ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہر نبی کی (اپنی امت کے بارے میں) ایک دعا قبول ہوتی ہے، پس ہر نبی نے دعا کرنے میں جلدی کی، جبکہ میں نے اپنی دعا کو اپنی امت کی شفاعت کے لیے روز قیامت کے لیے چھپا رکھا ہے، اور وہ (شفاعت) ان شاء اللہ ہر اس شخص کو پہنچے گی جو اس حال میں فوت ہوا ہو گا کہ اس نے اللہ کے ساتھ کسی کو شریک نہیں ٹھہرایا ہو گا۔“ مسلم، اور بخاری کی روایت اس سے مختصر ہے۔ متفق علیہ، رواہ مسلم، والبخاری (6304)۔ [مشكوة المصابيح/كتاب الدعوات/حدیث: 2223]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اے اللہ! میں نے تجھ سے ایک عہد لیا ہے بے شک جس کا تو خلاف نہیں کرے گا، میں بھی ایک انسان ہوں، میں نے جس کسی مومن کو اذیت پہنچائی ہو، میں نے اسے برا بھلا کہا ہو، لعن طعن کی ہو، اسے مارا ہو تو اس (اذیت) کو اس کے لیے باعثِ رحمت و طہارت اور باعثِ قربت بنا دے اور روزِ قیامت اس قربت کی وجہ سے تو اسے اپنا مقرب بنا لے۔“ متفق علیہ، رواہ البخاری (6361) و مسلم۔ [مشكوة المصابيح/كتاب الدعوات/حدیث: 2224]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی دعا کرے تو یوں نہ کہے: «اللَّهُمَّ اغْفِرْ لِي إِنْ شِئْتَ» ”اے اللہ! اگر تو چاہے تو مجھے بخش دے“، «اللَّهُمَّ ارْحَمْنِي إِنْ شِئْتَ» ”اگر تُو چاہے تو مجھ پر رحم فرما“، «اللَّهُمَّ ارْزُقْنِي إِنْ شِئْتَ» ”اگر تُو چاہے تو مجھے رزق عطا فرما“، بلکہ اسے چاہیے کہ وہ پورے عزم کے ساتھ دعا کرے، کیونکہ وہ جیسے چاہے کرتا ہے، اسے کوئی مجبور کرنے والا نہیں۔“ [رواہ البخاری: 7477] ۔ [مشكوة المصابيح/كتاب الدعوات/حدیث: 2225]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب تم میں سے کوئی دعا کرے تو یوں نہ کہے: «اللَّهُمَّ اغْفِرْ لِي إِنْ شِئْتَ» ”اے اللہ! اگر تو چاہے تو مجھے بخش دے“، بلکہ اسے پختہ عزم کے ساتھ اور بڑی رغبت کے ساتھ دعا کرنی چاہیے، کیونکہ کسی بھی چیز کا عطا کرنا اللہ کے لیے کوئی گراں نہیں۔“ رواہ مسلم۔ [مشكوة المصابيح/كتاب الدعوات/حدیث: 2226]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”بندہ جب تک کسی گناہ یا قطع رحمی کے بارے میں دعا نہ کرے اس کی دعا قبول ہوتی ہے، بشرطیکہ وہ جلد بازی نہ کرے۔“ عرض کیا گیا: اللہ کے رسول! جلد بازی سے کیا مراد ہے؟ آپ صلی ‌اللہ ‌علیہ ‌وآلہ ‌وسلم نے فرمایا: ”وہ کہتا ہے: میں تو بہت دعائیں کر چکا لیکن میری دعا قبول ہی نہیں ہوتی، اس صورت حال میں وہ مایوس ہو جاتا ہے اور دعا کرنا چھوڑ دیتا ہے۔“ (رواہ مسلم والبخاری: 6340) [مشكوة المصابيح/كتاب الدعوات/حدیث: 2227]

ابودرداء رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”مسلمان شخص کی اپنے (مسلمان) بھائی کے لیے وہ دعا قبول ہوتی ہے جو اس کی غیر موجودگی میں کی جاتی ہے، اور (دعا کرنے والے) کے پاس ایک فرشتہ مامور ہوتا ہے، جب وہ اپنے بھائی کے لیے دعائے خیر کرتا ہے تو وہ مامور فرشتہ «آمِينَ» ”آمین“ کہتا ہے اور کہتا ہے: «وَلَكَ بِمِثْلٍ» ”اسی مثل تمہارے لیے بھی ہو۔““ رواہ مسلم۔ [مشكوة المصابيح/كتاب الدعوات/حدیث: 2228]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اپنی اولاد اور اپنے اموال کے لیے بددعا نہ کرو، کہیں ایسا نہ ہو کہ تم کسی ایسی گھڑی میں اللہ سے دعا کر بیٹھو جس میں دعا قبول ہو جاتی ہے۔“ رواہ مسلم۔ اور ابن عباس رضی اللہ عنہما سے مروی حدیث: ”مظلوم کی بددعا سے بچو“ کتاب الزکاۃ میں ذکر کی گئی ہے۔ [مشكوة المصابيح/كتاب الدعوات/حدیث: 2229]

نعمان بن بشیر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: «الدُّعَاءُ هُوَ الْعِبَادَةُ» ”دعا ہی عبادت ہے“ پھر آپ نے یہ آیت پڑھی: ﴿وَقَالَ رَبُّكُمُ ادْعُونِي أَسْتَجِبْ لَكُمْ﴾ [سورة غافر: 60] ”تمہارے رب نے فرمایا: مجھ سے دعا کرو میں تمہاری دعا قبول کروں گا“۔ صحیح، رواہ احمد (4 / 267 ح 18542، 276 ح 18623) والترمذی (2969) وابوداؤد (1479) والنسائی (فی الکبری: 11464) وابن ماجہ (3828) وصححہ ابن حبان (2396) والحاکم (1 / 490، 491)۔ [مشكوة المصابيح/كتاب الدعوات/حدیث: 2230]

انس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: «الدُّعَاءُ مُخُّ الْعِبَادَةِ» ”دعا عبادت کا مغز ہے۔“ اسناد ضعیف، رواہ الترمذی (3371) [مشكوة المصابيح/كتاب الدعوات/حدیث: 2231]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اللہ کے ہاں دعا سے بہتر کوئی چیز نہیں۔“ (ترمذی، ابن ماجہ)۔ اور امام ترمذی رحمہ اللہ نے فرمایا: یہ حدیث حسن غریب ہے۔ اسنادہ ضعیف، رواہ الترمذی (۳۳۷۰) و ابن ماجہ (۳۸۲۹)۔ [مشكوة المصابيح/كتاب الدعوات/حدیث: 2232]