ رکھتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہم تمہاری نسبت موسیٰ (علیہ السلام) کے زیادہ حق دار ہیں۔“ رسول اللہ صلی ‌اللہ ‌علیہ ‌وآلہ ‌وسلم نے اس روز کا روزہ رکھا اور اس کا روزہ رکھنے کا حکم فرمایا۔ [متفق علیہ] [مشكوة المصابيح/كتاب الصوم/حدیث: 2067]

ام سلمہ رضی اللہ عنہا بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم زیادہ تر ہفتہ اور اتوار کے دن روزہ رکھا کرتے تھے، اور آپ صلی ‌اللہ ‌علیہ ‌وآلہ ‌وسلم فرمایا کرتے تھے: ”یہ دونوں مشرکین کے ایام عید ہیں، لہٰذا میں ان کی مخالفت کرنا پسند کرتا ہوں“۔ «إِسْنَادُهُ حَسَنٌ لِذَاتِهِ، رَوَاهُ أَحْمَدُ» [مشكوة المصابيح/كتاب الصوم/حدیث: 2068]

جابر بن سمرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم ہمیں یومِ عاشورا کا روزہ رکھنے کا حکم فرمایا کرتے تھے، اس کی ہمیں ترغیب دیا کرتے تھے اور اس کے متعلق ہمیں نصیحت فرمایا کرتے تھے، جب رمضان فرض کیا گیا تو آپ صلی ‌اللہ ‌علیہ ‌وآلہ ‌وسلم نے اس کے متعلق ہمیں نہ حکم فرمایا، نہ منع کیا اور نہ ہی ہمیں اس کے متعلق نصیحت فرمائی۔ [رواہ مسلم] [مشكوة المصابيح/كتاب الصوم/حدیث: 2069]

حفصہ رضی اللہ عنہا بیان کرتی ہیں کہ چار امور ہیں جنہیں نبی صلی ‌اللہ ‌علیہ ‌وآلہ ‌وسلم ترک نہیں کیا کرتے تھے: یومِ عاشورا کا روزہ، ذوالحجہ کے دس روزے، ہر ماہ کے تین روزے اور فجر سے پہلے دو رکعتیں۔ سندہ ضعیف۔ [مشكوة المصابيح/كتاب الصوم/حدیث: 2070]

عبداللہ بن عباس رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم حضر و سفر میں ایامِ بیض (تیرہ، چودہ اور پندرہ تاریخ) کا روزہ نہیں چھوڑتے تھے۔ (اسنادہ حسن، رواہ النسائی) [مشكوة المصابيح/كتاب الصوم/حدیث: 2071]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہر چیز کی زکاۃ ہے جبکہ جسم کی زکاۃ روزہ ہے۔“ اسنادہ ضعیف۔ [مشكوة المصابيح/كتاب الصوم/حدیث: 2072]

ابوہریرہ رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم پیر اور جمعرات کا روزہ رکھا کرتے تھے، آپ سے عرض کیا گیا: اللہ کے رسول! آپ پیر اور جمعرات کا روزہ رکھتے ہیں؟ تو آپ صلی ‌اللہ ‌علیہ ‌وآلہ ‌وسلم نے فرمایا: ”بے شک پیر اور جمعرات کے روز اللہ باہم قطع تعلق کرنے والے دو آدمیوں کے سوا ہر مسلمان کو بخش دیتا ہے اور وہ فرماتا ہے: ان دونوں کو چھوڑ دو حتیٰ کہ وہ دونوں صلح کر لیں۔“ اسنادہ حسن، رواہ احمد و ابن ماجہ۔ [مشكوة المصابيح/كتاب الصوم/حدیث: 2073]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص اللہ کی رضا کی خاطر ایک روزہ رکھتا ہے تو اللہ اسے جہنم سے اس قدر دور فرما دیتا ہے جیسے ایک اڑنے والا کوا بچپن کی عمر سے اڑنا شروع کرے اور بوڑھا ہونے تک اڑتا رہے حتیٰ کہ وہ فوت ہو جائے۔“ (وہ ساری زندگی میں جتنا فاصلہ طے کرتا ہے اللہ اس شخص کو اتنی مسافت جہنم سے دور کر دیتا ہے)۔ اسنادہ ضعیف۔ [مشكوة المصابيح/كتاب الصوم/حدیث: 2074]

امام بیہقی رحمہ اللہ نے اسے سلمہ بن قیس رضی اللہ عنہ سے شعب الایمان میں روایت کیا ہے، «إِسْنَادُهُ ضَعِيفٌ» ”اس کی سند ضعیف ہے“۔ [مشكوة المصابيح/كتاب الصوم/حدیث: 2075]