انس رضی اللہ عنہ بیان کرتے ہیں کہ مونچھیں کترانے، ناخن تراشنے، بغلوں کے بال اکھاڑنے اور زیرِ ناف بال مونڈنے کے متعلق ہمارے لیے وقت مقرر کیا گیا کہ ”ہم (انہیں) چالیس روز سے زیادہ نہ چھوڑیں۔“ رواہ مسلم۔ [مشكوة المصابيح/كتاب اللباس/حدیث: 4422]

ابوہریرہ رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے فرمایا: ”یہود و نصاریٰ خضاب نہیں لگاتے، تم ان کی مخالفت کرو۔“ متفق علیہ۔ [مشكوة المصابيح/كتاب اللباس/حدیث: 4423]

جابر رضی اللہ عنہ بیان کرتے ہیں کہ فتح مکہ کے روز ابو قحافہ (ابوبکر رضی اللہ عنہما کے والد عثمان بن عامر) کو لایا گیا تو ان کا سر اور ان کی داڑھی «ثغامہ» (سفید گھاس) کی طرح سفید تھی۔ نبی صلی ‌اللہ ‌علیہ ‌وآلہ ‌وسلم نے فرمایا: ”اس کی سفیدی کو کسی دوسرے رنگ میں تبدیل کرو اور سیاہ رنگ سے اجتناب کرو۔“ [رواہ مسلم] [مشكوة المصابيح/كتاب اللباس/حدیث: 4424]

ابن عباس رضی اللہ عنہما بیان کرتے ہیں، جس معاملے میں نبی صلی ‌اللہ ‌علیہ ‌وآلہ ‌وسلم کو حکم نہ ملتا تو آپ اس میں اہل کتاب سے موافقت کرنا پسند فرماتے تھے۔ اہل کتاب اپنے بال سیدھے چھوڑتے تھے جبکہ مشرکین اپنے بالوں کی مانگ نکالا کرتے تھے، نبی صلی ‌اللہ ‌علیہ ‌وآلہ ‌وسلم نے اپنی پیشانی کے بال سیدھے چھوڑے، پھر بعد میں مانگ نکالی۔ متفق علیہ۔ [مشكوة المصابيح/كتاب اللباس/حدیث: 4425]

نافع، ابن عمر رضی اللہ عنہما سے روایت کرتے ہیں، انہوں نے کہا: میں نے نبی صلی ‌اللہ ‌علیہ ‌وآلہ ‌وسلم کو «الْقَزَعِ» ”قزع“ سے منع فرماتے ہوئے سنا۔ نافع سے پوچھا گیا: «الْقَزَعُ» ”قزع“ کیا ہے؟ انہوں نے فرمایا: بچے کے سر کے کچھ حصے کو مونڈ دیا جائے اور کچھ کو چھوڑ دیا جائے۔ (بخاری و مسلم)۔ اور بعض محدثین نے اس تفسیر کو حدیث کے ساتھ ملا دیا ہے۔ متفق علیہ۔ [مشكوة المصابيح/كتاب اللباس/حدیث: 4426]

ابن عمر رضی اللہ عنہما سے روایت ہے کہ نبی صلی ‌اللہ ‌علیہ ‌وآلہ ‌وسلم نے ایک بچہ دیکھا جس کے سر کا کچھ حصہ مونڈ دیا گیا تھا اور کچھ چھوڑ دیا گیا تھا، آپ صلی ‌اللہ ‌علیہ ‌وآلہ ‌وسلم نے انہیں اس سے منع کر دیا اور فرمایا: ”سارا (سر) مونڈو یا سارا چھوڑ دو۔“ [رواہ مسلم] [مشكوة المصابيح/كتاب اللباس/حدیث: 4427]

ابن عباس رضی اللہ عنہما بیان کرتے ہیں، نبی صلی ‌اللہ ‌علیہ ‌وآلہ ‌وسلم نے عورتوں کے ساتھ مشابہت کرنے والے مردوں اور مردوں کے ساتھ مشابہت کرنے والی عورتوں پر لعنت فرمائی، اور فرمایا: ”انہیں اپنے گھروں سے نکال دو۔“ رواہ البخاری۔ [مشكوة المصابيح/كتاب اللباس/حدیث: 4428]

ابن عباس رضی اللہ عنہما بیان کرتے ہیں کہ نبی کریم صلی ‌اللہ ‌علیہ ‌وآلہ ‌وسلم نے فرمایا: ”اللہ نے عورتوں سے مشابہت کرنے والے مردوں اور مردوں سے مشابہت کرنے والی عورتوں پر لعنت فرمائی ہے۔“ رواہ البخاری۔ [مشكوة المصابيح/كتاب اللباس/حدیث: 4429]

ابن عمر رضی اللہ عنہما سے روایت ہے کہ نبی صلی ‌اللہ ‌علیہ ‌وآلہ ‌وسلم نے ”بالوں میں بال جوڑنے والی اور بال جڑوانے والی پر، اور بدن گودنے والی اور گدوانے والی پر لعنت فرمائی۔“ متفق علیہ۔ [مشكوة المصابيح/كتاب اللباس/حدیث: 4430]

عبداللہ بن مسعود رضی اللہ عنہما بیان کرتے ہیں: ”اللہ تعالیٰ نے بدن گودنے والیوں اور بدن گدوانے والیوں پر، (چہرے اور پلکوں وغیرہ کے) بال نوچنے والیوں اور حسن کی خاطر دانتوں کو باریک و تیز کرنے والیوں پر، اللہ کی تخلیق کو بدلنے والیوں پر لعنت فرمائی ہے۔“ عبداللہ بن مسعود رضی اللہ عنہما کے پاس ایک عورت آئی تو اس نے کہا: مجھے پتہ چلا ہے کہ آپ نے ایسی ایسی عورتوں پر لعنت کی ہے؟ انہوں نے فرمایا: ”مجھے کیا ہے کہ جس پر رسول اللہ صلی ‌اللہ ‌علیہ ‌وآلہ ‌وسلم نے لعنت کی ہو اور میں اس پر لعنت نہ کروں؟ جبکہ وہ اللہ کی کتاب میں ہے۔“ اس عورت نے کہا: میں نے پورا قرآن پڑھا ہے لیکن جو آپ کہتے ہیں، میں نے وہ بات اس میں نہیں پائی۔ انہوں نے فرمایا: ”اگر تم نے اسے پڑھا ہوتا تو تم یہ بات اس میں پا لیتی، کیا تم نے یہ نہیں پڑھا: ﴿وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا﴾ [سورة الحشر: 7] ؟“ اس نے کہا: کیوں نہیں، میں نے اسے پڑھا ہے۔ انہوں نے فرمایا: ”تو آپ صلی ‌اللہ ‌علیہ ‌وآلہ ‌وسلم نے اس سے منع فرمایا ہے۔“ متفق علیہ۔ [مشكوة المصابيح/كتاب اللباس/حدیث: 4431]