سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم رمضان کے درمیانی عشرے میں اعتکاف کیا کرتے تھے۔ جب بیس راتیں گزر گئیں اور اکیسویں رات آئی، تو آپ صلی اللہ علیہ وسلم اپنی رہائش گاہ کی طرف واپس تشریف نہیں لے گئے اور جس نے آپ صلی اللہ علیہ وسلم کے ساتھ اعتکاف کیا تھا وہ واپس چلا گیا۔ نبی اکرم صلی اللہ علیہ وسلم اس مہینے میں مقیم تھے، جس میں آپ صلی اللہ علیہ وسلم اعتکاف کرتے تھے، یہاں تک کہ جب وہ رات آئی جس میں آپ صلی اللہ علیہ وسلم نے واپس جانا تھا، تو آپ صلی اللہ علیہ وسلم نے لوگوں کو خطبہ دیا اور جو اللہ کو منظور تھا انہیں حکم دیا، پھر آپ صلی اللہ علیہ وسلم نے ارشاد فرمایا: ”میں اس عشرے میں اعتکاف کیا کرتا تھا پھر مجھے یہ مناسب لگا کہ میں اس آخری عشرے میں بھی اعتکاف کروں اور جس شخص نے میرے ہمراہ اعتکاف کیا ہے وہ اپنی اعتکاف گاہ میں ٹھہرا رہے، مجھے یہ رات دکھائی گئی، لیکن پھر مجھے بھلا دی گئی، لیکن تم اسے آخری عشرے کی طاق راتوں میں تلاش کرو، میں نے خود کو (اس رات میں) پانی اور مٹی میں سجدہ کرتے ہوئے دیکھا ہے۔“ سیدنا ابوسعید خدری رضی اللہ عنہ بیان کرتے ہیں کہ ہم نے اکیسویں رات کو دیکھا کہ مسجد میں نبی اکرم صلی اللہ علیہ وسلم کی نماز کی جگہ سے پانی ٹپکنے لگا ہے، میں نے نبی اکرم صلی اللہ علیہ وسلم کو دیکھا کہ جب آپ صلی اللہ علیہ وسلم صبح کی نماز پڑھ کر فارغ ہوئے، تو آپ صلی اللہ علیہ وسلم کے چہرہ مبارک پر پانی اور مٹی لگی ہوئی تھی۔ [صحیح ابن حبان/كتاب الصوم/حدیث: 3674]