ام الفضل بنت حارث رضی اللہ عنہا سے روایت ہے کہ وہ رسول اللہ صلی اللہ علیہ وسلم کی خدمت میں حاضر ہوئیں اور عرض کیا: اے اللہ کے رسول صلی اللہ علیہ وسلم ! میں نے آج رات ایک ناپسندیدہ خواب دیکھا ہے، آپ صلی اللہ علیہ وسلم نے پوچھا: ”وہ کیا ہے؟“ انہوں نے عرض کیا: وہ بہت ہولناک ہے، آپ صلی اللہ علیہ وسلم نے فرمایا: ”وہ کیا ہے؟“ انہوں نے عرض کیا: میں نے دیکھا کہ جیسے آپ کے جسم مبارک کا ایک ٹکڑا کاٹ کر میری گود میں رکھ دیا گیا ہے، تو رسول اللہ صلی اللہ علیہ وسلم نے فرمایا: ”تم نے اچھا خواب دیکھا ہے، ان شاء اللہ فاطمہ کے ہاں بیٹا پیدا ہوگا جو تمہاری گود میں ہوگا“، چنانچہ فاطمہ (رضی اللہ عنہا) کے ہاں حسین (رضی اللہ عنہ) پیدا ہوئے اور وہ میری گود میں آئے جیسا کہ رسول اللہ صلی اللہ علیہ وسلم نے فرمایا تھا، پھر ایک دن میں رسول اللہ صلی اللہ علیہ وسلم کی خدمت میں حاضر ہوئی اور حسین کو آپ صلی اللہ علیہ وسلم کی گود میں رکھ دیا، اچانک میں نے دیکھا کہ رسول اللہ صلی اللہ علیہ وسلم کی آنکھوں سے آنسو بہہ رہے ہیں، میں نے عرض کیا: اے اللہ کے نبی صلی اللہ علیہ وسلم ! میرے ماں باپ آپ پر فدا ہوں، آپ کو کیا ہوا؟ آپ صلی اللہ علیہ وسلم نے فرمایا: ”میرے پاس جبرائیل علیہ السلام آئے اور انہوں نے مجھے خبر دی کہ میری امت میرے اس بیٹے کو شہید کر دے گی“، میں نے پوچھا: کیا اسے؟ آپ صلی اللہ علیہ وسلم نے فرمایا: ”ہاں، اور جبرائیل میرے پاس اس کی جگہ کی سرخ مٹی بھی لائے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4878]