ابو حازم سے روایت ہے، انہوں نے کہا: میں سیدنا حسن بن علی رضی اللہ عنہما کی وفات کے دن موجود تھا، میں نے دیکھا کہ سیدنا حسین بن علی رضی اللہ عنہما، سعید بن العاص کی گردن پر کچوکا لگاتے ہوئے کہہ رہے تھے: ”آگے بڑھیں (نمازِ جنازہ پڑھائیں)، اگر یہ سنت نہ ہوتی تو میں آپ کو ہرگز آگے نہ کرتا،“ اور ان کے درمیان کچھ ناگواری تھی، تو سیدنا ابوہریرہ رضی اللہ عنہ نے فرمایا: کیا تم اپنے نبی صلی اللہ علیہ وسلم کے بیٹے کے لیے اس مٹی (قبر کی جگہ) پر بخل کرتے ہو جس میں تم انہیں دفن کرنا چاہتے ہو؟ حالانکہ میں نے رسول اللہ صلی اللہ علیہ وسلم کو فرماتے سنا ہے: ”جس نے ان دونوں سے محبت کی اس نے مجھ سے محبت کی اور جس نے ان دونوں سے بغض رکھا اس نے مجھ سے بغض رکھا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4855]