سیدنا عبداللہ بن مسعود رضی اللہ عنہ سے روایت ہے، وہ کہتے ہیں کہ ایک جمعے کی رات ہم مسجد میں تھے کہ ایک انصاری شخص مسجد میں داخل ہوا اور کہنے لگا: ”اگر کوئی اپنی بیوی کے ساتھ کسی اجنبی کو پائے اور اس کا اظہار کرے اور بولے تو تم لوگ (تہمت کی وجہ سے) اس کو کوڑے مارو گے یا اگر قتل کر دے تو تم اس کو بھی قتل کر ڈالو گے، (قصاص میں) اور اگر وہ خاموش رہے تو انتہائی غیظ و غضب کی بات پر خاموش رہتا ہے۔ اللہ کی قسم! میں اس بارے میں رسول اللہ صلی اللہ علیہ وسلم سے ضرور دریافت کروں گا۔“ چنانچہ اگلا دن ہوا تو وہ رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم سے پوچھا اور کہنے لگا: ”اگر کوئی شخص اپنی بیوی کے ساتھ کسی اجنبی کو پائے اور پھر بولے تو آپ اسے کوڑے ماریں گے (تہمت کی وجہ سے) یا اگر قتل کر دے تو آپ اسے قتل کر دیں گے (قصاص میں) اور اگر خاموش رہے تو انتہائی غیظ و غضب کی بات پر خاموش رہتا ہے۔“ تو آپ صلی اللہ علیہ وسلم نے «اللّٰهُمَّ بَيِّنْ» ”اے اللہ! معاملہ واضح فرما دے۔“ فرمایا اور دعا کرنے لگے حتیٰ کہ لعان کی آیت ﴿وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلَّا أَنْفُسُهُمْ﴾ [سورة النور: 6] ”اور جو لوگ اپنی بیویوں کو الزام لگائیں اور ان کے پاس اپنے سوا اور کوئی گواہ نہ ہوں۔“ نازل ہوئی، چنانچہ یہی آدمی اس آفت میں مبتلا کر دیا گیا، پھر وہ اور اس کی بیوی رسول اللہ صلی اللہ علیہ وسلم کے پاس آئے، دونوں نے لعان کیا۔ مرد نے چار شہادتیں دیں کہ ”اللہ کی قسم! میں سچا ہوں۔“ اور پانچویں بار کہا: ”اگر میں جھوٹا ہوں تو مجھ پر اللہ کی لعنت ہو۔“ پھر جب وہ عورت بھی اسی طرح لعنت کے لیے تیار ہوئی تو نبی کریم صلی اللہ علیہ وسلم نے اس سے فرمایا: ”رک جاؤ (خیال کرو)۔“ مگر اس نے انکار کر دیا اور لعنت کی بد دعا کر دی۔ جب وہ دونوں چلے گئے تو آپ صلی اللہ علیہ وسلم نے فرمایا: ”شاید یہ بچہ جنے گی جو کالے رنگ اور گھنگریالے بالوں والا ہو گا۔“ چنانچہ وہ پیدا ہوا تو کالے رنگ اور گھنگریالے بالوں والا ہی تھا۔ [سنن ابي داود/كتاب تفريع أبواب الطلاق /حدیث: 2253]