سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”بے شک اللہ تعالیٰ کی (صفاتی لحاظ سے) تین پوشاکیں ہیں: اس نے عزت کو اپنا تہبند بنایا، رحمت کو اپنا پیراہن بنایا اور کبریائی (بڑائی) کو اپنی ردا (چادر) بنایا، پس جس کسی نے اس چیز کے علاوہ کسی اور سے عزت چاہی جس کے ذریعے اللہ نے اسے معزز بنایا ہے، تو یہ وہی شخص ہے جسے (قیامت کے دن) کہا جائے گا: ﴿ذُقْ إِنَّكَ أَنْتَ الْعَزِيزُ الْكَرِيمُ﴾ ”چکھو! بے شک تم ہی وہ (بڑے) عزت دار اور معزز (بنتے) تھے۔“ [سورة الدخان: 49] اور جس نے لوگوں پر رحم کیا، اللہ تعالیٰ اس پر رحم فرمائے گا، یہ وہ شخص ہے جس نے اس پیراہن کو اوڑھا جو اس کے لائق ہے، لیکن جس نے اللہ کی اس ردا (کبریائی) کے بارے میں اس سے جھگڑا کیا جو صرف اسی کے لائق ہے، تو اللہ تعالیٰ فرماتا ہے: جس نے (اس صفت میں) مجھ سے جھگڑا کیا اس کے لیے یہ قطعاً لائق نہیں کہ میں اسے جنت میں داخل کروں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3726]