عبداللہ بن عمرو رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ” «سُبْحَانَ اللّٰهِ» ”سبحان اللہ“ کہنا نصف میزان ہے جبکہ «الْحَمْدُ لِلّٰهِ» ”الحمد للہ“ کہنا اس کو بھر دیتا ہے، اور «لَا إِلٰهَ إِلَّا اللّٰهُ» ”لا الہ الا اللہ“ کسی حجاب یا رکاوٹ کے بغیر اللہ تک پہنچ جاتا ہے۔“ ترمذی رحمہ اللہ، اور انہوں نے کہا: یہ حدیث غریب ہے اور اس کی سند قوی نہیں۔ [سنن ترمذی: 3518، 3519، سندہ ضعیف] [مشكوة المصابيح/كتاب الدعوات/حدیث: 2313]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب کوئی بندہ کبیرہ گناہوں سے بچتے ہوئے اخلاص کے ساتھ «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ کہتا ہے تو اس کے لیے آسمان کے دروازے کھول دیے جاتے ہیں حتیٰ کہ وہ عرش تک پہنچ جاتا ہے۔“ ترمذی، اور فرمایا: یہ حدیث غریب ہے۔ اسنادہ حسن، رواہ الترمذی (3590)۔ [مشكوة المصابيح/كتاب الدعوات/حدیث: 2314]

عبداللہ بن مسعود رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”شبِ معراج ابراہیم علیہ السلام سے میری ملاقات ہوئی تو انہوں نے فرمایا: ”اے محمد (صلی ‌اللہ ‌علیہ ‌وآلہ ‌وسلم)! میری طرف سے اپنی امت کو سلام کہنا اور انہیں بتانا کہ جنت کی مٹی بہت اچھی ہے اور اس کا پانی شیریں ہے لیکن وہ ایک صاف میدان ہے، اور «سُبْحَانَ اللّٰهِ وَالْحَمْدُ لِلّٰهِ وَلَا إِلٰهَ إِلَّا اللّٰهُ وَاللّٰهُ أَكْبَرُ» کہنا اس میں درخت لگانا ہے۔““ ترمذی، اور فرمایا: یہ حدیث سند کے لحاظ سے حسن غریب ہے۔ اسنادہ ضعیف، رواہ الترمذی (3462) واحمد (5 / 418 ح 23948)۔ [مشكوة المصابيح/كتاب الدعوات/حدیث: 2315]

یُسیرہ رضی اللہ عنہا جو کہ مہاجرات میں سے تھیں بیان کرتی ہیں، رسول اللہ صلی ‌اللہ ‌علیہ ‌وآلہ ‌وسلم نے ہمیں فرمایا: ” «سُبْحَانَ اللهِ»، «لَا إِلٰهَ إِلَّا اللهُ» اور «سُبْحَانَ الْمَلِكِ الْقُدُّوسِ» پڑھنے کا التزام (اہتمام) کرو اور انہیں انگلیوں کے پوروں پر شمار کرو کیونکہ (روزِ قیامت) ان سے پوچھا جائے گا اور وہ کلام کریں گے، غافل نہ ہونا ورنہ تمہیں رحمت سے محروم کر دیا جائے گا۔“ ترمذی، ابوداؤد۔ اسنادہ حسن، رواہ الترمذی (3583) و ابوداؤد (1501)۔ [مشكوة المصابيح/كتاب الدعوات/حدیث: 2316]

سعد بن ابی وقاص رضی اللہ عنہ بیان کرتے ہیں کہ ایک اعرابی رسول اللہ صلی ‌اللہ ‌علیہ ‌وآلہ ‌وسلم کی خدمت میں حاضر ہوا تو اس نے عرض کیا: مجھے کوئی کلام سکھائیں جسے میں پڑھا کروں، آپ صلی ‌اللہ ‌علیہ ‌وآلہ ‌وسلم نے فرمایا: ”کہو: «لَا إِلٰهَ إِلَّا اللّٰهُ وَحْدَهُ لَا شَرِيْكَ لَهٗ، اَللّٰهُ أَكْبَرُ كَبِيْرًا، وَالْحَمْدُ لِلّٰهِ كَثِيْرًا، سُبْحَانَ اللّٰهِ رَبِّ الْعَالَمِيْنَ، لَا حَوْلَ وَلَا قُوَّةَ إِلَّا بِاللّٰهِ الْعَزِيْزِ الْحَكِيْمِ» ”اللہ کے سوا کوئی معبود نہیں، وہ یکتا ہے، اس کا کوئی شریک نہیں، اللہ بہت بڑا ہے، اللہ کے لیے بہت زیادہ حمد ہے، پاک ہے اللہ جہانوں کا پروردگار، گناہوں سے بچنا اور نیکی کرنا محض اللہ غالب حکمت والے کی توفیق ہی سے ممکن ہے۔““ اس اعرابی نے عرض کیا: یہ کلمات تو میرے رب کے لیے ہوئے تو میرے لیے کیا ہے؟ آپ صلی ‌اللہ ‌علیہ ‌وآلہ ‌وسلم نے فرمایا: ”کہو: «اَللّٰهُمَّ اغْفِرْ لِيْ وَارْحَمْنِيْ وَاهْدِنِيْ وَارْزُقْنِيْ» ”اے اللہ! مجھے بخش دے، مجھ پر رحم فرما، مجھے ہدایت نصیب فرما، مجھے رزق عطا فرما۔““ راوی کو «وَعَافِنِيْ» ”اور مجھے عافیت میں رکھ“ کے الفاظ میں شک ہے۔ [رواہ مسلم] [مشكوة المصابيح/كتاب الدعوات/حدیث: 2317]

