حدیث حاشیہ:
جمہور علماء کے نزدیک اس میں کوئی قباحت نہیں ہے جیسے کھڑے کھڑے پیشاب کرنے میں جبکہ کوئی عذر بیٹھنے سے مانع ہو۔
بروایت مسلم آنحضرت صلی اللہ علیہ وسلم نے ایک شخص کو کھڑے کھڑے پانی پینے پر جھڑکا۔
جمہور کہتے ہیں یہ نہی تنزیہی ہے اور بیٹھ کر پانی پینا بہتر ہے۔
جو لوگ کھڑے ہو کر پانی پینا مکروہ جانتے ہیں وہ بھی اس کے قائل ہیں کہ وضو سے بچا ہوا پانی اور اسی طرح زمزم کا پانی کھڑے ہو کر پینا سنت ہے۔
وفي حدیث علی من الفوائد أن علی العالم إذا رأی الناس اجتنبوا شیئا وھو یعلم جوازہ أن یوضع لھم وجه الصواب فیه خشیة أن یطول الأمر فیظن تحریمه الخ، یعنی حضرت علی رضی اللہ عنہ کی حدیث سے یہ فائدہ ظاہر ہوا کہ کوئی عالم جب دیکھے کہ لوگ ایک جائز چیز کے کھانے سے پرہیز کرتے ہیں تو ان کے ظن فاسد کے مٹانے کو اس چیز کے کھانے کے جواز کو واضح کر دے ورنہ ایک دن عوام اسے بالکل ہی حرام سمجھنے لگ جائیں گے۔

حدیث حاشیہ:
(1)
حضرت انس رضی اللہ عنہ سے مروی ایک حدیث میں ہے کہ رسول اللہ صلی اللہ علیہ وسلم نے کسی بھی شخص کو کھڑے ہو کر پینے سے منع فرمایا ہے۔
(سنن أبي داود، الأشربة، حدیث: 3717)
اس حدیث کے پیش نظر بلا وجہ کھڑے ہو کر پینا کسی طرح مناسب نہیں۔
اس موضوع پر بکثرت احادیث آئی ہیں، بلکہ بعض احادیث میں ہے کہ اگر کوئی بھول کر کھڑے کھڑے پانی پی لے تو اسے قے کر دے۔
(صحیح مسلم، الأشربة، حدیث: 5279 (2026) (2)
ان حدیثوں سے پتا چلتا ہے کہ اسلام آرام سے بیٹھ کر پینے کی حوصلہ افزائی کرتا ہے اور رسول اللہ صلی اللہ علیہ وسلم کا معمول بھی یہی تھا کہ آپ آرام و سکون سے بیٹھ کر پانی وغیرہ پیتے تھے، ہاں کسی ضرورت کے پیش نظر کھڑے ہو کر پینا جائز ہے جیسا کہ رسول اللہ صلی اللہ علیہ وسلم ایک مرتبہ حضرت کبشہ رضی اللہ عنہا کے گھر تشریف لے گئے، گھر میں مشکیزہ لٹک رہا تھا تو آپ صلی اللہ علیہ وسلم نے اس سے کھڑے کھڑے پانی پیا۔
(جامع الترمذي، الأشربة، حدیث: 1892)
لیکن کھڑے ہو کر پینے کو معمول نہیں بنانا چاہیے۔

فوائد ومسائل:
فائدہ: جامع ترمذی کی ایک حدیث جس کو امام ترمذی نے صحیح کہا ہے۔
اس میں ہے کہ حضرت کبشہ رضی اللہ تعالیٰ عنہ نے بیان کیا کہ ر سول اللہ صلی اللہ علیہ وسلم ان کے ہاں گئے۔
گھر میں مشکیزہ لٹک رہا تھا۔
تو آپ صلی اللہ علیہ وسلم نے اس سے کھڑے کھڑے پانی نوش فرمایا۔
پھر میں نے اس مشکیزے کے منہ کا وہ حصہ (جس سے آپ صلی اللہ علیہ وسلم کا دہن مبارک مس ہوا تھا۔
) کاٹ کر رکھ لیا۔
(جامع الترمذي، الأشربة، حدیث: 1892) اس حدیث سے یہ بھی پتہ چلتا ہے کہ اگرچہ مشکیزے کو منہ لگا کر پینے کی حوصلہ شکنی کی گئی ہے۔
اور آپ صلی اللہ علیہ وسلم نے اس سے روکا ہے۔
لیکن یہ نہی نہی تحریمی نہیں۔
اسے معمول بنائے بغیر ضرورت کے وقت ایسا کیا جا سکتا ہے۔
جس طرح اگلی حدیث میں وارد ہوا۔
آپ صلی اللہ علیہ وسلم کا یہ عمل امت کےلئے آسانی پیدا کرنے کا ذریعہ ہے۔
اس طرح کا ایک واقعہ مسند احمد میں ام سلیم رضی اللہ عنہا سے بھی مروی ہے۔
(مسند أحمد: 376/6) نیز سفر حج میں بھی نبی کریم صلی اللہ علیہ وسلم نے زمزم کھڑے ہوکر پیا تھا۔
(صحیح البخاري، الحج، حدیث: 1637)