سیدنا ابوہریرہ رضی اللہ عنہ فرماتے ہیں: ہم رسول اللہ صلی اللہ علیہ وسلم کے ہمراہ خیبر سے وادی قریٰ کی طرف لوٹے تو آپ کے ساتھ ایک غلام بھی تھا۔ جو سیدنا رفاعہ بن زید الحزامی رضی اللہ عنہ نے آپ کو ہدیہ دیا تھا۔ وہ غروب آفتاب کے وقت رسول اللہ صلی اللہ علیہ وسلم کا کجاوہ اتار رہا تھا۔ ایک نامعلوم تیر آ کر ان کو لگا جس سے وہ ہلاک ہو گیا۔ اور اس تیر کے بارے میں کوئی پتہ نہ چل سکا کہ کس نے مارا تھا، ہم نے اس کے بارے میں کہا: اس کو مبارک ہو کہ یہ جنتی ہے۔ تو رسول اللہ صلی اللہ علیہ وسلم نے فرمایا: ہرگز نہیں۔ اس ذات کی قسم! جس کے قبضہ میں محمد صلی اللہ علیہ وسلم کی جان ہے، اس کا شملہ اس وقت آگ میں جل رہا ہے، جو کہ اس نے خیبر کے دن مسلمانوں کے مال غنیمت سے چرایا تھا۔ تو رسول اللہ صلی اللہ علیہ وسلم کی یہ بات سن کر آپ کا ایک صحابی رضی اللہ عنہ گھبراتا ہوا آیا اور بولا: میں نے جوتوں کے یہ دو تسمے اپنے لئے رکھ لئے تھے۔ تو رسول اللہ صلی اللہ علیہ وسلم نے فرمایا: تجھے اسی کی مثل آگ میں جلنا پڑتا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ دونوں نے اسی سند کے ہمراہ ثور بن یزید کے حوالے سے سیدنا مالک کی یہ حدیث نقل کی ہے ” ہم خیبر کی طرف نکلے تو ہمیں سونا اور چاندی غنیمت میں نہیں ملا۔ (پھر مکمل حدیث بیان کی) [المستدرك على الصحيحين/كتاب المغازي والسرايا/حدیث: 4395]