حدیث حاشیہ:
حضرت امام بخاری ؒ کا مقصد باب سے یہ بتلانا ہے کہ نبی کریم صلی اللہ علیہ وسلم کے عہد میں عید گاہ میں منبر نہیں رکھا جاتا تھا اور نماز کے لیے کوئی خاص عمارت نہ تھی۔
میدان میں عید الفطر اور بقرعید کی نماز یں پڑھی جاتی تھیں۔
مروان جب مدینہ کا حاکم ہوا تو اس نے عیدگاہ میں خطبہ کے لیے منبر بھجوایا اور عیدین میں خطبہ نماز کے بعد دینا چاہیے تھا۔
لیکن مروان نے سنت کے خلاف پہلے ہی خطبہ شروع کر دیا۔
صد افسوس کہ اسلام کی فطری سادگی جلد ہی بدل دی گئی پھر ان میں دن بدن اضافے ہوتے رہے۔
علماءاحناف نے آج کل نیا اضافہ کر ڈالا کہ نماز اورخطبہ سے قبل کچھ وعظ کرتے ہیں اور گھنٹہ آدھ گھنٹہ اس میں صرف کرکے بعد میں نماز اور خطبہ محض رسمی طور پر چند منٹوں میں ختم کر دیا جاتا ہے۔
آج کوئی کثیر بن صلت نہیں جو ان اختراعات پر نوٹس لے۔

حدیث حاشیہ:
(1)
سنت یہی ہے کہ عیدگاہ میں خطبۂ عید کے لیے منبر استعمال نہ کیا جائے کیونکہ رسول اللہ صلی اللہ علیہ وسلم کا خطبۂ عید کے متعلق یہی معمول تھا۔
کھلی جگہ میں اس کی ضرورت بھی نہیں کیونکہ ایسی جگہ میں امام کو خطبہ دیتے ہوئے ہر کوئی دیکھ سکتا ہے جبکہ مسجد میں منبر کی ضرورت ہوتی ہے کیونکہ جگہ تنگ ہونے کی بنا پر تمام سامعین خطیب کو نہیں دیکھ سکتے، اس لیے مسجد میں خطبے کے لیے منبر کا اہتمام کیا جاتا ہے۔
اس روایت سے واضح طور پر معلوم ہوتا ہے کہ رسول اللہ صلی اللہ علیہ وسلم کے زمانے میں خطبۂ عید کے لیے منبر کا اہتمام نہیں کیا جاتا تھا کیونکہ آپ نماز کی ادائیگی کے بعد رخ پھیر کر لوگوں کے بالمقابل کھڑے ہو جاتے تھے۔
ابن حبان کی روایت میں ہے کہ آپ نماز پڑھنے کی جگہ میں کھڑے ہو جاتے، بلکہ ابن خزیمہ کی روایت میں ہے کہ نماز ادا کرنے کے بعد وہیں اپنے پاؤں کے بل کھڑے ہو جاتے۔
(فتح الباري: 579/2) (2)
امام بخاری ؒ کی پیش کردہ روایت میں یہ صراحت ہے کہ پہلا شخص جس نے عیدگاہ میں منبر کا اہتمام کیا، مروان بن حکم ہے۔
اس کا مطلب یہ ہے کہ اس سے پہلے خطبۂ عید کے لیے منبر استعمال نہیں ہوتا تھا، البتہ بخاری کی بعض روایات میں ہے کہ رسول اللہ صلی اللہ علیہ وسلم خطبے سے فراغت کے بعد نیچے اترے اور خواتین کی طرف تشریف لے گئے۔
(صحیح البخاري، العیدین، حدیث: 978)
اسی طرح حضرت ابن عباس ؓ سے مروی روایت میں ”نیچے اترنے“ کے الفاظ ملتے ہیں۔
(صحیح البخاري، التفسیر، حدیث: 4898)
ان روایات سے بعض حضرات نے عیدگاہ میں منبر کے اہتمام کا مسئلہ کشید کیا ہے۔
