سیدنا طلحہ بصری رضی اللہ عنہ فرماتے ہیں: ہم میں ایک آدمی تھا، اس کی جان پہچان والا ایک آدمی مدینہ میں رہتا تھا۔ یہ جب مدینہ میں آتا تو اپنے اس دوست کے پاس ٹھہرتا، اور اگر وہ (گھر) نہ ہوتا تو صفہ میں آ جاتا، میں بھی صفہ میں ٹھہر گیا۔ رسول اللہ صلی اللہ علیہ وسلم کی جانب سے روزانہ کھجوریں آتیں، دو آدمیوں کے لیے ایک مد ہوتا، اور آپ ہمیں کھدر کے کپڑے پہنایا کرتے تھے۔ ایک دفعہ رسول اللہ صلی اللہ علیہ وسلم نے ہمیں دن کی ایک نماز پڑھائی، جب آپ نے سلام پھیرا تو دائیں بائیں سے اہل صفہ ندائیں دینے لگے: یا رسول اللہ صلی اللہ علیہ وسلم کھجوروں نے تو ہمارے معدے جلا کر رکھ دئیے ہیں، اور ہمارے کھدر کے کپڑے بوسیدہ ہو چکے ہیں، تو رسول اللہ صلی اللہ علیہ وسلم منبر پر تشریف لائے اور اللہ تعالیٰ کی حمد و ثناء کے بعد ان تکالیف کا ذکر فرمایا جو ان کے ساتھیوں کو پیش آئی تھیں، آپ نے فرمایا: میں اور میرے ساتھیوں نے دس سے زیادہ دن ایسے گزارے ہیں کہ ہمارے پاس کھانے کے لیے بریر کے سوا کچھ نہ تھا (داؤد ابن ابی ہند) کہتے ہیں: میں نے ابوحرب سے پوچھا:” بریر “ کیا چیز ہوتی ہے؟ انہوں نے کہا: پیلو کے درخت کے پھل۔ یہ رسول اللہ صلی اللہ علیہ وسلم کا طعام تھا۔ (رسول اللہ صلی اللہ علیہ وسلم نے مزید فرمایا: پھر ہم اپنے ان بھائیوں کے پاس آئے تو ان کا کھانا کھجور ہمیں بہت پسند آیا۔ تو انہوں نے اس میں ہماری مدد کی۔ خدا کی قسم! تمہارے لیے میرے پاس گوشت اور روٹی ہوتی تو میں تمہیں وہ پیٹ بھر کر کھلاتا۔ لیکن قریب ہے کہ تم ایسا زمانہ پاؤ کہ تم میں سے ہر ایک بڑے پیالے کے ساتھ ناشتہ کرے گا، اور شام کے وقت دوسرا پیالہ حاضر ہو گا۔ (راوی) کہتے ہیں: صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ہم اس دن بہتر ہوں گے یا آج بہتر ہیں؟ آپ صلی اللہ علیہ وسلم نے فرمایا: تم آج بہتر ہو، آج تم ایک دوسرے سے محبت کرتے ہو، اور اس دن تم ایک دوسرے کی گردنیں مارو گے۔ (راوی کہتے ہیں) میرا خیال ہے کہ آپ نے یہ بھی فرمایا تھا: تم ایک دوسرے سے بغض رکھنے لگ جاؤ گے۔ نوٹ: یہ مذکورہ الفاظ ابوسہل القطان کی روایت کے ہیں جبکہ یحیی بن یحیی کی روایت اس سے مختصر ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الهجرة/حدیث: 4336]