انس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم دورانِ دعا اپنے ہاتھ اس قدر بلند فرماتے کہ آپ صلی ‌اللہ ‌علیہ ‌وآلہ ‌وسلم کی بغلوں کی سفیدی نظر آنے لگتی۔ صحیح، رواہ البیہقی فی الدعوات الکبیر (1/ 138، ح: 182) و مسلم، و احمد (3/ 259)۔ [مشكوة المصابيح/كتاب الدعوات/حدیث: 2253]

سہل بن سعد رضی اللہ عنہ نبی کریم صلی ‌اللہ ‌علیہ ‌وآلہ ‌وسلم سے روایت کرتے ہیں کہ آپ صلی ‌اللہ ‌علیہ ‌وآلہ ‌وسلم اپنے ہاتھوں کی انگلیاں کندھوں کے برابر کیا کرتے تھے اور دعا فرماتے تھے۔ اسنادہ حسن، رواہ البیہقی فی الدعوات الکبیر (1/140 ح 185) وصححہ الحاکم (1/535، 536 ح 1964) وابوداؤد (1105)۔ [مشكوة المصابيح/كتاب الدعوات/حدیث: 2254]

سائب بن یزید رضی اللہ عنہما اپنے والد سے روایت کرتے ہیں کہ جب نبی صلی ‌اللہ ‌علیہ ‌وآلہ ‌وسلم دعا کیا کرتے تھے تو آپ ہاتھ اٹھاتے اور پھر اپنے ہاتھ چہرے پر پھیر لیتے تھے۔ امام بیہقی رحمہ اللہ نے تینوں احادیث ”الدعوات الکبیر“ میں روایت کی ہیں۔ اسنادہ ضعیف، رواہ البیہقی فی الدعوات الکبیر (1 / 139، 140 ح 181) و ابوداؤد (1492)۔ [مشكوة المصابيح/كتاب الدعوات/حدیث: 2255]

عکرمہ رحمہ اللہ ابن عباس رضی اللہ عنہما سے بیان کرتے ہیں، «الْمَسْأَلَةُ» ”دعا (کا ادب)“ یہ ہے کہ تم اپنے ہاتھ کندھوں یا تقریباً کندھوں کے برابر اٹھاؤ، «الِاسْتِغْفَارُ» ”طلبِ مغفرت (کا ادب)“ یہ ہے کہ تم ایک انگلی (انگشتِ شہادت) کے ساتھ اشارہ کرو اور «الِابْتِهَالُ» ”تضرع و عاجزی“ یہ ہے کہ تم اپنے دونوں ہاتھ دراز کر دو۔ اور ایک روایت میں ہے، فرمایا: ”تضرع و عاجزی اس طرح ہے“ اور انہوں نے اپنے ہاتھ اس قدر بلند کیے اور ہاتھوں کی پشت کو اپنے چہرے کی طرف کیا۔ (حسن، رواہ ابوداؤد: 1489، 1490) [مشكوة المصابيح/كتاب الدعوات/حدیث: 2256]

ابن عمر رضی اللہ عنہما سے روایت ہے کہ وہ فرمایا کرتے تھے: تمہارا (دعا کے لیے) ہاتھ اٹھانا بدعت ہے، رسول اللہ صلی ‌اللہ ‌علیہ ‌وآلہ ‌وسلم اس (یعنی) سینے سے اوپر ہاتھ نہیں اٹھاتے تھے۔ «إِسْنَادُهُ ضَعِيفٌ»، «رَوَاهُ أَحْمَدُ» (2/61، ح: 5264)۔ [مشكوة المصابيح/كتاب الدعوات/حدیث: 2257]

ابی بن کعب رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم کسی کو یاد فرماتے تو اس کے لیے دعا فرماتے اور پہلے اپنے لیے کرتے۔ (ترمذی)۔ اور فرمایا: یہ حدیث حسن غریب صحیح ہے۔ صحیح، رواہ الترمذی (3385) و ابوداؤد (3984)۔ [مشكوة المصابيح/كتاب الدعوات/حدیث: 2258]

