سیدنا عبداللہ بن مسعود رضی اللہ عنہ فرماتے ہیں: آدمی کو جب قبر میں رکھا جاتا ہے تو (عذاب) اس کے قدموں کی طرف سے آتا ہے، پاؤں کہتے ہیں: تو ہماری جانب سے نہیں جا سکتا یہ ہم پر کھڑا ہو کر سورہ ملک پڑھا کرتا تھا، پھر اس کے سینے یا (شاید کہا) پیٹ کی طرف سے آتا ہے تو وہ کہتا ہے: تو میری جانب سے داخل نہیں ہو سکتا یہ ہمارے ساتھ سورہ ملک پڑھا کرتا تھا پھر اس کے سر کی طرف سے آتا ہے تو سر کہتا ہے: تجھے میری جانب سے راستہ نہیں مل سکتا یہ میرے ساتھ سورہ ملک کی تلاوت کیا کرتا تھا۔ آپ نے فرمایا: چنانچہ یہ مانعہ (بچانے والی) ہے، یہ عذاب قبر سے بچاتی ہے اور یہ تورات میں بھی سورۃ الملک کے نام ہی سے تھی، جس نے اس کو رات میں (ایک مرتبہ بھی) پڑھ لیا، (یوں سمجھو گویا کہ) اس نے کثیر اور طویل تلاوت کی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3881]