اس کا جواب حافظ ابن قیم ؒ نے بایں الفاظ دیا ہے کہ روایات کے مطابق سب سے پہلے عیدگاہ میں خطبۂ عید کے لیے منبر کا اہتمام مروان بن حکم نے کیا تھا، پھر وہاں مستقل طور پر کچی اینٹوں کا منبر بنا دیا گیا۔
پھر اکثر روایات میں نیچے اترنے کے الفاظ نہیں ہیں، ممکن ہے کہ رسول اللہ صلی اللہ علیہ وسلم کسی اونچی جگہ پر کھڑے ہوں، پھر وہاں سے اتر کر خواتین کو خطبہ دینے کے لیے ان کے پاس گئے ہوں۔
(زادالمعاد لابن قیم: 447/1)
البتہ صحیح ابن حبان میں صراحت ہے کہ رسول اللہ صلی اللہ علیہ وسلم نے اپنی سواری پر خطبۂ عید ارشاد فرمایا۔
(صحیح ابن حبان، الصلاة، حدیث: 2825)
اس سے معلوم ہوتا ہے کہ کسی سواری وغیرہ پر بیٹھ کر خطبۂ عید مباح اور جائز ہے۔
واللہ أعلم۔

صحابہ کرام کا عید پر ایک دوسرے کو مبارکباد دینا:
➊ صحابہ کرام رضی اللہ عنہم جب عید پڑھ کر واپس آتے تو ایک دوسرے کو «تقبل اللہ منا ومنکم» کہتے تھے۔ [الجوہر النقی: 3/319، باب قول الناس فی العید تقبل اللہ منا ومنک]
”محمد بن زیاد سے روایت ہے وہ کہتے ہیں کہ میں ابو امامہ باہلی اور دیگر صحابہ کے ساتھ تھا جب وہ عید کی نماز پڑھ کر لوٹتے تو ایک دوسرے کو کہتے: اللہ تعالیٰ ہم سے بھی قبول کرے اور آپ سے بھی۔“
❀ امام احمد بن حنبل رحمہ اللہ کہتے ہیں:
”اس کی سند عمدہ ہے۔“
➋ امام بیہقی رحمہ اللہ نے اپنی سنن میں اس مضمون کی ضعیف حدیثیں ذکر کی ہیں اور اسی طرح ہیثمی رحمہ اللہ نے اس کی سند کو ضعیف کہا ہے۔ [مجمع الزوائد: 2/206، باب التهنئۃ بالعید]
➌ امام ابن قدامہ رحمہ اللہ نے فرمایا:
”امام احمد رحمہ اللہ فرماتے ہیں: اگر کوئی شخص دوسرے کو عید کے دن «تقبل اللہ منا ومنکم» کہے تو اس میں کوئی حرج نہیں۔“ [المغنی: 2/250]
◈ حرب رحمہ اللہ کہتے ہیں:
”امام احمد رحمہ اللہ سے عیدین میں لوگوں کا «تقبل اللہ منا ومنکم» کہنے کے بارے میں پوچھا گیا تو انہوں نے فرمایا: کوئی حرج نہیں۔ اہل شام ابو امامہ رضی اللہ عنہ سے اسے روایت کرتے ہیں۔ پوچھا گیا: اور واثلہ بن اسقع؟ فرمایا: ہاں۔ کہا گیا کہ عید کے دن اگر یہ کہا جائے تو آپ اسے مکروہ نہیں سمجھتے؟ تو انہوں نے کہا: نہیں۔“
➍ ابن عقیل رحمہ اللہ نے عید کی مبارک بادی کے بارے میں کچھ حدیثیں ذکر کی ہیں، ان میں سے ایک محمد بن زیاد کی حدیث ہے:
”میں ابو امامہ الباہلی اور دیگر صحابہ کے ساتھ تھا جب وہ عید سے واپس ہوتے تو ایک دوسرے کو «تقبل اللہ منا ومنک» کہتے اور امام احمد رحمہ اللہ ابو امامہ کی حدیث کی سند کو جید کہتے ہیں۔“
❀ علی بن ثابت رحمہ اللہ کہتے ہیں:
”میں مالک بن انس رحمہ اللہ سے پینتیس سال سے پوچھتا رہا ہوں، وہ کہتے ہیں: یہ مدینہ میں معروف چلا آ رہا ہے۔“