ابوسعید خدری رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے فرمایا: ”جب کوئی مسلمان کوئی ایسی دعا کرتا ہے جس میں گناہ اور قطع رحمی نہ ہو تو اللہ اس وجہ سے تین چیزوں میں سے کوئی ایک اسے عطا فرما دیتا ہے: یا تو اس کی دعا فوراً قبول فرما لیتا ہے یا اسے اس کے لیے آخرت میں ذخیرہ کر لیتا ہے یا پھر اس کی مثل تکلیف اس سے دور فرما دیتا ہے“۔ صحابہ رضی اللہ عنہم نے عرض کیا: تب تو ہم زیادہ دعائیں کریں گے، آپ صلی ‌اللہ ‌علیہ ‌وآلہ ‌وسلم نے فرمایا: ”اللہ (دعائیں قبول کرنے میں) بہت زیادہ ہے“۔ اسنادہ حسن، رواہ احمد (۳ / ۱۸ ح ۱۱۱۵۰) و عبد بن حمید (۹۳۷) و البخاری فی الادب المفرد (۷۱۰) و صححہ الحاکم (۱ / ۴۶۳)۔ [مشكوة المصابيح/كتاب الدعوات/حدیث: 2259]

عبداللہ بن عباس رضی اللہ عنہما نبی صلی ‌اللہ ‌علیہ ‌وآلہ ‌وسلم سے روایت کرتے ہیں، آپ صلی ‌اللہ ‌علیہ ‌وآلہ ‌وسلم نے فرمایا: ”پانچ دعائیں ہیں جو قبول کی جاتی ہیں: مظلوم کی دعا حتیٰ کہ وہ انتقام لے لے، حاجی کی دعا حتیٰ کہ وہ واپس آ جائے، مجاہد کی دعا حتیٰ کہ وہ (جہاد سے) فارغ ہو جائے، مریض کی دعا حتیٰ کہ وہ صحت یاب ہو جائے اور بھائی کی دعا جو وہ اپنے (مسلمان) بھائی کے لیے اس کی عدم موجودگی میں کرتا ہے۔“ پھر فرمایا: ”ان دعاؤں میں بھائی کی غائبانہ دعا بہت جلد قبول ہوتی ہے۔“ (إسنادہ ضعیف جدا، رواہ البیہقی فی الدعوات الکبیر (لم اجدہ و رواہ فی شعب الایمان: ۱۱۲۵، نسخۃ محققۃ: ۱۰۸۷)۔) [مشكوة المصابيح/كتاب الدعوات/حدیث: 2260]

ابوہریرہ اور ابوسعید رضی اللہ عنہما بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب کچھ لوگ بیٹھ کر اللہ کا ذکر کرتے ہیں تو فرشتے انہیں گھیر لیتے ہیں، رحمت انہیں ڈھانپ لیتی ہے، ان پر سکینت نازل ہوتی ہے اور اللہ تعالیٰ اپنے ہاں فرشتوں کے پاس ان کا تذکرہ فرماتا ہے۔“ (رواہ مسلم) [مشكوة المصابيح/كتاب الدعوات/حدیث: 2261]

ابوہریرہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم مکہ کی شاہ راہ پر محوِ سفر تھے، آپ صلی ‌اللہ ‌علیہ ‌وآلہ ‌وسلم جُمدان نامی پہاڑ کے پاس سے گزرے تو فرمایا: «سِيرُوا هَذَا جُمْدَانُ» ”چلتے جاؤ یہ جمدان ہے“، پھر فرمایا: «سَبَقَ الْمُفَرِّدُونَ» ”مفردون سبقت لے گئے“، صحابہ کرام رضی اللہ عنہم نے عرض کیا: اے اللہ کے رسول! مفردون کون لوگ ہیں؟ آپ صلی ‌اللہ ‌علیہ ‌وآلہ ‌وسلم نے فرمایا: «الذَّاكِرُونَ اللهَ كَثِيرًا وَالذَّاكِرَاتُ» ”اللہ کا کثرت سے ذکر کرنے والے مرد اور عورتیں“۔ (رواہ مسلم) [مشكوة المصابيح/كتاب الدعوات/حدیث: 2262]