ابو عقیل رحمہ اللہ، جو بہیہ نامی عورت کے شاگرد ہیں، بیان کرتے ہیں کہ میں قاسم بن عبید اللہ رحمہ اللہ اور یحییٰ بن سعید رحمہ اللہ کے پاس بیٹھا ہوا تھا، تو یحییٰ رحمہ اللہ نے قاسم رحمہ اللہ سے کہا: ”اے ابو محمد! آپ جیسے بلند شان انسان کے لیے انتہائی بری بات ہے کہ آپ سے اس دین کے کسی مسئلہ (معاملہ) کے بارے میں دریافت کیا جائے اور آپ کے پاس اس کے بارے میں معلومات موجود نہ ہوں، اور آپ اس کو حل نہ کر سکیں، یا اس کے بارے میں علم اور نکلنے کی راہ نہ ہو۔“ قاسم رحمہ اللہ نے یحییٰ رحمہ اللہ سے پوچھا: ”یہ کیوں؟“ انہوں نے کہا: ”کیونکہ آپ ہدایت و رہنمائی کے دو ائمہ ابوبکر اور عمر رضی اللہ عنہما کے بیٹے ہیں۔“ قاسم رحمہ اللہ جواب دیتے ہیں: ”جو اللہ کے دین کی عقل و دانش رکھتا ہے، اس کے نزدیک اس سے زیادہ قبیح اور بری بات یہ ہے کہ میں بلا سند و حجت (بلا علم) بات کہوں (جواب دوں) یا غیر ثقہ ناقابل اعتبار آدمی سے روایت لوں۔“ تو یحییٰ رحمہ اللہ خاموش ہو گئے اور کچھ جواب نہ دے سکے۔ [صحيح مسلم/مقدمة/حدیث: 33]