سیدنا عوف بن مالک رضی اللہ عنہ فرماتے ہیں: رسول اللہ صلی اللہ علیہ وسلم نکلے اور آپ کے پاس عصا بھی تھا۔ آپ نے مسجد میں کھجوروں کے چند گچھے لٹکتے دیکھے۔ ان میں ایک گچھہ گھٹیا کھجوروں کا تھا، آپ نے اس گچھہ کو چھڑی لگا کر پوچھا: اس کا مالک اگر اس سے اچھا گچھہ دیتا تو اس کو کیا نقصان ہوتا۔ یہ شخص بھی قیامت کے دن اسی طرح کی ردی کھجوریں ہی کھائے گا۔ آپ صلی اللہ علیہ وسلم نے فرمایا: خدا کی قسم! وہ اس کو چالیس سال تک ” عوافی “ کے لیے لٹکائے رکھیں گے، پھر آپ صلی اللہ علیہ وسلم نے فرمایا: کیا تم جانتے ہو کہ ” عوافی “ کس کو کہتے ہیں؟ صحابہ کرام رضوان اللہ علیہم اجمعین نے عرض کی: اللہ تعالیٰ اور اس کا رسول بہتر جانتے ہیں۔ آپ صلی اللہ علیہ وسلم نے فرمایا: درندے اور پرندے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3163]