سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: جنت میں صرف اتنی جگہ جہاں کوڑ ڈالا جاتا ہے، دنیا اور جو کچھ اس میں ہے اس سب سے بہتر ہے۔ اگر چاہو تو یہ آیت پڑھ کر دیکھ لو: فَمَنْ زُحْزِحَ عَنِ النَّارِ وَ اُدْخِلَ الْجَنَّۃَ فَقَدْ فَازَ وَ مَا الْحَیٰوۃُ الدُّنْیَآ اِلَّا مَتَاعُ الْغُرُوْرِ (آل عمران: 185) ” جو آگ سے بچا کر جنت میں داخل کیا گیا وہ مراد کو پہنچا اور دنیا کی زندگی تو یہی دھوکے کا مال ہے “۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3209]

سیدنا حمید بن عبدالرحمن رضی اللہ عنہ کہتے ہیں: مروان نے سیدنا عبداللہ بن عباس رضی اللہ عنہما کے پاس پیغام بھیجا کہ اگر اس قانون پر عمل کیا جائے کہ ” ہر ایسے شخص کو سزا دی جائے گی جو اس چیز پر خوش ہو جو اسے دی گئی اور ایسے کاموں پر اپنی تعریف سے خوش ہو جو کام اس نے کیا ہی نہیں “ تو یہاں پر کوئی شخص سزا سے بچ نہیں سکتا، تو سیدنا عبداللہ بن عباس رضی اللہ عنہما نے فرمایا: یہ آیت تو اہلِ کتاب کے متعلق نازل ہوئی تھی کیونکہ حضور صلی اللہ علیہ وسلم کے پاس یہودی آئے تھے اور نبی اکرم صلی اللہ علیہ وسلم نے ان سے کسی چیز کے متعلق سوال کیا تو انہوں نے اس کو چھپا لیا تھا۔ پھر اس کے بعد وہ لوگ آپ کی خدمت میں آئے اور آپ نے ان سے پھر وہی سوال کیا تو اب کی بار ان کا جواب کچھ اور تھا وہ وہاں سے چلے گئے اور یہ سمجھ رہے تھے کہ انہوں نے آپ صلی اللہ علیہ وسلم کے سوال کا جواب دے (کر آپ کو مطمئن کر دیا) ہے، اس پر ان کی خواہش تھی کہ ان کی تعریف و ستائش کی جائے اور وہ اس بات پر خوش تھے کہ رسول اللہ صلی اللہ علیہ وسلم نے ان سے جو کچھ پوچھا تھا، انہوں نے وہ سب چھپا لیا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3210]

سیدنا ابن المبارک رضی اللہ عنہ کا بیان ہے سیدنا ابراہیم بن طہمان رضی اللہ عنہ نے یہ آیت پڑھی: الَّذِیْنَ یَذْکُرُوْنَ اللّٰہَ قِیَامًا وَّ قُعُوْدًا وَّ عَلٰی جُنُوْبِھِمْ (آل عمران: 191) ” جو اللہ کی یاد کرتے ہیں کھڑے اور بیٹھے اور کروٹ پر لیٹے “۔ پھر فرمایا: سیدنا عمران بن حصین رضی اللہ عنہ کو ” بواسیر “ تھی تو رسول اللہ صلی اللہ علیہ وسلم نے ان کو پہلو کے بل نماز پڑھنے کا حکم دیا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3211]

سیدنا عمرو بن دینار رضی اللہ عنہ فرماتے ہیں: میں نے سیدنا جابر بن عبداللہ رضی اللہ عنہما سے کہا: مجھے اللہ تعالیٰ کے ارشاد: یُرِیْدُوْنَ اَنْ یَّخْرُجُوْا مِنَ النَّارِ وَ مَا ھُمْ بِخٰرِجِیْنَ مِنْھَا (المائدۃ: 37) ” دوزخ سے نکلنا چاہیں گے اور وہ اس سے نہ نکلیں گے “۔ کے متعلق کچھ بتایئے۔ انہوں نے کہا: مجھے رسول اللہ صلی اللہ علیہ وسلم نے بتایا ہے (کہ اس سے مراد) کفار ہیں۔ (سیدنا عمرو رضی اللہ عنہ) کہتے ہیں، میں نے سیدنا جابر رضی اللہ عنہ سے کہا: اِنَّکَ مَنْ تُدْخِلِ النَّارَ فَقَدْ اَخْزَیْتَہٗ (آل عمران: 192) ” بیشک جسے تو دوزخ میں لے جائے اسے ضرور تو نے رسوائی دی “۔ (کا کیا مطلب ہے؟) انہوں نے فرمایا: اللہ تعالیٰ اس کو ذلیل کرے گا، جب اس کو آگ میں جلایا جائے گا، یا اس سے کم درجہ کی ذلت ہو گی۔ [المستدرك على الصحيحين/كِتَابُ التَّفْسِيرِ/حدیث: 3212]

اُم المومنین سیدنا اُمّ سلمہ رضی اللہ عنہا سے منقول ہے، انہوں نے عرض کی: یا رسول اللہ صلی اللہ علیہ وسلم ! ہجرت کے سلسلہ میں قرآن کریم میں کہیں بھی عورتوں کا ذکر نہیں ہے تو اللہ تبارک و تعالیٰ نے یہ آیت نازل فرما دی: فَاسْتَجَابَ لَھُمْ رَبُّھُمْ اَنِّیْ لَآ اُضِیْعُ عَمَلَ عَامِلٍ مِّنْکُمْ مِّنْ ذَکَرٍ اَوْ اُنْثٰی بَعْضُکُمْ مِّنْم بَعْضٍ) (آل عمران: 195) ” تو ان کی دعا سن لی ان کے رب نے کہ تم میں کام کرنے والے کی محنت اکارت نہیں کرتا مرد ہو یا عورت تم آپس میں ایک ہو “۔۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ ابواحمد الحافظ نے یہ بات ذکر کی ہے کہ امام بخاری رحمۃ اللہ علیہ کی کتاب میں دو مقامات پر یعقوب علیہ السلام کی سفیان رضی اللہ عنہ سے اور یعقوب علیہ السلام کی دراوردی سے روایت کا ذکر موجود ہے، ابواحمد رحمۃ اللہ علیہ نے کہا: یہ یعقوب بن حمید ہیں۔ (واللہ اعلم) [المستدرك على الصحيحين/كِتَابُ التَّفْسِيرِ/حدیث: 3213]

0 [المستدرك على الصحيحين/كِتَابُ التَّفْسِيرِ/حدیث: 3213M]