عمار بن یاسر رضی اللہ عنہما بیان کرتے ہیں، میں سفر سے اپنے اہل خانہ کے پاس واپس آیا تو میرے ہاتھ پھٹ گئے تھے، انہوں (اہل خانہ) نے میرے زعفران کی خوشبو لگا دی، میں صبح کے وقت نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوا اور آپ کو سلام کیا، آپ صلی ‌اللہ ‌علیہ ‌وآلہ ‌وسلم نے مجھے سلام کا جواب نہ دیا اور فرمایا: ”جاؤ اور اسے اپنے (بدن) سے دھو ڈالو۔“ سندہ ضعیف، رواہ ابوداؤد۔ [مشكوة المصابيح/كتاب اللباس/حدیث: 4442]

ابوہریرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”مردوں کی خوشبو وہ ہے جس کی خوشبو ہو مگر رنگ نہ ہو، جبکہ خواتین کی خوشبو وہ ہے جس کا رنگ ہو مگر اس کی مہک نہ ہو۔“ (سندہ ضعیف، رواہ الترمذی والنسائی)۔ [مشكوة المصابيح/كتاب اللباس/حدیث: 4443]

انس رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم کے پاس ایک مرکب قسم کی خوشبو تھی جس سے آپ صلی ‌اللہ ‌علیہ ‌وآلہ ‌وسلم خوشبو لگایا کرتے تھے۔ (اسنادہ حسن، رواہ ابوداؤد) [مشكوة المصابيح/كتاب اللباس/حدیث: 4444]

انس رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم اپنے سر پر بہت زیادہ تیل لگایا کرتے تھے، اپنی داڑھی میں خوب کنگھی کیا کرتے تھے اور سر کو اچھی طرح ڈھانپ کر رکھا کرتے تھے، گویا آپ کا کپڑا ایسے تھا جیسے تیلی کا کپڑا ہو۔ اسنادہ ضعیف، رواہ فی شرح السنہ۔ [مشكوة المصابيح/كتاب اللباس/حدیث: 4445]

ام ہانی رضی اللہ عنہا بیان کرتی ہیں، ایک دفعہ رسول اللہ صلی ‌اللہ ‌علیہ ‌وآلہ ‌وسلم ہمارے پاس مکہ میں تشریف لائے تو آپ کے چار گیسو تھے۔ اسنادہ ضعیف، رواہ احمد و ابوداؤد و الترمذی و ابن ماجہ۔ [مشكوة المصابيح/كتاب اللباس/حدیث: 4446]

عائشہ رضی اللہ عنہا بیان کرتی ہیں، جب میں رسول اللہ صلی ‌اللہ ‌علیہ ‌وآلہ ‌وسلم کے سر کے بالوں کی مانگ نکالتی تو میں آپ کے تالو سے بالوں کو الگ کرتی اور آپ کی پیشانی کے بالوں کو آپ کی آنکھوں کے درمیان لٹکا دیتی۔ اسنادہ حسن، رواہ ابوداؤد۔ [مشكوة المصابيح/كتاب اللباس/حدیث: 4447]

عبداللہ بن مغفل رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے ”روزانہ بلا ناغہ کنگھی کرنے سے منع فرمایا ہے“۔ سندہ ضعیف، رواہ الترمذی وابوداؤد والنسائی۔ [مشكوة المصابيح/كتاب اللباس/حدیث: 4448]

عبداللہ بن بریدہ رحمہ اللہ بیان کرتے ہیں کہ ایک آدمی نے فضالہ بن عبید رضی اللہ عنہ سے کہا: کیا وجہ ہے کہ میں آپ کے بال بکھرے ہوئے دیکھتا ہوں؟ انہوں نے کہا: کیونکہ رسول اللہ صلی ‌اللہ ‌علیہ ‌وآلہ ‌وسلم ہمیں ”زیادہ ناز و نعمت“ سے منع فرمایا کرتے تھے، اس شخص نے کہا: کیا وجہ ہے کہ میں آپ کو ننگے پاؤں دیکھتا ہوں؟ انہوں نے کہا: رسول اللہ صلی ‌اللہ ‌علیہ ‌وآلہ ‌وسلم ہمیں حکم فرمایا کرتے تھے کہ ”ہم کبھی کبھار ننگے پاؤں چلا کریں۔“ (سندہ ضعیف، رواہ ابوداؤد) [مشكوة المصابيح/كتاب اللباس/حدیث: 4449]

ابوہریرہ رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جس شخص کے بال ہوں وہ انہیں سنوار کر رکھے۔“ اسنادہ حسن، رواہ ابوداؤد۔ [مشكوة المصابيح/كتاب اللباس/حدیث: 4450]

ابوذر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”سفید بالوں (بڑھاپے) کو بدلنے والی سب سے بہترین چیز مہندی اور وسمہ ہے۔“ (اسنادہ صحیح، رواہ الترمذی وابوداؤد والنسائی) [مشكوة المصابيح/كتاب اللباس/حدیث: 4451]