سیدنا سھل بن حنیف رضی اللہ عنہ فرماتے ہیں: رسول اللہ صلی اللہ علیہ وسلم نے صدقہ کا حکم دیا تو ایک آدمی یہ ” سحل “ لے آیا، سیدنا سفیان رضی اللہ عنہ فرماتے ہیں:” سحل “ ردی قسم کی کھجور کو کہتے ہیں۔ رسول اللہ صلی اللہ علیہ وسلم نے پوچھا: یہ کون لایا ہے؟ (اور طریقہ یہی تھا کہ) جو شخص بھی کچھ لاتا، اس کی لائی ہوئی چیز کو اس لانے والے کی طرف منسوب کیا جاتا تھا۔ چنانچہ یہ آیت نازل ہوئی: وَلَا تَیَمَّمُوا الْخَبِیْثَ مِنْہُ تُنْفِقُوْنَ وَ لَسْتُمْ بِاٰخِذِیْہِ اِلَّاآ اَنْ تُغْمِضُوْا فِیْہِ (البقرۃ: 267) ” خاص ناقص کا ارادہ مت کرو کہ دو تو اس میں سے اور تمہیں ملے تو نہ لو گے جب تک اس میں چشم پوشی نہ کرو “۔ اور رسول اللہ صلی اللہ علیہ وسلم نے ” جعرور “ اور ” صبیق “ دو رنگوں کی کھجوریں صدقہ میں وصول کرنے سے منع فرمایا۔ زہری کہتے ہیں یہ دونوں مدینہ کی کھجوروں کی خاص (گھٹیا) قسم کے رنگ ہیں۔ ٭٭ یہ حدیث زہری سے روایت کرنے میں سلیمان بن کثیر نے سفیان بن حسین کی متابعت کی ہے۔ [المستدرك على الصحيحين/كتاب التفسير/حدیث: 3161]