سیدنا عبداللہ بن عباس رضی اللہ عنہما فرماتے ہیں: نبی اکرم صلی اللہ علیہ وسلم نے (سیدنا علی) کی طرف دیکھا پھر فرمایا: اے علی! تو دنیا اور آخرت میں سردار ہے۔ تیرا دوست میرا دوست ہے اور میرا دوست اللہ کا دوست ہے اور تیرا دشمن میرا دشمن، اللہ کا دشمن ہے اور ہلاکت ہے اس کیلئے جو میرے بعد تجھ سے بغض رکھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور تمام محدثین کا اس بات پر اجماع ہے کہ ابوالازہر ثقہ ہے۔ اور محدثین کے قانون کے مطابق جب کوئی ثقہ متفرد ہو تو اس کی روایت کردہ حدیث صحیح ہوتی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4690]

ابوعبداللہ القرشی بیان کرتے ہیں: احمد بن یحیی الحلوانی فرماتے ہیں: جب ابوالازہر صنعاء سے آئے اور اہل بغداد سے اس حدیث کے متعلق تبادلہ خیال ہوا، تو یحیی بن معین نے اس حدیث کا انکار کر دیا۔ ایک دن انہوں نے اپنے حلقہ درس کے آخر میں کہا: وہ نیشاپوری کذاب کہاں ہے؟ جو یہ حدیث عبدالرزاق کے حوالے سے بیان کرتا ہے۔ تو ابوالازہر کھڑے ہو کے بولا: میں ہوں وہ شخص۔ یحیی بن معین اس کے اس طرح بھری مجلس میں اٹھ کر کھڑے ہو جانے اور اس کے یوں برملا اقرار پر ہنس پڑے۔ پھر اس کو اپنے قریب کر لیا اور بہت ہی قریب کر کے بولے: یہ کیسے ہو گیا کہ عبدالرزاق نے یہ حدیث صرف تم سے بیان کی اور تمہارے علاوہ اور کسی سے بیان نہیں کی: اس نے کہا: اے ابوزکریا! آپ کو پتا ہونا چاہئے کہ میں صنعاء پہنچا تو عبدالرزاق وہاں سے دور ایک بستی میں گئے ہوئے تھے۔ میں (ان سے ملاقات کے لئے اس بستی کی طرف) چل نکلا حالانکہ ان دنوں میری طبیعت بھی ناساز تھی۔ جب میں ان کے پاس پہنچا تو انہوں نے مجھ سے خراسان کے احوال پوچھے، میں نے بیان کر دیئے، پھر میں نے ان سے حدیث شریف لکھی اور ان کی معیت میں صنعاء کی طرف روانہ ہو گیا۔ جب میں ان کے پاس سے رخصت ہونے لگا تو انہوں نے مجھے کہا: میرے ذمہ تیرا ایک حق ہے۔ میں ایک حدیث تمہیں بیان کرتا ہوں، جو حدیث آج تک تیرے سوا اور کسی نے مجھ سے نہیں سنی، خدا کی قسم! پھر انہوں نے لفظ بلفظ یہی حدیث انہوں نے مجھے بیان کی۔ چنانچہ یحیی بن معین نے ان کی اس بات کو تسلیم کیا اور اپنے الفاظ واپس لئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4690M]