عبداللہ بن عمر رضی اللہ عنہما سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اللہ تعالیٰ نے تین قسم کے لوگوں: ہمیشہ شراب پینے والے، والدین کے نافرمان اور دیوث، جو اپنے اہل و عیال میں زنا برقرار رکھنے والا ہو، پر جنت کو حرام قرار دے دیا ہے۔“ (اسنادہ حسن، رواہ احمد والنسائی)۔ [مشكوة المصابيح/كتاب الحدود/حدیث: 3655]

ابوموسیٰ اشعری رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے فرمایا: ”تین قسم کے لوگ: ہمیشہ شراب پینے والا، قطع رحمی کرنے والا اور جادو کا یقین کرنے والا، جنت میں نہیں جائیں گے۔“ سندہ ضعیف، رواہ احمد رحمہ اللہ۔ [مشكوة المصابيح/كتاب الحدود/حدیث: 3656]

ابن عباس رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”شراب نوشی پر دوام اختیار کرنے والا اگر (اسی حالت میں) فوت ہو جائے تو وہ اللہ تعالیٰ سے بت کے پجاری کی طرح ملاقات کرے گا۔“ حسن، رواہ احمد۔ [مشكوة المصابيح/كتاب الحدود/حدیث: 3657]

امام ابن ماجہ رحمہ اللہ نے ابوہریرہ رضی اللہ عنہ سے روایت کیا ہے۔ حسن، «رَوَاهُ ابْنُ مَاجَهْ» ۔ [مشكوة المصابيح/كتاب الحدود/حدیث: 3658]

امام بیہقی رحمہ اللہ نے «شُعَبُ الْإِيمَانِ» میں محمد بن عبداللہ «عَنْ أَبِيهِ» ”اپنے والد سے“ کی سند سے روایت کیا ہے، اور امام بیہقی رحمہ اللہ نے کہا: امام بخاری رحمہ اللہ نے محمد بن عبداللہ «عَنْ أَبِيهِ» ”اپنے والد سے“ سے «التَّارِيخُ» میں ذکر کیا ہے۔ حسن، اسے بیہقی رحمہ اللہ نے «شُعَبُ الْإِيمَانِ» میں روایت کیا ہے۔ [مشكوة المصابيح/كتاب الحدود/حدیث: 3659]

ابوموسیٰ رضی اللہ عنہ سے روایت ہے کہ وہ کہا کرتے تھے: میں اس بات کی پرواہ نہیں کرتا کہ میں شراب پی لوں یا اللہ کے سوا اس ستون کی پوجا کر لوں۔ [اس کی سند صحیح اور یہ موقوف ہے، اسے امام نسائی رحمہ اللہ نے روایت کیا ہے] ۔ [مشكوة المصابيح/كتاب الحدود/حدیث: 3660]