سیدنا جابر بن عبداللہ رضی اللہ عنہما سے روایت ہے، (راوی کہتے ہیں کہ) میں نے ان سے اللہ عزوجل کے اس فرمان ﴿يُرِيدُونَ أَنْ يَخْرُجُوا مِنَ النَّارِ وَمَا هُمْ بِخَارِجِينَ مِنْهَا﴾ ”وہ آگ سے نکلنا چاہیں گے لیکن اس سے ہرگز نہیں نکل سکیں گے“ [سورة المائدة: 37] کے بارے میں پوچھا تو انہوں نے کہا: مجھے رسول اللہ صلی اللہ علیہ وسلم نے بتایا کہ اس سے مراد کفار ہیں۔ میں نے سیدنا جابر رضی اللہ عنہ سے (دوبارہ) پوچھا کہ (پھر) اللہ تعالیٰ کے اس ارشاد (کا کیا مطلب ہے): ﴿إِنَّكَ مَنْ تُدْخِلِ النَّارَ فَقَدْ أَخْزَيْتَهُ﴾ ”اے ہمارے رب! یقیناً تو نے جسے آگ میں ڈال دیا، اسے رسوا کر دیا“ [سورة آل عمران: 192] ، تو انہوں نے فرمایا: اللہ نے اسے اسی وقت رسوا کر دیا جب اسے آگ میں جلایا، بھلا کیا اس (آگ کے عذاب) سے بڑھ کر بھی کوئی رسوائی ہو سکتی ہے؟ [المستدرك على الصحيحين/كتاب التفسير/حدیث: 3212]