سیدنا ابراہیم بن عبدالرحمن بن عوف اپنے والد سے روایت کرتے ہیں کہ سیدنا عبدالرحمن بن عوف، عمر بن خطاب کے ساتھ تھے اور محمد بن مسلمہ نے زبیر کی تلوار توڑ دی تھی، پھر ابوبکر کھڑے ہوئے اور لوگوں کو خطبہ دیا اور ان سے معذرت کرتے ہوئے فرمایا: ”اللہ کی قسم! میں کبھی بھی نہ تو دن میں اور نہ ہی رات میں امارت کا حریص تھا، نہ میں اس کی رغبت رکھتا تھا اور نہ ہی میں نے اللہ عزوجل سے پوشیدہ یا علانیہ اس کا سوال کیا تھا، لیکن مجھے فتنے کا ڈر تھا، اور امارت میں میرے لیے کوئی راحت نہیں ہے، بلکہ مجھ پر ایک بڑی ذمہ داری ڈال دی گئی ہے جس کی مجھ میں سکت اور طاقت نہیں ہے سوائے اس کے کہ اللہ عزوجل قوت عطا فرمائے، اور میری یہ خواہش تھی کہ میری جگہ آج وہ شخص ہوتا جو اس کی سب سے زیادہ طاقت رکھتا ہے“، پس مہاجرین نے ان کی یہ بات اور معذرت قبول کر لی، اور علی و زبیر رضی اللہ عنہما نے فرمایا: ”ہم تو صرف اس بات پر ناراض ہوئے تھے کہ ہمیں مشاورت میں پیچھے رکھا گیا ہے، اور ہم ابوبکر رضی اللہ عنہ کو رسول اللہ صلی اللہ علیہ وسلم کے بعد اس امارت کا سب سے زیادہ حقدار سمجھتے ہیں، بے شک وہ غار کے ساتھی اور ﴿ثَانِيَ اثْنَيْنِ﴾ [سورة التوبة: 40] ”دو میں سے دوسرے“ ہیں، اور ہم ان کے شرف اور بزرگی کو جانتے ہیں، اور رسول اللہ صلی اللہ علیہ وسلم نے اپنی زندگی میں انہیں لوگوں کو نماز پڑھانے کا حکم دیا تھا“۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4471]