سیدنا عبداللہ بن عمرو بن العاص رضی اللہ عنہ نے یہ آیت پڑھی: مَّنَّاعٍ لِّلْخَیْرِ مُعْتَدٍ اَثِیْمٍ عُتُلٍّ بَعْدَ ذٰلِکَ زَنِیْمٍ (القلم: 12، 13) ” بھلائی سے بڑا روکنے والا، حد سے بڑھنے والا گنہگار، درشت خو، اس سب پر طرہ یہ کہ اس کی اصل میں خطا ہے۔“ پھر کہا: نبی اکرم صلی اللہ علیہ وسلم نے فرمایا: دوزخی لوگ بدخلق، خوبصورت، اجڈ، متکبر اور بہت جمع کرنے والے ہوتے ہیں اور جنتی لوگ کمزور اور مغلوب ہوتے ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس سند کے ہمراہ نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ نے شعبہ اور ثوری کی حدیث معبد بن خالد کے ذریعے سیدنا حارثہ بن وھب رضی اللہ عنہ کے حوالے سے رسول اللہ صلی اللہ علیہ وسلم سے مختصراً روایت کی ہے۔ [المستدرك على الصحيحين/كتاب التفسير/حدیث: 3886]