سیدنا عبد اللہ بن سائب رضی اللہ عنہ سے روایت ہے کہ انہوں نے بیان کیا کہ میں بیت اللہ کی تعمیر کرنے والوں میں شامل تھا، میں نے ایک پتھر لیا، اسے برابر کیا اور بیت اللہ کے پہلو میں رکھ دیا، وہ کہتے ہیں کہ میں (زمانہ جاہلیت میں) اس کی پوجا کیا کرتا تھا، حتیٰ کہ اگر گھر میں کوئی عمدہ چیز ہوتی تو میں اسے اس کے پاس بھیج دیتا، یہاں تک کہ ایک دن میرے پاس اچھا دودھ تھا تو میں نے اسے اس پر بہا دیا۔ پھر جب قریش نے بیت اللہ کی تعمیر کا ارادہ کیا تو حجرِ اسود رکھنے کے معاملے پر ان میں اختلاف ہو گیا، یہاں تک کہ قریب تھا کہ ان کے درمیان تلواریں چل جاتیں، پھر انہوں نے کہا کہ اپنے درمیان اس پہلے شخص کو (فیصل) بنا لو جو اس دروازے سے داخل ہوگا، چنانچہ رسول اللہ صلی اللہ علیہ وسلم داخل ہوئے تو وہ پکار اٹھے کہ یہ تو ”الامین“ ہیں (اور جاہلیت میں وہ آپ صلی اللہ علیہ وسلم کو الامین ہی کہتے تھے)۔ انہوں نے کہا: اے محمد! ہم آپ پر راضی ہیں، تو آپ صلی اللہ علیہ وسلم نے ایک کپڑا منگوایا، اسے بچھایا اور اس میں حجرِ اسود رکھ دیا، پھر ان مختلف قبائل سے فرمایا: ”تم میں سے ہر قبیلہ کپڑے کا ایک گوشہ پکڑ لے“، تو انہوں نے ایسا ہی کیا، پھر انہوں نے اسے بلند کیا اور رسول اللہ صلی اللہ علیہ وسلم نے اپنے دستِ مبارک سے اسے (مقامِ مخصوص پر) رکھ دیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ نیز اس کا ایک صحیح شاہد بھی ان کی شرط پر موجود ہے: [المستدرك على الصحيحين/أول كتاب المناسك/حدیث: 1701]