سیدنا جابر بن عبداللہ رضی اللہ عنہما فرماتے ہیں: جب غزوہ کا وقت بالکل قریب آ گیا تو رات کے وقت میرے والد نے مجھے اپنے پاس بلایا اور کہنے لگے: میں دیکھ رہا ہوں کہ اصحاب رسول صلی اللہ علیہ وسلم میں سب سے پہلے میں شہید ہوں گا، اور خدا کی قسم! رسول اللہ صلی اللہ علیہ وسلم کے بعد میری نگاہ میں تم سے زیادہ عزیز کوئی نہیں ہے، میرے ذمہ (بہت سارا قرضہ) ہے، تم یہ ادا کر دینا اور اپنی بہنوں کا بہت خیال رکھنا۔ آپ فرماتے ہیں: اگلے دن واقعی میرے والد صاحب ہی سب سے پہلے شہید ہوئے، میں نے ان کو ایک اور شہید کے ہمراہ ایک قبر میں دفن کر دیا، پھر اس کے بعد مجھے اس بات پر تسلی نہ ہوئی کہ میں نے ان کو ایک اور آدمی کے ہمراہ ایک قبر میں دفن کیا ہے، چنانچہ چھ ماہ کے بعد میں نے ان کی قبر کشائی کی، تو اس وقت بھی ان کا جسم اسی طرح تروتازہ تھا جیسا کہ تدفین کے وقت تھا سوائے ان کے کان کے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4975]