سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے سیدنا جابر رضی اللہ عنہ سے فرمایا: ”اے جابر! کیا میں تمہیں خوشخبری نہ دوں؟“ انہوں نے عرض کیا: ”کیوں نہیں، آپ مجھے خوشخبری دیں، اللہ آپ کو خیر کی خوشخبری دے“، آپ صلی اللہ علیہ وسلم نے فرمایا: ”کیا تمہیں معلوم ہے کہ اللہ عزوجل نے تمہارے والد کو زندہ کیا اور انہیں اپنے سامنے بٹھایا؟ پھر فرمایا: اے میرے بندے! مجھ سے جو چاہے مانگ میں تجھے عطا کروں گا، تو انہوں نے عرض کیا: اے میرے رب! میں تیری ویسی عبادت نہ کر سکا جیسا تیری عبادت کا حق تھا، میری تمنا ہے کہ تو مجھے دنیا میں واپس بھیج دے تاکہ میں نبی صلی اللہ علیہ وسلم کے ساتھ مل کر ایک بار پھر شہید ہو جاؤں، تو اللہ تعالیٰ نے فرمایا: میری طرف سے یہ بات طے ہو چکی ہے کہ اب تم اس (دنیا) کی طرف واپس نہیں جاؤ گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4973]

سیدنا جابر رضی اللہ عنہ سے روایت ہے، انہوں نے کہا کہ میرے والد نے مجھ سے فرمایا: ”اے میرے پیارے بیٹے! میرا خیال ہے کہ کل احد کے دن شہید ہونے والے اولین لوگوں میں میرا نام ہوگا، پس میں تمہیں عبداللہ کی بیٹیوں (اپنی بہنوں) کے بارے میں خیر کی وصیت کرتا ہوں“، پھر جب جنگ ہوئی تو وہ اسی دن شہید ہو گئے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4974]

سیدنا جابر بن عبداللہ رضی اللہ عنہما سے روایت ہے کہ جب احد کا قتال قریب آیا تو میرے والد نے مجھے رات کے وقت بلایا اور فرمایا: ”میں اپنے آپ کو رسول اللہ صلی اللہ علیہ وسلم کے اصحاب میں سے ان اولین لوگوں میں دیکھ رہا ہوں جو شہید کیے جائیں گے، اور اللہ کی قسم! رسول اللہ صلی اللہ علیہ وسلم کی جان کے بعد میرے نزدیک تم سے زیادہ کوئی عزیز نہیں ہے، مجھ پر کچھ قرض ہے اسے ادا کر دینا اور اپنی بہنوں کے ساتھ اچھا سلوک کرنا“، جابر کہتے ہیں: جب صبح ہوئی تو وہ پہلے شہید تھے، میں نے انہیں ایک اور شخص کے ساتھ ایک ہی قبر میں دفن کیا، پھر میرا دل اس بات پر مطمئن نہ ہوا کہ میں انہیں کسی دوسرے کے ساتھ قبر میں چھوڑ دوں، چنانچہ میں نے چھ ماہ بعد انہیں قبر سے نکالا تو وہ بالکل اسی حالت میں تھے جیسے میں نے انہیں پہلے دن رکھا تھا، سوائے ان کے کان کے۔
یہ حدیث امام مسلم کی شرط پر صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4975]

طلحہ بن خراش سیدنا جابر بن عبداللہ رضی اللہ عنہما سے روایت کرتے ہیں کہ رسول اللہ صلی اللہ علیہ وسلم نے مجھ سے فرمایا: ”یقیناً اللہ تعالیٰ کسی سے کلام نہیں فرماتا مگر حجاب کے پیچھے سے، لیکن اس نے تمہارے والد سے آمنے سامنے کلام فرمایا اور کہا: مجھ سے کسی چیز کی تمنا کرو“، اور پھر پوری حدیث ذکر کی۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4976]