❀ امام احمد رحمہ اللہ سے روایت ہے:
”میں کسی کو ابتداء نہیں کہوں گا اور کسی نے مجھے کہا تو میں اسے جواباً کہوں گا۔“
➎ شیخ الاسلام امام ابن تیمیہ رحمہ اللہ سے عید کی مبارکبادی کے بارے میں پوچھا گیا تو انہوں نے جواب دیا:
”عید کے دن مبارکبادی کے طور پر نماز عید کے بعد ملتے وقت «تقبل اللہ منا ومنکم» (اللہ تعالیٰ ہم سے اور آپ سے قبول فرمائے) اور «أحالہ اللہ علیک» (اللہ تعالیٰ اسے تم پر دوبارہ لائے) وغیرہ کہنا تو یہ صحابہ کے ایک طائفہ سے مروی ہے کہ وہ یہ کرتے تھے اور ائمہ میں امام احمد وغیرہ نے اس کی رخصت دی ہے، لیکن امام احمد رحمہ اللہ فرماتے ہیں کہ پہل نہیں کروں گا اگر کسی نے مجھ پر پہل کی تو میں اسے جواب دوں گا اس لیے کہ تحیہ کا جواب دینا فرض ہے اور مبارکبادی کی پہل کرنی مامور بہا سنت نہیں اور نہ اس سے روکا گیا ہے، کرنے والے کے بھی مقتدا ہیں اور چھوڑنے والے کے بھی مقتدا ہیں۔“
◈ تنبیہ:
”مسجد میں شور مچانا اور معانقہ کرنا جبکہ وہیں اکٹھے رہنے والے ہوں تو یہ بدعت و معصیت ہے، اس سے اجتناب ضروری ہے۔“
فتاویٰ الدین الخالص:
[جلد 1، صفحہ 234، محدث فتویٰ]

تخریج:
«أخرجه البخاري، العيدين، باب الخروج إلي المصلي بغير منبر، حديث:956، ومسلم، صلاة العيدين، حديث:889.» تشریح:
اس حدیث سے حسب ذیل باتیں ثابت ہوتی ہیں: 1.عید گاہ میں عیدین کی نماز سے پہلے کوئی عمل آپ سے ثابت نہیں۔
2.خطبہ نماز کے بعد ہونا چاہیے۔
3. خطیب کا رخ سامعین کی طرف ہونا چاہیے۔
4.خطبہ کھڑے ہو کر دینا چاہیے‘ نیز خطیب کو اپنے خطاب میں وعظ و نصیحت کا انداز اختیار کرنا چاہیے۔
ادھر ادھر کے بے فائدہ قصے کہانیاں بیان نہیں کرنے چاہییں۔
5. سامعین کو اپنی صفوں میں بیٹھے رہنا چاہیے اور رخ امام کی جانب ہونا چاہیے۔
6. نماز عیدین مسجد میں نہیں بلکہ عیدگاہ میں ادا کرنا مسنون ہے۔
آج کل بلاعذر مسجدوں میں نماز عید پڑھنے کا عام رواج ہوگیا ہے جو بہرحال ختم ہونا چاہیے۔
7.نبی صلی اللہ علیہ وسلم نے نماز عید میں منبراستعمال نہیں فرمایا۔
صحیح بخاری میں ہے کہ سب سے پہلے مروان نے عیدگاہ میں منبر رکھوایا اور اس پر خطبہ دیا۔
(صحیح البخاري‘ العیدین‘ حدیث:۹۵۶) البتہ ابن حبان کی روایت کے مطابق نبی ٔاکرم صلی اللہ علیہ وسلم نے ایک مرتبہ اونٹنی پر بیٹھ کر خطبۂعید ضرور ارشاد فرمایا ہے جس سے سواری پر بیٹھ کر خطبہ دینا جائز ثابت ہوتا ہے۔
(صحیح ابن حبان (الإحسان): ۴ / ۲۰۱‘ رقم: ۲۸۱۴‘ وموارد الظمآن‘ رقم:۵۷۵‘ ومسند أبي یعلی: ۲ /۴۰۲‘ رقم:۱۱۸۲)