ابن عباس رضی اللہ عنہما کی روایت میں ہے، فرمایا: ”اللہ سے سیدھے ہاتھوں سے دعا کیا کرو، الٹے ہاتھوں سے دعا نہ کیا کرو، اور جب تم (دعا سے) فارغ ہو جاؤ تو ان (ہاتھوں) کو اپنے چہروں پر پھیر لیا کرو۔“ اسنادہ ضعیف، رواہ ابوداؤد (1485)۔ [مشكوة المصابيح/كتاب الدعوات/حدیث: 2243]

سلمان رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تمہارا رب بڑا حیادار، سخی داتا ہے، جب بندہ اس کے سامنے دستِ سوال دراز کرتا ہے تو اسے خالی لوٹاتے ہوئے اسے حیا آتی ہے۔“ سندہ ضعیف، رواہ الترمذی (۳۵۵۶) و ابوداؤد (۱۴۷۷) و البیہقی فی الدعوات الکبیر (۱ / ۱۳۷ ح ۱۸۰، ۱۸۱) و ابن ماجہ (۳۸۶۵)۔ [مشكوة المصابيح/كتاب الدعوات/حدیث: 2244]

عمر رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم دعا کے لیے ہاتھ اٹھایا کرتے تھے تو آپ صلی ‌اللہ ‌علیہ ‌وآلہ ‌وسلم انہیں اپنے چہرے پر پھیر کر ہی نیچے گرایا کرتے تھے۔ اسنادہ ضعیف، رواہ الترمذی (3385) و الادب المفرد (609)۔ [مشكوة المصابيح/كتاب الدعوات/حدیث: 2245]

عائشہ رضی اللہ عنہا بیان کرتی ہیں کہ رسول اللہ صلی ‌اللہ ‌علیہ ‌وآلہ ‌وسلم جامع دعائیں کرنا پسند کرتے تھے اور ان کے علاوہ باقی دعائیں چھوڑ دیا کرتے تھے۔ اسنادہ صحیح، رواہ ابوداؤد (1482)، وصحیح ابن حبان (2412) اور الحاکم (1/539)۔ [مشكوة المصابيح/كتاب الدعوات/حدیث: 2246]

عبداللہ بن عمرو رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”کسی شخص کے لیے اس کی عدم موجودگی میں کی گئی دعا بہت جلد قبول ہوتی ہے۔“ اسنادہ ضعیف، رواہ الترمذی (1980) و ابوداؤد (1535)۔ [مشكوة المصابيح/كتاب الدعوات/حدیث: 2247]

عمر بن خطاب رضی اللہ عنہ بیان کرتے ہیں، میں نے عمرہ کے لیے نبی صلی ‌اللہ ‌علیہ ‌وآلہ ‌وسلم سے اجازت طلب کی تو آپ صلی ‌اللہ ‌علیہ ‌وآلہ ‌وسلم نے مجھے اجازت عطا کی اور فرمایا: ”پیارے بھائی! ہمیں اپنی دعا میں یاد رکھنا اور ہمیں بھول نہ جانا۔“ آپ صلی ‌اللہ ‌علیہ ‌وآلہ ‌وسلم نے ایسی بات فرمائی جس کے بدلے میں پوری دنیا کا حصول میرے لیے باعثِ مسرت نہیں۔ ابوداؤد، ترمذی۔ اور امام ترمذی کی روایت «وَلَا تَنْسَنَا» ”اور ہمیں بھول نہ جانا“ کے الفاظ پر ختم ہو جاتی ہے۔ اسنادہ ضعیف، رواہ ابوداؤد (1498) و الترمذی (3562)۔ [مشكوة المصابيح/كتاب الدعوات/حدیث: 2248]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین آدمیوں کی دعا ضرور قبول ہوتی ہے: روزہ دار جب وہ افطار کے وقت دعا کرتا ہے، عادل بادشاہ اور دعائے مظلوم، اللہ اس (دعا) کو بادلوں کے اوپر اٹھا لیتا ہے، اس کے لیے آسمان کے دروازے کھول دیے جاتے ہیں اور رب فرماتا ہے: میری عزت کی قسم! میں ضرور تمہاری مدد کروں گا خواہ کچھ دیر سے ہو۔“ اسنادہ حسن، رواہ الترمذی (3598)، وابن ماجہ (1753)، وصحیح ابن خزیمہ (1901)، وابن حبان (2407، 2408)۔ [مشكوة المصابيح/كتاب الدعوات/حدیث: 2249]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تین دعائیں ایسی ہیں جن کی قبولیت میں کوئی شک نہیں: والد کی دعا، مسافر کی دعا اور مظلوم کی دعا۔“ حسن، رواہ الترمذی (1905) وابوداؤد (1536) وابن ماجہ (3862) وصحیح ابن حبان (2406)۔ [مشكوة المصابيح/كتاب الدعوات/حدیث: 2250]

انس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تم میں سے ہر شخص کو اپنی تمام ضرورتیں اپنے رب سے مانگنی چاہئیں، حتیٰ کہ جب اس کے جوتے کا تسمہ ٹوٹ جائے تو اس کے بارے میں بھی اسی سے سوال کرنا چاہیے۔“ [اسنادہ حسن، رواہ الترمذی: 8/604] [مشكوة المصابيح/كتاب الدعوات/حدیث: 2251]

اور ثابت بنانی رحمہ اللہ سے مروی مرسل روایت میں اتنا اضافہ ہے: ”حتیٰ کہ وہ نمک بھی اس سے مانگے اور حتیٰ کہ جب اس کا تسمہ ٹوٹ جائے تو وہ بھی اس سے مانگے۔“ حسن، رواہ الترمذی (9 / 3604)۔ [مشكوة المصابيح/كتاب الدعوات/حدیث: 2252]