انس رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم ایک درخت کے پاس سے گزرے جس کے پتے خشک ہو چکے تھے، آپ صلی ‌اللہ ‌علیہ ‌وآلہ ‌وسلم نے اس پر اپنی لاٹھی ماری تو پتے گر پڑے، آپ صلی ‌اللہ ‌علیہ ‌وآلہ ‌وسلم نے فرمایا: ” «الْحَمْدُ لِلّٰهِ، وَسُبْحَانَ اللّٰهِ، وَلَا إِلٰهَ إِلَّا اللّٰهُ، وَاللّٰهُ أَكْبَرُ» بندے کے گناہ گرا دیتے ہیں جیسے اس درخت کے پتے گر رہے ہیں۔“ ترمذی، اور فرمایا: یہ حدیث غریب ہے۔ حسن، رواہ الترمذی (3533) و احمد (3 / 152) و البخاری فی الادب المفرد (634)۔ [مشكوة المصابيح/كتاب الدعوات/حدیث: 2318]

مکحول، ابوہریرہ رضی اللہ عنہ سے روایت کرتے ہیں، انہوں نے کہا: رسول اللہ صلی ‌اللہ ‌علیہ ‌وآلہ ‌وسلم نے مجھے فرمایا: ” «لَا حَوْلَ وَلَا قُوَّةَ إِلَّا بِاللّٰہِ» ”اللہ کی مدد کے بغیر (برائی سے) بچنے کی کوئی طاقت ہے نہ (نیکی کرنے کی) کوئی قوت“ کثرت سے پڑھا کرو، کیونکہ وہ جنت کا خزانہ ہے۔“ مکحول نے فرمایا: جو شخص «لَا حَوْلَ وَلَا قُوَّةَ إِلَّا بِاللّٰہِ وَلَا مَنْجَأَ مِنَ اللّٰہِ إِلَّا إِلَیْہِ» ”اللہ کی مدد کے بغیر (برائی سے) بچنے کی کوئی طاقت ہے نہ (نیکی کرنے کی) کوئی قوت، اور اللہ کے سوا کوئی جائے پناہ نہیں مگر اسی کی طرف“ پڑھتا ہے تو اللہ اس سے ستر قسم کی تکلیفیں دور فرما دیتا ہے اور ان میں سے سب سے کم فقر ہے۔ اسے ترمذی نے روایت کیا، اور امام ترمذی رحمہ اللہ نے فرمایا: اس حدیث کی سند متصل نہیں، مکحول نے ابوہریرہ رضی اللہ عنہ سے نہیں سنا۔ اس کی سند ضعیف ہے، اسے ترمذی (3601) اور ابن حبان (2338) نے روایت کیا ہے۔ [مشكوة المصابيح/كتاب الدعوات/حدیث: 2319]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ” «لَا حَوْلَ وَلَا قُوَّةَ إِلَّا بِاللَّهِ» ننانوے بیماریوں کی دوا ہے اور ان میں سے سب سے ہلکی بیماری غم ہے۔“ اسنادہ ضعیف، رواہ البیہقی فی الدعوات الکبیر (1 / 128 ح 171) و صححہ الحاکم (1 / 542)۔ [مشكوة المصابيح/كتاب الدعوات/حدیث: 2320]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”کیا میں تمہیں ایسا کلمہ نہ بتاؤں، جو کہ عرش کے نیچے جنت کا خزانہ ہے، اور وہ «لَا حَوْلَ وَلَا قُوَّةَ إِلَّا بِاللَّهِ» ”اللہ کی مدد کے بغیر نہ برائی سے بچنے کی ہمت ہے اور نہ نیکی کرنے کی طاقت“ ہے، اللہ تعالیٰ فرماتا ہے: میرے بندے نے اطاعت اختیار کر لی اور اپنے آپ کو اللہ کے سپرد کر دیا۔“ امام بیہقی رحمہ اللہ نے دونوں روایتیں الدعوات الکبیر میں روایت کی ہیں۔ صحیح، رواہ البیھقی فی الدعوات الکبیر (1 / 101 ح 135) و احمد (2 / 298، 363) و النسائی (13 و الکبریٰ: 9841) و صححہ الحاکم (1 / 21) و احمد (2 / 520) و النسائی (358) و الحاکم (1 / 517) و فتح الباری (11 / 501)۔ [مشكوة المصابيح/كتاب الدعوات/حدیث: 2321]

ابن عمر رضی اللہ عنہما سے روایت ہے کہ انہوں نے فرمایا: «سُبْحَانَ اللّٰهِ» کہنا مخلوق کی عبادت ہے، «اَلْحَمْدُ لِلّٰهِ» کلمۂ شکر ہے، «لَا إِلٰهَ إِلَّا اللّٰهُ» کلمۂ اخلاص ہے، «اَللّٰهُ أَكْبَرُ» زمین و آسمان کے خلا کو بھر دیتا ہے، اور جب بندہ «لَا حَوْلَ وَلَا قُوَّةَ إِلَّا بِاللّٰهِ» پڑھتا ہے تو اللہ تعالیٰ فرماتا ہے: ”اس نے اطاعت اختیار کی اور اپنے آپ کو میرے سپرد کر دیا۔“ رواہ رزین، لم اجدہ و رواہ الحاکم (1/ 21) و احمد (2/ 298، 363، 335، 355، 403)۔ [مشكوة المصابيح/كتاب الدعوات/حدیث: 2322]