سفیان بن لیل سے روایت ہے کہ جب سیدنا حسن بن علی رضی اللہ عنہما اور معاویہ رضی اللہ عنہ کے درمیان وہ معاملہ (صلح) ہو گیا جو ہونا تھا، تو میں مدینہ میں ان کی خدمت میں حاضر ہوا جبکہ وہ اپنے ساتھیوں میں بیٹھے تھے (پھر راوی نے طویل حدیث ذکر کی)، وہ بیان کرتے ہیں کہ ہم نے ان کے پاس اذان کا تذکرہ کیا تو ہم میں سے بعض نے کہا کہ اذان کی ابتدا عبداللہ بن زید بن عاصم کے خواب سے ہوئی تھی، تو سیدنا حسن بن علی رضی اللہ عنہما نے ان سے فرمایا: ”اذان کی شان اس سے کہیں زیادہ بلند ہے، جبرائیل علیہ السلام نے آسمان پر دو دو بار اذان دی اور اسے رسول اللہ صلی اللہ علیہ وسلم کو سکھایا، اور ایک ایک بار اقامت کہی اور وہ بھی رسول اللہ صلی اللہ علیہ وسلم کو سکھائی“، چنانچہ جب سیدنا حسن رضی اللہ عنہ حکمران بنے تو انہوں نے (اسی کے مطابق) اذان دی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4854]