مسلم بن یسار جہنی رحمہ اللہ سے روایت ہے کہ سیدنا عمر بن خطاب رضی اللہ عنہ سے اس آیت کے بارے میں پوچھا گیا: ﴿وَإِذْ أَخَذَ رَبُّكَ مِنْ بَنِي آدَمَ مِنْ ظُهُورِهِمْ ذُرِّيَّتَهُمْ﴾ [سورة الأعراف: 172] ، تو سیدنا عمر بن خطاب رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”بیشک اللہ تعالیٰ نے آدم علیہ السلام کو پیدا کیا، پھر اپنے دائیں ہاتھ سے ان کی پیٹھ پر مسح کیا، تو اس سے ایک ذریت نکالی اور فرمایا: میں نے انہیں جنت کے لیے پیدا کیا ہے اور یہ جنتیوں والے اعمال کریں گے، پھر اس نے ان کی پیٹھ پر مسح کیا اور اس سے ایک اور ذریت نکالی اور فرمایا: میں نے انہیں جہنم کے لیے پیدا کیا ہے اور یہ جہنمیوں والے اعمال کریں گے۔“ تو ایک آدمی نے عرض کیا: اے اللہ کے رسول! پھر عمل کس لیے ہے؟ آپ صلی اللہ علیہ وسلم نے فرمایا: ”بیشک اللہ تعالیٰ جب کسی بندے کو جنت کے لیے پیدا کرتا ہے، تو اس سے جنتیوں والے اعمال کرواتا ہے یہاں تک کہ وہ اہل جنت کے اعمال میں سے کسی عمل پر مرتا ہے، پس وہ جنت میں داخل ہو جاتا ہے، اور جب وہ کسی بندے کو جہنم کے لیے پیدا کرتا ہے، تو اس سے جہنمیوں والے اعمال کرواتا ہے یہاں تک کہ وہ اہل جہنم کے اعمال میں سے کسی عمل پر مرتا ہے، پس وہ جہنم میں داخل ہو جاتا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب : تواريخ المتقدمين من الأنبياء والمرسلين/حدیث: 4045]